Kamapim Tok i Stap Long Tingting

ATING yu bin wok strong long redim tok. Em ol tok i givim gutpela save long man. Ol wan wan bikpela tok i bihainim gut narapela. Taim yu mekim, tok i ron gut. Tasol sapos ol man i putim hap yau tasol long tok yu mekim​—ol i harim hap tok tasol, long wanem, tingting bilong ol i wokabaut​—olsem wanem tok bilong yu inap helpim ol? Sapos ol i hatwok long putim gut yau na tingting long tok yu mekim, yu ting ol dispela tok bai go daun long bel bilong ol?

Wanem as bilong dispela hevi? Kain kain samting inap mekim. Planti taim hevi i olsem: Taim yu mekim tok yu no kamapim tok i stap long tingting. Olsem: Man bilong mekim tok i save lukluk planti taim tumas long autlain, o em strong tumas long bihainim stret tru ol lo na pasin bilong toktok. As bilong ol dispela hevi em pasin man i bihainim bilong redim tok.

Sapos yu raitim olgeta tok yu laik mekim na bihain sotim ol tok bilong wokim wanpela autlain, bai yu hatwok long mekim tok long pasin bilong kamapim tok i stap long tingting. Bilong wanem? Long wanem, yu makim pinis ol wan wan tok yu laik kolim. Maski yu yusim dispela autlain, bai yu wok long tingim bek ol tok yu bin raitim long namba wan taim. Taim yu raitim olgeta tok, ol tok yu raitim i save bihainim ol lo na pasin bilong mekim tok na ol tok i no wankain olsem yu save kolim taim yu toktok wantaim ol man long olgeta de. Pasin bilong yu long mekim tok bai kamapim dispela.

No ken raitim olgeta wan wan tok yu laik mekim. Traim mekim olsem: (1) Makim het-tok na ol bikpela tok yu laik mekim bilong kamapim gut dispela het-tok. Bilong mekim wanpela sotpela tok, ating tupela bikpela tok em inap. Wanpela tok i longpela liklik bai i gat fopela o faipela bikpela tok. (2) Aninit long ol wan wan bikpela tok, raitim ol skripsa yu tingting long yusim bilong kamapim dispela tok; na raitim ol tok piksa na ol as tok bilong strongim tok yu mekim. (3) Tingting long olsem wanem yu bai kirapim tok bilong yu. Ating yu ken raitim wanpela o tupela sentens. Na tu, tingim tok yu bai mekim bilong pinisim tok.

Em i bikpela samting long redim gut tok. Tasol no ken kolim kolim olgeta wan wan tok yu laik mekim bilong putim long tingting. Taim yu mekim tok long pasin bilong kamapim tok i stap long tingting, orait redim ol tingting yu laik kamapim, i no ol wan wan tok yu bai kolim. Ol dispela tingting yu mas kamapim gen long tingting bilong yu i go i go inap long narapela tingting i bihainim gut narapela. I no hatwok long mekim olsem sapos yu bin skruim gut wanpela hap tok i go long narapela, na taim yu mekim tok, bai i no hatwok long kamapim ol tok i stap long tingting.

Tingim Ol Gutpela Samting i Kamap. Taim yu mekim tok long pasin bilong kamapim tok i stap long tingting, bai yu mekim tok long pasin ol man i laik harim. I olsem pasin bilong yu long mekim tok bai i gat laip na ol man bai i laik long harim.

Dispela pasin bilong mekim tok i givim rot long yu long lukim pes bilong ol man, na dispela i save helpim yu long toktok gut wantaim ol. Taim yu no lukim autlain bilong kolim olgeta tok, ol man i harim tok bai pilim olsem yu save gut long ol tok yu laik mekim na yu bilipim tru dispela tok. Olsem na taim yu mekim kain tok olsem, i olsem yu toktok wantaim wanpela man, na yu pilim long bel tok yu mekim na dispela bai mekim tok i go daun long bel bilong man.

Taim yu kamapim tok i stap long tingting, bai yu gat rot long senisim tok bilong yu liklik. I no olsem yu redim olgeta tok bilong mekim na yu no inap senisim liklik. Sapos long de yu laik mekim dispela tok, niuspepa i stori long wanpela bikpela samting i kamap na i stret long samting yu stori long en, ating i stret yu ken stori liklik long dispela samting, a? O taim yu wok long mekim dispela tok, yu luksave olsem i gat planti skulmangi i stap. Em bai gutpela sapos yu inap senisim ol tok piksa na ol tok bilong helpim man na yu mekim ol tok na tok piksa i stret long helpim ol skulmangi long save olsem wanem dispela tok inap helpim ol!

Na tu, taim yu kamapim tok i stap long tingting, dispela i save kirapim tingting bilong yu yet. Taim ol man i laikim na harim gut tok yu mekim, bai yu givim bel moa yet long mekim tok na bai yu kamapim sampela tingting moa o bai yu kolim gen sampela tok bilong kamapim strong dispela tok. Sapos yu luksave olsem tingting bilong ol man i laik wokabaut, orait yu ken mekim sampela samting bilong winim dispela, nogut yu toktok nating long ol man ol i wok long tingting long ol narapela samting.

Abrusim Ol Hevi Bilong En. Yu mas save olsem pasin bilong kamapim tok i stap long tingting i gat sampela hevi bilong en. Wanpela em hevi bilong kalapim minit bilong tok. Sapos yu kamapim planti narapela tingting taim yu mekim tok, ating bai yu kalapim minit bilong tok. Bilong stretim dispela hevi, yu ken raitim long autlain olsem yu gat hamas minit long mekim olgeta wan wan hap bilong tok, orait nau bihainim gut dispela sediul.

Narapela hevi em inap painim ol man i save gut long mekim tok em pasin bilong bilip tumas long save bilong ol yet. Sampela ol i bin mekim planti tok long ai bilong ol man na i no hatwok long ol i kisim sampela tingting na hariap kamapim wanpela tok bilong inapim ol minit bilong tok. Tasol pasin daun na pasin bilong tingim olsem yumi stap insait long wanpela program bilong skulim ol man em Jehova yet i Nambawan Tisa bilong en, dispela bai kirapim yumi long beten taim yumi laik redim dispela tok na yumi redim gut.​—Ais. 30:20; Ro. 12:​6-8.

Ating ol man i no gat planti save long kamapim tok i stap long tingting ol i save tingting planti olsem ol bai lusim tingting long ol tok ol i laik mekim. No ken larim dispela tingting i pasim yu long kisim pasin bilong kamapim tok i stap long tingting. Redi gut, na wetim Jehova i givim spirit bilong em long yu bilong helpim yu.​—Jo. 14:26.

Sampela ol i tingting planti long ol wan wan tok ol bai mekim na dispela i pasim ol. Tru, taim yu kamapim tok i stap long tingting, ating ol dispela tok i no bihainim stret ol lo bilong kolim tok ples olsem long wanpela manuskrip, tasol ol man i save amamas moa taim yu mekim tok olsem yu toktok wantaim man. Ol manmeri i save kisim kwik ol tingting man i kamapim taim em i kolim ol tok na ol sentens i no hatwok long kisim. Sapos yu redi gut, ol stretpela tok bai kamap tasol long tingting. I no olsem yu bin lainim lainim na olgeta wan wan tok i pas long tingting, nogat. Yu inap tingim ol tok long wanem yu bin skelim gut ol dispela tingting. Na sapos yu save kolim ol gutpela stretpela tok taim yu toktok long olgeta de, bai i no hatwok long kolim kain tok olsem taim yu sanap long pletfom.

Yusim Wanem Kain Autlain Samting. Bihain taim yu mekim mekim planti taim, ating bai yu raitim wan wan tok tasol aninit long ol wan wan bikpela tok long autlain bilong yu. Yu ken raitim long wanpela kat o hap pepa ol dispela tok wantaim ol skripsa yu bai kamapim bambai i no hatwok long lukim. Long wok autim tok, ating bai yu putim sotpela autlain long tingting tasol. Sapos yu bin painim sampela save long wanpela tok bilong mekim wanpela gobek, yu ken raitim sampela sotpela tok long wanpela hap pepa na putim namel long ol pes bilong Baibel. O yu ken yusim wanpela autlain i stap long buklet Sampela Tok Bilong Baibel Bilong Toktok Wantaim Man Long En o kisim sampela tok i stap long buk Toktok Gut Wantaim Ol Man Long Baibel.

Sapos ol i makim yu long lukautim sampela hap bilong ol miting na wanpela pablik-tok tu insait long sampela wik tasol, ating yu mas raitim sampela tok moa long autlain bilong yu. Bilong wanem? Bilong kirapim tingting bilong yu paslain long mekim ol dispela tok. Tasol sapos yu lukluk planti taim long autlain bilong yu taim yu mekim tok​—olsem lukluk liklik long olgeta wan wan sentens​—ol gutpela samting i kamap long pasin bilong kamapim tok i stap long tingting bai lus. Sapos yu raitim planti tok, putim ol mak i makim ol bikpela tok na ol skripsa na dispela bai stap olsem autlain bilong yu.

Brata i save gut long mekim tok bai kamapim tok i stap long tingting, tasol em i ken kamapim sampela hap bilong tok long sampela narapela pasin tu. Long kirap na pinis bilong tok yu mas lukluk gut long ol man na kamapim ol tok i gat strong, na kolim stret, olsem na em i gutpela long putim long tingting sampela sentens yu laik kolim. Taim yu laik kamapim sampela namba, o tok bilong wanpela man, o wanpela skripsa, em i stret yu ken ritim ol dispela kain tok na em inap helpim tru ol man.

Taim Ol Man i Tokim Yu Long Bekim Tok Long Ol. Sampela taim ol man i tokim yumi long kamapim ol bilip bilong yumi na yumi no gat taim long redim bekim pastaim. Dispela inap kamap taim yumi autim tok na man i kamapim wanpela strongpela askim. O kain samting olsem inap kamap taim yumi stap wantaim ol wanblut, long ples wok, o long skul. Sampela taim ol wokman bilong gavman i tokim yumi long kamapim as bilong ol bilip bilong yumi na ol pasin yumi save bihainim. Baibel i tok: “Sapos ol i askim yupela long as bilong dispela gutpela samting yupela i wetim i stap, orait yupela i mas redi oltaim long bekim tok long ol.”​—1 Pi. 3:15.

Lukim tok Pita na Jon i bin bekim long nambawan kaunsil bilong ol Juda long Aposel 4:​19, 20. Long faipela sentens tasol ol i kamapim klia tingting bilong ol. Ol i mekim long pasin i stret long ol man ol i toktok wantaim ol, olsem bikpela samting ol aposel i mas tingim, ol kaunsil tu i mas tingim. Bihain, ol man i sutim tok giaman long Stiven, na ol i kisim em i go long dispela kaunsil. Long Aposel 7:​2-53 yu ken ritim strongpela tok em i bekim long ol taim em i kamapim tok em i no bin redim pastaim. Olsem wanem em i bin stretim ol tok em i laik kamapim? Em i kamapim tok bilong ol samting i bin kamap pastaim na ol samting i kamap bihain. Long taim stret em i kirap na kamapim strong pasin bikhet bilong lain Israel. Bilong pinisim tok, em i soim nambawan kaunsil olsem ol yet i bin bihainim wankain pasin taim ol i bin kilim i dai Pikinini bilong God.

Taim ol man i laik save long ol bilip bilong yu na yu mas bekim tok wantu long tok i stap long tingting, wanem samting inap helpim yu long kamapim gutpela tok? Bihainim pasin bilong Nehemia, em i bin beten paslain long em i bekim askim bilong King Artaserksis. (Neh. 2:4) Bihain, kwiktaim wokim wanpela autlain long tingting. I gutpela long bihainim dispela lista: (1) Kisim wanpela o tupela bikpela tok i save bekim gut dispela askim (ating yu inap kisim sampela tok i stap long buk Toktok Gut Wantaim Ol Man Long Baibel). (2) Makim ol skripsa yu bai kamapim bilong strongim dispela tok. (3) Skelim gut olsem wanem yu ken kirapim tok na bekim askim long gutpela pasin bambai man i givim askim bai i gat laik long harim. Orait nau kirap na toktok.

Taim ol man i sutim ol askim long yu, yu inap tingim ol samting yu mas mekim? Jisas i tokim ol disaipel olsem: “Yupela i no ken pret na ting, ‘Mipela bai i mekim wanem kain tok? Na mipela bai i bekim wanem tok?’ Nogat. Long dispela taim stret God bai i soim yupela long tok yupela i mas autim. Long wanem, i no yupela yet bai i autim tok. Nogat. Spirit bilong Papa bilong yupela, em bai i autim tok long maus bilong yupela.” (Mt. 10:​19, 20) Dispela i no makim olsem long rot bilong wanpela mirakel yu bai kisim dispela “gutpela tingting” ol Kristen long taim bilong ol aposel i bin kisim. (1 Ko. 12:8) Tasol sapos oltaim yu wok long kisim skul Jehova i save givim long ol wokboi bilong em insait long kongrigesen Kristen, orait spirit holi bai kirapim yu long tingim ol tok yu mas mekim long taim stret.​—Ais. 50:4.

Tru tumas, taim yu mekim tok long pasin bilong kamapim tok i stap long tingting, dispela inap mekim gutpela wok. Sapos yu mekim olsem long olgeta taim yu lukautim ol asainmen bilong yu long kongrigesen, bai i no hatwok long bekim ol askim i kamap wantu, long wanem, pasin bilong redi long mekim dispela tupela kain tok i wankain. No ken surik. Taim yu lain long mekim tok long pasin bilong kamapim tok i stap long tingting, dispela bai helpim yu long mekim wok autim tok bilong yu i kamap gutpela moa. Na sapos yu kisim gutpela wok bilong givim ol tok long kongrigesen, ating ol man bai putim gut yau long tok bilong yu na dispela tok bai go daun long bel bilong ol.