Skulim Ol Narapela Long Dispela Gutpela Tok Ples
1 Maski ol i bilong planti ‘lain, kantri, skin, na tok ples,’ ol Witnes Bilong Jehova i stap wanbel, ol i wanpela bikpela lain brata i stap long olgeta hap. (KTH 7:9) Em i narapela kain samting tru long dispela taim nau bilong ol lain man i bruk na stap birua birua. Olsem wanem yumi inap i stap wanbel olsem? Long wanem, yumi bin kisim save long “wanpela gutpela tok ples.”—Sef. 3:9, NW.
2 Ol Gutpela Samting i Kamap: Dispela gutpela tok ples em wanem samting? Em i stretpela save yumi kisim long tok i tru i stap long Baibel, olsem yumi save long Jehova na long ol samting em i tingting pinis long mekim, na moa yet em save yumi kisim long tok i tru bilong Kingdom bilong God. Olsem Jisas i bin tok profet, dispela tok i tru i save kam long rot bilong wanpela lain i stap long graun, em “wokboi i gat gutpela tingting,” dispela i mekim na “ol manmeri bilong ol longwe ples” ol i wok long kisim lotu i tru.—Mt. 24:45; Sek. 8:23.
3 Taim ol man i kisim save long dispela gutpela tok ples, dispela i save kirapim ol long stretim sindaun bilong ol na bai ol i bihainim ol lo bilong Jehova. Ol i lain long “stap wanlain tru long wankain tingting na wankain laik.” (1 Ko. 1:10) Oltaim tok bilong God i helpim ol long kamapim stretpela pasin na mekim ol tok i gutpela na i tru, na moa yet long taim ol i autim gutnius long ol narapela. (Ta. 2:7, 8; Hi. 13:15) Ol dispela gutpela senis i givim biknem long Jehova.
4 Olsem: Wanpela Witnes i bin bungim wanpela man i gat planti askim, na long rot bilong Baibel em i kisim bekim bilong olgeta askim bilong em. Ol tok em i harim i kirapim em tru, na em i kirap stadi tupela taim long wik na go long ol miting. Em i kirap nogut long pasin bilong ol brata sista long tok amamas long em taim em i go long Haus Kingdom, long wanem, planti man i bung ol i bilong narapela narapela lain. Insait long sotpela hap taim, em na meri bilong em ol i senisim pasin bilong ol na ol i kisim baptais. Kirap long dispela taim na i kam, em i bin helpim planti lain inap olsem 40 long mekim wok bilong Jehova, na em i bin helpim sampela wanblut tu. Maski em i karim hevi long sampela bagarap bilong skin, i no longtaim i go pinis em i kirap mekim wok painia.
5 Skulim Ol Narapela: Ol samting i kamap long graun i kirapim planti man long skelim gen tingting na i stap bilong ol. Olsem Jisas, yumi mas i gat laik tru long helpim ol. Pasin bilong mekim gut ol gobek na Baibel-stadi, em i bikpela samting bilong helpim ol man i gat gutpela bel long kisim save long dispela gutpela tok ples.
6 Wanpela pasin i gutpela bilong helpim ol man i no gat taim, em long mekim sotpela Baibel-stadi taim yupela i sanap long dua bilong haus samting. (km 5/02 p. 1) Olsem wanem? Yu bin traim pinis dispela pasin? Taim yu redi long mekim gobek, skelim pepa yumi kisim wantaim Wok Kingdom bilong Janueri 2002 na makim wanpela tok i stret long man bilong haus. Planti tok long dispela pepa i bilong stiaim tok i go long buklet Yumi Mas Mekim Wanem? o buk Save. Lainim gut wanpela tok na bai yu inap skruim gut kirap bilong tok bilong yu i go long wanpela paragraf. Makim wanpela o tupela skripsa long paragraf na ritim na stori long en, na redim wanpela askim bilong pinisim tok. Dispela bai skruim tok i go long narapela paragraf em yu tingting long stori long en taim yu go bek gen lukim man.
7 Lain bilong Jehova i wok long kisim planti blesing, long wanem, ol i bin kisim save long dispela gutpela tok ples. I gutpela yumi wok strong long helpim ol narapela long bung wantaim yumi long “singaut long nem bilong Jehova” na “wok gut wantaim long mekim wok bilong em.”—Sef. 3:9, NW.