Mekim Wok Long Autlain

PLANTI man i save pret na guria liklik taim ol i tingting long yusim wanpela autlain. Bel bilong ol i save stap isi na ol i no pret sapos ol i raitim olgeta tok long wanpela hap pepa o kolim ol tok ol i holim pinis long tingting.

Tasol long olgeta de yumi save mekim toktok yumi no bin raitim long hap pepa. Yumi mekim olsem taim yumi toktok wantaim ol famili na pren. Yumi mekim taim yumi autim tok. Na yumi mekim taim yumi mekim ol prea yumi pilim tru long bel, maski em i beten bilong yumi yet o bilong wanpela lain.

Taim yu mekim tok, yu ting em i bikpela samting long yusim wanpela manuskrip o wanpela autlain? Tru, taim yu ritim manuskrip yu bin redim gut, bai yu kamapim ol tok i stret olgeta na bai yu kolim ol wan wan tok yu laik kolim, tasol i hatwok liklik long ol man i pilim tru long bel kain tok olsem. Taim yu ritim planti sentens, bai yu kirap bihainim wanpela spit na wanpela pasin bilong mekim nek i go antap na i go daun, na dispela i narapela kain long pasin yu save bihainim taim yu mekim tok olsem yu toktok wantaim man. Sapos yu tingting long ol tok yu bin raitim long pepa na yu no tingim odiens na senisim tok bilong kamapim tok i stret long ol, ating planti bai i no inap putim gut yau. Bilong tok i ken kirapim tru bel bilong ol man, yu mas kamapim tok i stap long tingting.

Ol i wokim Skul Tiokratik bilong helpim yumi long ol samting yumi mekim long olgeta de. Taim yumi bungim sampela pren, yumi no save kamautim wanpela hap pepa na ritim tingting bilong yumi long ol bambai yumi ken kolim ol tok i nambawan long kolim. Long wok autim tok, yumi no save karim wanpela manuskrip bilong ritim long ol man, long wanem, yumi pret, nogut yumi lusim tingting long sampela samting yumi laik tokim ol long en. Taim yu mekim soim long skul long pasin bilong autim tok long kain taim olsem, wok long mekim toktok long pasin yu save bihainim taim yu toktok wantaim narapela. Taim yu redi gut, yu bai luksave olsem wanpela autlain, maski em i stap long tingting o long pepa, em inap kirapim yu long tingim ol bikpela tok yu laik kamapim. Tasol olsem wanem yu ken strongim bel na bilip olsem yu inap yusim autlain bilong mekim tok?

Bungim Gut Ol Tingting Bilong Yu. Bilong mekim wok long wanpela autlain taim yu toktok, bungim gut ol tingting bilong yu. Dispela i no olsem yu laik makim ol wan wan tok yu laik kolim. Em i makim olsem yu laik tingting gut pastaim na nau yu kirap na toktok.

Man i no save tingting gut pastaim na em i kirap kwik long toktok, em bai mekim sampela tok bihain em bai ting i gutpela em i no bin mekim. Sampela man i save toktok nabaut, olsem toktok long wanpela samting na bihain kirap stori long narapela samting olgeta. Yu inap stretim dispela tupela hevi sapos yu malolo liklik pastaim na wokim wanpela autlain long tingting bilong yu paslain long yu kirap toktok. Pastaim tingim gut samting yu laik bai dispela tok i mekim long ol man, na bihain makim ol wan wan samting yu mas mekim pastaim, orait nau kirap long toktok.

Olsem wanem? Yu redim ol samting bilong autim tok? No ken tingting tasol long putim ol samting long bek bilong yu​—tingting tu long bungim gut ol tingting yu laik kamapim. Sapos yu tingting pinis long yusim sampela tok em Wok Kingdom Bilong Yumi i kolim, orait ritim planti taim liklik bambai ol bikpela tok i ken pas gut long tingting bilong yu. Kolim ol dispela bikpela tok insait long wanpela o tupela liklik sentens tasol. Kolim ol dispela tok long pasin yu yet yu save kolim, na tingim i stap bilong ol man long teritori bilong yu. Bai yu lukim olsem i gutpela sapos i gat wanpela autlain i stap long tingting. Wanem samting bai stap long kain autlain olsem? (1) Bilong kirapim tok, ating yu ken kolim wanpela samting planti man long komiuniti i save tingting long en. Askim man bilong haus long kamapim tingting bilong em. (2) Tingim samting yu laik stori long en, na kamapim wanpela o tupela skripsa i save stori long ol samting God i promis long mekim bilong helpim ol man. Sapos rot i op, kamapim strong olsem Jehova bai stretim ol dispela samting long rot bilong Kingdom, olsem gavman bilong em long heven. (3) Kirapim man long bihainim dispela tok yutupela i bin mekim. Ating yu ken tokim em long kisim sampela buk samting o tokim em yu laik kirapim Baibel-stadi wantaim em na stretim gut rot bilong go bek na toktok moa wantaim em.

Bilong mekim kain tok olsem, bai yu gat wok long wanpela autlain i stap long tingting tasol. Sapos yu laik lukim wanpela autlain i stap long hap pepa paslain long yu autim tok, ating dispela autlain bai i gat wan wan tok bilong kirapim tok, wanpela o tupela skripsa tasol, na wanpela sotpela tok yu laik mekim bilong pinisim tok. Taim yumi redim na yusim kain autlain olsem, dispela i mekim na yumi no toktok nabaut, na i helpim yumi long autim tok i klia na i no hatwok long tingim.

Sapos long teritori i gat wanpela askim samting em planti taim ol man i kamapim, ating i gutpela sapos yu painim sampela save long dispela. Yu ken painim tupela o tripela bikpela tok wantaim ol skripsa i strongim ol dispela tok. Buklet Sampela Tok Bilong Baibel Bilong Toktok Wantaim Man Long En o ol liklik het-tok ol i raitim long strongpela rait long buk Toktok Gut inap kamap olsem autlain bilong yu. Ating yu bai painim wanpela gutpela tok long narapela buk samting yu laik kamapim. Wokim wanpela sotpela autlain, na kisim poto-kopi bilong dispela tok bilong narapela buk samting na bungim wantaim autlain, na putim wantaim bek samting yu save yusim taim yu autim tok. Taim man bilong haus i kamapim wanpela askim, tokim em olsem yu amamas long stori long em long as bilong samting yu bilip long en. (1 Pi. 3:15) Yusim autlain olsem as bilong ol tok yu bai mekim.

Taim yu laik beten wantaim famili, o long wanpela Buk-Stadi, o long kongrigesen, i gutpela long bungim gut ol tingting bilong yu. Long Luk 11:​2-4, Jisas i bin givim ol disaipel wanpela autlain bilong mekim beten i gat mining bilong en na i no hatwok long bihainim. Taim ol i dediketim tempel long Jerusalem, Solomon i mekim longpela beten. Yumi save, em i bin tingim gut ol tok em i laik mekim. Pastaim em i toktok long Jehova na promis Em i bin mekim wantaim Devit; bihain em i stori long tempel; na bihain moa long ol narapela narapela samting i kamap na ol narapela narapela lain. (1 Kin. 8:​22-53) Ol dispela pasin bilong beten inap helpim yumi.

Raitim Liklik Tok Tasol. Olsem wanem? Bai yu mekim wok long dispela autlain taim yu mekim wanpela pablik-tok? Yu mas raitim hamas tok?

Tingim, wok bilong autlain em bilong helpim yu long tingim gen ol tingting yu bin kisim. Ating yu pilim olsem em bai helpim yu sapos yu raitim sampela sentens bilong kirapim tok. Tasol bihain long dispela yu mas wok long tingim gen ol tingting yu bin kisim, no ken tingting long ol wan wan tok. Sapos yu laik raitim ol dispela tingting long ol sentens, orait raitim ol sotpela sentens. Ol wan wan bikpela tok yu laik kamapim i mas stap ples klia long autlain. Bilong mekim olsem yu ken raitim long ol bikpela rait, o katim, o makim long wanpela kala. Aninit long wan wan bikpela tok, wokim lista bilong ol tingting yu laik kamapim insait long dispela bikpela tok. Raitim skripsa yu bai ritim. Em i gutpela long ritim ol skripsa stret long Baibel. Raitim ol tok piksa yu laik kamapim. Ating yu laik kamapim tok bilong wanpela saveman. Raitim ol tok em inap helpim yu long kamapim stret ol tok. Em i isi moa long yusim autlain sapos yu bin raitim gut ol tok.

Sampela i save yusim ol autlain ol i no raitim planti tok long en. Sampela autlain i gat wan wan bikpela tok, na ol skripsa man i mekim tok bai kolim long tingting, na sampela piksa bilong helpim em long tingim ol tingting em i laik kamapim. Man i gat kain autlain olsem inap kamapim gut ol tok na narapela bikpela tok i bihainim stret narapela tok, na em i mekim tok olsem em i toktok wantaim narapela. Dispela em i wok bilong dispela stadi.

Long pes 39 i go 42 bilong dispela buk, bai yu painim wanpela hap, “Wokim Wanpela Autlain.” Em bai helpim yu tru sapos yu ritim dispela hap taim yu wok long mekim dispela stadi, “Mekim Wok Long Autlain.”

Bilong Yusim Autlain. Mak yu laik winim i no bilong redim tok olsem wanpela autlain. Nogat. Yu laik lain gut long yusim wanpela autlain.

Namba wan samting yu mas mekim, em yu mas redi long yusim autlain long givim wanpela tok. Lukluk long tim bilong tok, ritim olgeta wan wan bikpela tok, na tokim yu yet long olsem wanem ol wan wan bikpela tok i stret long tim. Makim hamas minit yu ken lusim bilong toktok long ol wan wan bikpela tok. Orait nau kirap stadi gut long namba wan bikpela tok. Tingting long ol tok, ol skripsa, na ol tok piksa samting yu laik yusim bilong kamapim dispela bikpela tok. Skelim dispela hap planti taim liklik inap dispela tok i stap klia long tingting bilong yu. Mekim wankain pasin long olgeta wan wan bikpela tok. Tingim wanem tok yu inap lusim sapos yu mas mekim olsem, bambai yu inap pinisim tok long taim stret. Nau mekim riviu long tok olgeta. Tingim gut ol tingting yu bin kisim long dispela tok, ol wan wan tok nogat. No ken holim long tingting olgeta tok yu laik mekim.

Taim yu mekim dispela tok, ating bai yu inap lukluk gut long ol man. Taim yu ritim wanpela skripsa pinis, ating yu inap yusim Baibel na stori gut long dispela skripsa, na yu no gat wok long lukluk long autlain. Na tu, sapos yu kamapim wanpela tok piksa, yu ken kamapim long wankain pasin olsem yu stori long ol pren na yu no lukim ol pepa samting na ritim. Taim yu toktok, no ken lukluk long autlain bilong kisim kirap bilong olgeta wan wan sentens. Mekim ol tok i olsem yu pilim tru long bel, na long dispela rot bai yu putim dispela tok i go daun long bel bilong odiens bilong yu.

Taim yu lain pinis long yusim wanpela autlain, yu lainim wanpela samting em bai helpim yu tru long kamap man i save gut long mekim tok long ai bilong ol man.