Askim

◼ Bilong wanem em i gutpela long ol man i harim tok ol i lukim ol skripsa taim brata i mekim tok i askim ol long mekim olsem?

Tok i stori long wanem samting, na dispela tok i bilong skelim olgeta wan wan ves bilong wanpela hap bilong Baibel o nogat, ol dispela samting bai makim hamas skripsa brata bilong mekim tok bai askim ol man long lukim.

Em i bikpela samting long tingim olsem wanpela as bilong kaunim ol skripsa em bilong kamapim klia olsem ol tok i kam long Baibel. (Ap 17:11) Narapela as em bilong skelim ol skripsa wantaim tok brata i mekim bambai tok i ken strongim bilip bilong olgeta man i harim tok. Pasin bilong lukluk long tok bilong Baibel taim brata i kaunim wanpela skripsa bai helpim ol long tingim gut dispela tok. Na tu, pasin bilong raitim sampela tok long notbuk na putim gut yau long ol tok brata i kamapim bai helpim ol.

Ol autlain em Sosaiti i bin wokim i gat planti skripsa bilong strongim tok, tasol ol dispela skripsa i bilong helpim man i mekim tok long redim tok bilong em. Ol dispela skripsa bai helpim em long kisim sampela save moa long dispela tok na i helpim em long kisim gut as tingting bilong skripsa, na helpim em long save gut long dispela tok i stori long wanem samting. Brata i mekim tok i skelim wanem ol skripsa i gutpela long helpim dispela tok, na em i ken tokim ol man i harim tok long lukluk long skripsa taim em i kaunim na stori long en. Em i ken kolim o kamapim tasol ol tok bilong ol narapela skripsa ol i putim bilong helpim tok, na ol man i harim tok i no gat wok long lukim ol dispela skripsa.

Taim brata i mekim tok i kaunim ol skripsa, em i mas kaunim long Baibel stret, em i no ken kaunim long pepa ol i prinim long kompiuta. Taim em i askim ol man i harim tok long lukluk long Baibel taim em i kaunim skripsa, em i mas kolim gut nem bilong buk bilong Baibel, sapta, na ves. Em i ken malolo liklik na mekim wanpela askim o stori liklik long as na ol i kaunim dispela skripsa, na long dispela rot ol man i harim tok ol bai gat taim long painim dispela skripsa. Na tu, taim em i kolim gen sapta na ves ol man i harim tok ol bai tingim dispela skripsa. Tasol em i no gutpela long kolim namba bilong pes, long wanem, ol man i harim tok ol i save mekim wok long narapela narapela Baibel. Taim ol man i harim tok i lukim ol skripsa em brata i mekim tok i tokim ol long en, dispela bai helpim ol long pilim strong bilong Tok Bilong God.​—⁠Hi 4:12.