Stadi 19
Maus i No Hevi, Maus i Kolim Stret Ol Tok
1 Sapos yu no tingting gut na yu no redim gut, bai yu no inap kolim gut ol tok. Sapos yu no save long sampela hap tok, bai yu no inap kolim stret. Olsem na sapos yu laik kaunim sampela tok, yu mas redim gut, kaunim kaunim, olsem bai yu inap kolim stret ol tok.
2 Sampela man, taim ol i toktok, maus bilong ol i hevi na ol i brukim brukim tok bilong ol. Ol i kirap toktok, lusim, na ol i kirap kolim gen. Taim yu laik toktok, tingim gut pastaim tok yu laik kolim.
3 Taim yu laik toktok, na yu no save bai yu kolim olsem wanem, orait, yu mas lainim sampela tok moa. Sapos yu lukim sampela nupela tok insait long Wastaua samting, yu mas lainim insait bilong dispela tok, na bihain yu ken kolim long taim yu toktok wantaim sampela man. Na taim yu laik kaunim buk, kisim pen pastaim na brukim brukim ol tok i go liklik liklik hap tasol, na taim yu kaunim, yu no ken malolo planti taim; mas malolo long hap yu bin brukim. Ai bilong yu i no ken lukim wanpela tok tasol; mas lukim tripela o fopela samting.
4 Kolim ol tok yu save mekim taim yu toktok wantaim narapela man. Taim yu mekim wanpela tok yu no ken kolim tok olsem ol i save raitim long wanpela buk. Yu mas kolim ol tok yu save mekim taim yu toktok wantaim narapela man. Taim yu mekim tok long Skul, yu no ken mekim long narapela kain pasin; toktok olsem yu save toktok long olgeta taim. No ken kolim wanpela tok planti taim insait long tok bilong yu; kolim ol narapela narapela tok. Mekim tok olsem yu autim tok long man bilong haus.
5 Mekim olsem yu toktok wantaim man. No ken redim olgeta tok yu laik kamapim. Mas toktok olsem yu save toktok taim yu stori wantaim narapela man. Mekim tok olsem yu toktok wantaim tupela o tripela man tasol. Taim yu kaunim tok, kaunim gut bambai ol man inap save long insait bilong dispela tok. Sapos long olgeta de yu mekim gut ol tok, orait taim yu mekim long Skul, yu bai mekim olsem tasol.
6 Kolim stret ol tok. Sapos yu no kolim stret ol tok, bai ol man i no ken putim yau gut long tok bilong yu, na tok bilong yu i no ken givim gutpela save long ol.
7 I gat tripela pasin nogut bilong toktok: (1) Sampela man i save kolim kranki ol tok. (2) Na sampela i hambak na i kolim narapela kain. (3) Na sampela i sotim ol wan wan tok, olsem kalapim sampela hap bilong en.
8 Taim brata i mekim tok, sapos em i kolim kranki sampela tok, bihain wasman bilong Skul i ken toktok wantaim em na givim liklik tok long em. Sapos man i no redim gut tok, em bai popaia nabaut na kolim kranki planti tok.
9 Taim wasman bilong Skul i tokim wanpela brata long kolim stret ol tok, em i no ken tokim brata long bihainim pasin bilong wasman yet na kolim ol tok. Sampela tok yumi ken kolim long narapela narapela pasin.
10 Sapos yu laik kolim stret ol tok, yu ken tokim narapela man na yu ken kaunim tok na em i ken harim, na taim yu kolim kranki sampela tok em i ken pasim yu na yu ken wok long stretim. Putim yau gut long tok bilong ol man ol i save gut long kolim tok, na bihainim pasin bilong ol.