Pasin Bilong Yu Yet

TAIM yu bihainim pasin bilong yu yet long mekim toktok, dispela i save helpim ol man long bilipim tok bilong yu. Olsem wanem? Bai yu bilipim tok bilong wanpela man yu save olsem em i laik haitim pasin tru bilong em? Nogat, a? Olsem na taim yu toktok, bihainim pasin bilong yu yet.

Taim yu toktok long pasin bilong yu yet, i no olsem yu toktok nating. Nogat. No ken sakim ol lo bilong tok ples, kolim kranki ol tok, o yu no kolim klia ol tok. No ken kolim olkain tok olsem yumi save harim long rot. Olgeta taim yumi laik mekim gutpela tok na pasin ol man inap givim biknem long en. Man i mekim kain pasin olsem, em i no hambak long mekim tok na em i no tingting planti tumas long ol narapela i ting olsem wanem long em.

Long Wok Autim Tok. Taim yu laik autim tok long man long haus o long wanpela pablik ples, olsem wanem? Yu save pret liklik? Yumi olgeta i pilim olsem, tasol sampela i pilim moa yet. Pret bai mekim na krai bilong nek bai i go antap liklik, na guria, o man bai wokim han na het long pasin i kamapim olsem em i pret liklik.

I gat kain kain as na pablisa i bungim dispela hevi. Ating em i tingting, man bai ting olsem wanem long em o ol man bai laikim tok em i kamapim o nogat. Dispela tingting i save kamap, tasol hevi i kamap taim yumi tingting planti long en. Sapos yu save pret taim yu laik autim tok, yu ken mekim wanem? Redim gut tok yu laik mekim na beten strong long Jehova. (Ap. 4:29) Tingim bikpela pasin marimari Jehova i kamapim taim em i singautim ol man long kisim laip oltaim long Paradais na no gat sik. Tingim ol man yu laik helpim ol na ol i mas harim gutnius.

Na tingim tu olsem: Ol man i stap fri long skelim na makim ol samting ol i laik mekim, olsem na ol i ken harim o sakim tok yumi autim. Em i wankain long taim Jisas i autim tok long Israel. Wok bilong yu em bilong autim tok, em tasol. (Mt. 24:14) Maski ol man i no larim yu long toktok, taim yu stap na mekim dispela wok, dispela yet i autim tok long ol. Na yu bai mekim gut dispela wok, long wanem, yu larim Jehova i mekim wok long yu long kamapim laik bilong em. Tasol taim yu gat rot long toktok wantaim ol man, bai yu kamapim wanem kain tok? Sapos yu lain long tingim ol samting ol narapela man i mas kisim, ol man bai laikim tok bilong yu na bai yu toktok long pasin bilong yu yet.

Taim yu autim tok long ol man, na yu toktok long wankain pasin olsem yu save mekim long olgeta de, dispela bai helpim ol long i stap bel isi. Na tu, ating ol bai i laik moa long harim ol tok bilong Baibel yu laik kamapim. No ken mekim olsem yu givim tok long ol​—mobeta yu toktok wantaim ol. Mekim pasin pren. Soim olsem yu tingim ol, na yu laik harim tingting bilong ol. Sapos tok ples o pasin bilong ples i makim sampela pasin yu mas bihainim bilong soim rispek taim yu toktok wantaim ol man yu no save long ol, orait i gutpela long mekim olsem. Tasol olgeta taim yu ken redi long smail long ol.

Long Pletfom. Taim yu toktok long wanpela lain, i gutpela long bihainim pasin bilong yu yet na mekim tok olsem yu toktok wantaim wanpela man. Tasol taim bikpela lain i bung, nek bilong yu i mas strong moa. Sapos yu putim long tingting olgeta wan wan tok yu laik mekim o yu raitim planti tok, ating bai yu tingting tumas long ol wan wan tok yu bai kolim. Em i bikpela samting long kolim ol tok i stret, tasol taim yu tingting tumas long dispela, orait tok yu mekim bai kamap olsem yu gat pasin antap. Yu no bihainim pasin bilong yu yet. Skelim gut pastaim ol tingting yu laik kamapim, tasol tingim gut ol as tingting yu laik kamapim, ol wan wan tok yu bai kolim nogat.

I wankain tu taim ol i mekim inteviu wantaim yu long wanpela miting. Redi gut, tasol no ken ritim o putim long tingting olgeta wan wan tok yu bai bekim. Taim yu toktok, bihainim stretpela pasin bilong senisim nek na bai ol man i amamas long ol tok yu mekim.

Sapos yu mekim tok long pasin i gutpela tru, tasol yu strong tumas long mekim olsem, ol man bai ting em i no gutpela tumas. Olsem: Yu mas kolim klia na kolim stret ol tok, tasol no ken mekim long wanpela pasin i olsem yu hambak. Pasin bilong wokim han bilong strongim tok o bilong stori long wanpela samting, em inap mekim tok bilong yu i kamap gutpela moa, tasol sapos ol masol bilong yu i tait taim yu tromoi han o yu tromoi han nabaut nabaut, dispela bai mekim na ol man i no putim gut yau long tok yu mekim. Strong bilong nek i mas stret long ol man i ken harim, tasol no ken antap tumas. Em i gutpela long givim bel long mekim tok, tasol no ken hambak na mekim. Yu no ken mekim pasin bilong senisim nek, givim bel, na kamapim tingting bilong bel long wanpela pasin i save kirapim ol man long tingim yu o long pasin i mekim na bel bilong ol i no stap isi.

Em i pasin bilong sampela long kolim stret tru olgeta liklik liklik tok, maski ol i mekim wanpela tok o ol i toktok nating. Na pasin bilong sampela i olsem ol i toktok wantaim narapela. Bikpela samting em bilong bihainim stretpela pasin bilong toktok long olgeta de na bihainim pasin Kristen long wokabaut bilong yu. Orait, taim yu stap long pletfom, bai i no hatwok long toktok na mekim ol samting long pasin bilong yu yet.

Taim Yu Ritim Tok Long Pletfom. I hatwok long bihainim pasin bilong yu yet na ritim tok long ai bilong ol man. Bilong mekim olsem, yu mas luksave long ol as tingting bilong tok yu bai ritim, na kisim save long olsem wanem ol i kamapim ol dispela as tingting insait long tok. Tingim gut ol dispela as tingting; sapos yu no tingim, bai yu ritim ol tok tasol. Skelim pasin bilong kolim stret ol tok yu no save long en. Ritim ritim dispela tok long maus bambai krai bilong nek bilong yu i stret, na bilong bungim ol tok long pasin em i kamapim klia tingting bilong ol dispela tok. Mekim planti taim inap long tok yu ritim i ron gut. Save gut long ol dispela tok bambai taim yu ritim long maus, rit bilong yu bai kamap olsem toktok bilong man i givim bel long toktok wantaim narapela. Dispela em i pasin bilong toktok taim yu toktok nating wantaim ol man.

Planti tok yumi ritim long ol man, yumi save ritim long ol buk samting i kamapim tok bilong Baibel. Yumi save ritim tok ol i makim yumi long ritim long Skul Tiokratik, na yumi ritim ol skripsa taim yumi autim tok na taim yumi sanap long pletfom na mekim ol tok. Ol i makim ol brata long ritim tok yumi skelim long Stadi Wastaua na long Buk-Stadi Bilong Kongrigesen. Sampela brata i gat save ol i kisim asainmen bilong ritim ol tok manuskrip long ol kibung. Maski yu ritim Baibel o narapela buk samting, taim yu ritim tok i gat mak olsem em i tok bilong wanpela man, orait ritim long pasin i save mekim ol man i pilim tru dispela tok. Sapos buk i kamapim tok bilong sampela man, orait senisim nek liklik bilong makim ol wan wan man. Wanpela toksave: No ken bilasim tok tumas, tasol yu laik ritim long wanpela pasin i save kirapim bel na tingting bilong ol man.

Kain pasin olsem bilong ritim tok i olsem man i toktok wantaim narapela, na em i bilipim tru tok em i ritim.