STADI 28
Mekim Olsem Yu Toktok Wantaim Man
OL MAN i save stap bel isi taim ol i toktok wantaim ol pren. Wantu ol i save kamapim ol tok i stap long tingting. Sampela i mekim save toktok; sampela i stap isi na toktok. Tasol taim ol i mekim olsem ol man i save laikim.
Taim yu kirap toktok wantaim wanpela man yu no save long em, i no stret long toktok long em olsem yu save gut long em. Long sampela ples i gat ol pasin yu mas bihainim taim yu kirap toktok wantaim man yu no save long em. Taim yu soim pinis olsem yu rispektim dispela man, orait nau yu ken skelim gut ol samting na kirap toktok olsem yu save liklik long em.
Taim yu sanap long pletfom na mekim tok, long dispela taim tu yu mas was gut. Sapos yu mekim tok long pasin i olsem yu toktok nating wantaim wanpela man, dispela i no inap litimapim ol miting Kristen na ol man bai ting ol tok yu kamapim i no bikpela samting. Long sampela tok ples, yu mas kolim sampela kain tok taim yu toktok long wanpela lapun, tisa, bikman, o papamama. (Lukim ol kain tok olsem i stap long Aposel 7:2 na 13:16.) Yu mas kolim ol narapela kain tok taim yu toktok long poroman marit o wanpela gutpela pren bilong yu. Tru, taim yumi sanap long pletfom na mekim tok yumi no gat wok long bihainim stret tru olgeta lo bilong kolim tok, tasol tok bilong yumi i mas soim rispek long ol man i harim tok bilong yumi.
Tasol i gat sampela samting inap mekim na pasin bilong man long kamapim tok i kain olsem em i ritim wanpela buk tasol. Wanpela samting inap mekim, em pasin bilong raitim ol sentens. Taim man bilong mekim tok i traim long kolim stret tok i stap long wanpela buk, tok i no inap kamap gutpela tumas. Tok bilong ol buk i narapela kain long ol tok yu bai kolim taim yu toktok. Tru, taim yu redim tok yu wok long painim save insait long ol buk. Ating ol i givim yu wanpela autlain ol i prinim na dispela em i as bilong tok. Tasol sapos yu kamapim tok i wankain stret olsem ol tok i stap insait long wanpela buk o yu ritim tasol ol tok i stap long autlain, tok bilong yu bai i no olsem yu toktok wantaim man. Bilong mekim tok long pasin olsem yu toktok wantaim man, yu mas kamapim ol tingting long tok bilong yu yet na no ken kolim ol longpela sentens i hatwok long kisim gut.
Narapela samting bilong skelim em spit bilong toktok. Taim yu mekim tok na i olsem yu ritim tasol long buk, ol tok yu mekim bai bihainim wankain spit tasol, na longpela bilong malolo yu mekim namel long ol tok bai wankain. Taim yu toktok wantaim narapela, yu save senisim spit bilong toktok, na longpela bilong ol malolo i no wankain.
Taim yu toktok long wanpela bikpela lain, yu mas mekim tok olsem yu toktok wantaim narapela na apim nek na kolim strong ol tok long pasin i soim olsem yu givim bel long mekim tok. Long dispela rot ol man bai putim gut yau.
Bilong mekim tok olsem yu toktok wantaim narapela na i stret long wok autim tok, yu mas wok long bihainim ol gutpela pasin bilong toktok long olgeta de. Bilong mekim olsem, i no olsem yu mas winim bikpela skul. Tasol em i gutpela long kamapim ol gutpela pasin bilong toktok i save kirapim ol man long putim gut yau na rispektim tok yu mekim. Tingim dispela na skelim olsem: Taim yu mekim toktok long olgeta de, yu gat wok long stretim sampela tok, i stret wantaim ol tok i stap long lista daunbilo o nogat.
No ken kolim ol tok i save kalapim ol lo bilong kolim tok ples o inap makim yu olsem yu insait long wanpela lain i no save bihainim ol lo bilong God. Bihainim tok kaunsel i stap long Kolosi 3:8, na no ken mekim ol tok bilong strit o ol tok doti. Tasol i no gat rong long kolim ol tok ol man i save mekim long olgeta de na i stret long mekim.
No ken kolim wankain tok long olgeta taim bilong kamapim ol narapela narapela tingting bilong yu. Lain long kolim ol tok i kamapim klia samting yu stori long en.
No ken kolim sampela tok na wantu kolim gen. Pastaim tingim gut tok yu laik mekim; nau kirap toktok.
No ken kolim planti tok tumas na i olsem ol dispela tok i haitim ol gutpela tingting yu kamapim. Kisim pasin bilong kolim klia ol bikpela tok ol man i mas tingim na kolim dispela tok insait long wanpela sentens i no hatwok long kisim.
Mekim toktok long pasin i soim olsem yu tingim tru ol narapela.