Kirapim Man Long Lukim Baibel

YUMI laik stiaim tingting bilong ol man i go long tok bilong Baibel. Dispela buk holi em i as bilong ol tok yumi autim, na yumi laik bai ol manmeri i save olsem tok yumi autim i no kamap long tingting bilong yumi yet, nogat, dispela tok i kam long God. Ol manmeri i mas kisim pasin bilong bilip long Baibel.

Long Taim Bilong Autim Tok. Taim yu wok long redi long mekim wok autim tok, makim wanpela o sampela skripsa yu laik stori long en long ol man i laik harim tok. Maski yu tingting long autim sotpela tok tasol na tilim ol buk samting i stori long Baibel, em i gutpela long ritim wanpela ves bilong Baibel i stret long samting yu toktok long en. Tok bilong Baibel i gat bikpela strong bilong stiaim ol man i olsem sipsip, winim ol tok yumi yet inap mekim. Sapos yu no inap ritim tok long Baibel, gutpela long kolim sampela tok bilong en. Taim Jisas i stap long graun i no gat planti kopi bilong Ol Skripsa Hibru i stap. Tasol Jisas na ol aposel i bin kolim planti tok bilong Ol Skripsa Hibru. Em i gutpela sapos yumi tu i putim ol skripsa long tingting na taim yumi autim tok yumi ken kolim ol dispela skripsa long taim i stret long mekim olsem.

Taim yu inap ritim Baibel long man, orait holim Baibel na bai man bilong haus i ken bihainim tok yu ritim. Sapos man bilong haus i lukim ol dispela tok long Baibel bilong em yet, ating em bai laikim moa tok em i ritim.

Tasol sampela man bilong tanim tok bilong Baibel ol i bin bihainim tingting bilong ol yet taim ol i mekim wok bilong ol. Tok ol i tanim i no wankain olgeta olsem ol tok i stap long Baibel ol man i bin raitim long ol tok ples bilong pastaim. Long planti nupela Baibel ol i rausim nem bilong God yet, na paulim ol tok i stori long i stap bilong ol man i dai pinis, na haitim tok Baibel i kamapim long laik bilong God long dispela graun. Bilong soim man long wanem samting ol i bin mekim, ating yu mas soim em wankain skripsa long ol narapela narapela Baibel o long ol Baibel ol i bin tanim long dispela wankain tok ples long bipo. Buk Toktok Gut i save kamapim ol tok ol narapela narapela Baibel i mekim long sampela bikpela tok ol man i save kamapim planti taim. Ol man i save laikim tru tok i tru bai ol i amamas long kisim dispela save.

Long Ol Miting Bilong Kongrigesen. Ol brata i laik kirapim yumi olgeta long yusim Baibel bilong yumi long ol miting bilong kongrigesen. Dispela i save mekim kain kain gutpela wok. Em i save helpim odiens long putim gut yau long ol tok i kamap. Ol inap lukim long ai ol samting man bilong mekim tok i kolim long maus na dispela i save strongim tok em i mekim. Na dispela inap helpim ol nupela man long save olsem, tru tru Baibel em i as bilong ol bilip bilong yumi.

Bilong odiens i ken lukim Baibel bilong ol yet taim yu ritim tok bilong en, bikpela samting em yu mas kirapim ol long mekim olsem. Nambawan pasin bilong mekim olsem, em bilong tokim ol long opim Baibel.

Em i samting bilong yu long makim wanem ol ves yu ting em i bikpela tok na yu laik tokim odiens long opim Baibel na lukim. Em i gutpela long ritim ol skripsa i save helpim ol bikpela tok yu laik kamapim. Orait, skelim gut taim na kamapim sampela skripsa moa bilong helpim dispela tingting yu laik kamapim.

Sapos yu kolim tasol buk, sapta na ves o tokim odiens long painim dispela skripsa long Baibel, ating planti taim dispela tasol i no inap. Sapos yu ritim pinis wanpela skripsa na taim ol i no painim yet yu kolim narapela skripsa, kwiktaim ol man bai les na ol i no wok moa long ritim ol skripsa taim yu kolim. Lukluk gut. Wet inap planti man ol i painim pinis skripsa, orait nau ritim.

Tingting pastaim. Kolim skripsa paslain liklik long taim yu laik ritim. Long dispela rot bikpela hap taim i no lus nating long wetim ol man i painim skripsa yu kolim. Tru, yu no inap kamapim planti stori taim yu larim odiens i painim ol skripsa, tasol taim yu mekim olsem, dispela bai helpim ol tru.