Kamapim Gut Ol Skripsa

BAIBEL i as bilong ol tok ol i skulim yumi long en long ol miting. Na tu, ol skripsa bilong Baibel i as bilong ol tok yumi mekim taim yumi autim tok. Tasol pasin bilong yumi long kamapim gut ol dispela skripsa, dispela yet i mekim na ol skripsa i helpim tru tok bilong yumi o nogat.

Yu no ken kolim buk, sapta na ves tasol bilong wanpela skripsa na tokim man long ritim dispela skripsa wantaim yu. Nogat. Taim yu kamapim wanpela skripsa, i gat tupela samting yu mas traim long mekim, olsem: (1) Kirapim laik bilong ol long harim dispela skripsa, na (2) stori gut long as na yu laik ritim dispela skripsa. I gat kain kain rot long mekim olsem.

Kamapim Wanpela Askim. Dispela pasin i save wok gut taim ol man i no save long bekim bilong askim. Givim kain askim i save kirapim tingting bilong ol man. Jisas i bin mekim olsem. Taim ol Farisi i kam long Jisas long tempel na long ai bilong ol manmeri ol i laik traim save bilong em long ol tok bilong Baibel, Jisas i askim ol olsem: “Yupela i ting wanem long dispela man God i makim bilong kisim bek ol manmeri bilong en? Em i pikinini bilong husat?” Ol i bekim olsem: “Pikinini bilong Devit.” Nau Jisas i askim ol olsem: “Orait olsem wanem na Holi Spirit i givim tingting long Devit na Devit i kolim dispela man ‘Bikpela’?” Orait nau Jisas i kolim tok bilong Song 110:1. Dispela i pasim maus bilong ol Farisi. Tasol ol manmeri i bung i stap ol i amamas long harim ol tok bilong Jisas.​—Mt. 22:​41-46.

Taim yu mekim wok autim tok, ating yu ken kamapim ol dispela kain askim bilong kirapim tok, olsem: “Yumi gat nem bilong yumi yet, a? Yu ting God tu i gat nem bilong em yet? Yumi ken painim bekim bilong dispela askim long Song 83:18.” (Ritim dispela ves long Baibel New World Translation.) “Yu ting bihain bai i gat wanpela gavman tasol bilong bosim olgeta man? Lukim bekim bilong dispela long Daniel 2:44.” “Olsem wanem? Baibel i save stori long ol samting i wok long kamap long taim bilong yumi? Orait putim yau long tok bilong 2 Timoti 3:​1-5 na skelim wantaim ol samting yu yet yu lukim i kamap long nau.” “Olsem wanem? Yu ting bai i gat pinis bilong pen na i dai? Yumi ken painim bekim i stap long Baibel long Kamapim Tok Hait 21:​4, 5.”

Taim yu mekim tok, sapos yu mekim gutpela wok long ol askim yu givim bilong kirapim odiens long lukim ol skripsa, dispela inap kirapim laik bilong ol long lukim gut dispela skripsa, maski em i wanpela skripsa ol i save gut long en. Tasol bai ol i mekim olsem? Ol bai mekim sapos yu kamapim ol askim ol yet i save tingim tru. Maski ol i gat laik long harim stori yu kamapim, tingting bilong ol inap wokabaut taim yu ritim ol skripsa ol i bin harim planti taim. Bilong dispela samting i no ken kamap, yu mas tingim gut ol tok yu laik kamapim na bai ol man i gat laik long harim.

Stori Long Wanpela Hevi. Yu ken stori long wanpela hevi na tokim ol long skelim wanpela skripsa i stori long sampela samting bilong stretim dispela hevi. No ken kirapim ol man long bilip olsem dispela skripsa bai stretim olgeta samting bilong dispela hevi. Nogat. Planti taim wanpela skripsa i save kamapim sampela hap tok tasol bilong stretim wanpela hevi. Tasol ating yu ken askim odiens long putim gut yau taim yu ritim dispela skripsa na tingim olsem wanem dispela skripsa inap helpim ol long karim dispela hevi.

Na tu, ating yu ken kolim wanpela stiatok bilong pasin God i laikim na kamapim wanpela stori bilong Baibel bilong soim olsem em i savepasin long bihainim dispela stiatok. Taim wanpela skripsa i gat tupela o tripela tok i stori stret long samting brata i toktok long en, orait sampela brata i save tokim odiens long putim gut yau bilong harim ol dispela tok. Sapos i hatwok tumas long ol man long kisim stretpela bekim long samting yu stori long en, orait yu ken kirapim tingting bilong ol olsem: Kamapim kain kain bekim na larim skripsa yet na mining bilong en i kamapim stretpela bekim.

Kamapim Olsem Baibel i As Bilong Tok Yu Mekim. Sapos yu kirapim pinis tingting bilong ol man long tok yu laik mekim na yu kolim pinis wanpela o sampela tingting long samting yu laik stori long en, orait ating yu ken tok olsem: “Lukim tok Baibel i mekim long dispela samting.” Dispela i soim ol long as na tok yu laik ritim i gat strong.

Jehova i bin yusim ol man olsem Jon, Luk, Pol, na Pita bilong raitim hap bilong Baibel. Tasol ol i man bilong raitim tok tasol; Jehova yet em i Man bilong kamapim ol dispela tok. Taim yu toktok wantaim ol man ol i no save stadi tumas long Baibel, sapos yu tok olsem “Pita i tok” o “Pol i tok,” ating dispela tok bai i no gat bikpela strong. Olsem na, mobeta yu mekim wanpela tok i kamapim klia olsem tok yu ritim em i Tok Bilong God. Taim Jeremaia i mas mekim sampela bikpela tokaut, sampela taim Jehova i bin tokim em long kirapim tok olsem: “Putim yau gut long dispela tok bilong mi, Bikpela.” (Jer. 7:2; 17:20; 19:3; 22:2) Maski yumi kolim nem Jehova taim yumi laik kamapim ol skripsa o nogat, yumi laik tokim ol man olsem olgeta tok i stap long Baibel em i tok bilong em.

Tingim Ol Skripsa i Stap Klostu. Yu mas save gut long stori bilong ol ves i stap klostu long skripsa yu laik kamapim. Sampela taim bai yu kamapim stret dispela stori; tasol stori ol skripsa i stap klostu i kamapim inap stiaim ol tok yu bai mekim. Olsem: Olsem wanem? Sapos yu laik kamapim ol skripsa i stori long tok bilong gutpela man Jop, bai yu mekim wankain tok olsem yu bai mekim taim yu laik stori long wanpela pren giaman bilong em? Luk i bin raitim Buk Aposel, tasol em i kamapim tok bilong Jems, Pita, Pol, Filip, Stiven, sampela ensel, Gamaliel na sampela narapela Juda ol i no Kristen. Orait bai yu tok husat i bin mekim tok bilong dispela skripsa yu kolim? Tingim, Devit i no bin raitim olgeta tok bilong Buk Song, na Solomon i no bin raitim olgeta tok bilong Buk Sindaun. Sapos yumi save olsem man bilong raitim Baibel i toktok long husat na em i toktok long wanem samting, dispela bai helpim yumi.

Yusim Save Yu Kisim Long Ol Samting i Bin Kamap. Dispela bai mekim gutpela wok tru sapos yu inap soim olsem samting i bin kamap long taim bilong Baibel i wankain olsem samting yu stori long en. Sampela taim yu mas save long ol samting i bin kamap bilong kisim gut mining bilong wanpela skripsa. Sapos yu laik kamapim Hibru 9:​12, 24 long wanpela tok yu mekim long pe bilong baim bek ol man, ating yu mas stori liklik pastaim long rum i stap insait tru long haus lotu sel, na dispela skripsa i soim olsem dispela rum i makim ples Jisas i bin go long en taim em i go long heven. Tasol no ken kamapim planti stori tumas long ol samting i bin kamap na ol man bai tingim tumas dispela stori na ol i no tingim skripsa yu laik kamapim.

Bilong yu ken kamap gutpela moa long pasin bilong kamapim ol skripsa, skelim pasin ol man i save gut long mekim tok ol i save bihainim. Lukim ol narapela narapela pasin ol i save bihainim. Skelim ol dispela pasin​—olsem wanem ol i wok gut. Taim yu redim ol tok bilong yu, luksave long ol bikpela skripsa, na tingim wanem wok yu laik bai ol dispela skripsa i mas mekim. Tingting gut long ol tok yu laik mekim bilong kamapim gut ol dispela skripsa na bai yu mekim gutpela wok long ol. Bihain, mekim olsem long olgeta skripsa yu kamapim. Taim yu mekim gut dispela wok, bai yu kirapim ol man long tingim Tok Bilong God em i bikpela samting.