Yu Save Mekim Gut Dispela “Gutpela Tok Ples”?
“Long dispela taim bai mi givim wanpela gutpela tok ples long ol man, bambai olgeta i ken singaut long nem bilong Jehova.”—SEF. 3:9, NW.
1. Jehova i bin givim wanem gutpela presen long yumi?
TOK ples em i samting yumi no bin kisim long ol man, nogat, em presen yumi bin kisim long Man Bilong Wokim yumi, God Jehova. (Kis. 4:11, 12) Jehova i bin givim save long namba wan man, Adam, na bai em inap toktok na kamapim ol nupela tok tu. (Stt. 2:19, 20, 23) Dispela em i wanpela gutpela presen tru! Em i mekim na ol lain man inap toktok wantaim Papa bilong ol long heven na litimapim gutpela nem bilong em.
2. Bilong wanem ol manmeri i no mekim moa wanpela tok ples tasol?
2 Pastaim, inap 1700 yia, olgeta manmeri i bin mekim “wanpela tok ples tasol.” (Stt. 11:1) Bihain pasin bikhet i kamap long taim bilong Nimrot. Ol man i no bihainim tok bilong Jehova, na ol dispela man i sakim tok ol i bung long wanpela hap em bihain ol i kolim Babel, na ol i strong long ol i laik stap long wanpela hap tasol. Ol i kirap long wokim wanpela traipela taua bilong “litimapim nem” bilong ol yet, na i no bilong givim biknem long Jehova. Olsem na Jehova i paulim tok ples bilong ol dispela bikhetlain na mekim ol i toktok long ol narapela narapela tok ples. Dispela i mekim na ol i go nabaut long olgeta hap bilong graun.—Ritim Stat 11:4-8.
3. Wanem samting i kamap taim Jehova i paulim tok ples bilong ol bikhetman long Babel?
3 Long nau, i gat planti tausen tok ples—sampela man i tok i gat 6,800 tok ples—ol i save mekim long olgeta hap bilong graun. Bilong mekim ol dispela tok ples, ol man i mas i gat narapela narapela pasin bilong tingting. Olsem na i luk olsem taim God Jehova i paulim tok ples bilong ol dispela bikhetman, em i rausim long tingting bilong ol tok ples ol i bin mekim long bipo. Em i putim ol nupela tok long tingting bilong ol, na tu, em i senisim pasin bilong ol long tingting na em i kamapim ol nupela lo bilong tok ples. Olsem na hap dispela taua i stap long en ol i kolim “paulim,” o Babel! (Stt. 11:9, futnot) Baibel tasol i stori gut long olsem wanem ol kain kain tok ples bilong nau i bin kamap.
Nupela Gutpela Tok Ples
4. Jehova i tok profet long wanem samting bai kamap long taim bilong yumi?
4 Ating stori bilong Baibel long samting God i bin mekim long Babel em i wanpela gutpela stori, tasol samting i bikpela moa i kamap long taim bilong yumi. Long rot bilong profet Sefanaia, Jehova i tok profet olsem: “Long dispela taim bai mi givim wanpela gutpela tok ples long ol man, bambai olgeta i ken singaut long nem bilong Jehova na wok gut wantaim long mekim wok bilong em.” (Sef. 3:9, NW) Dispela “gutpela tok ples” em wanem samting, na olsem wanem yumi ken lain long mekim gut dispela tok ples?
5. Gutpela tok ples em wanem samting? Wanem samting i kamap taim ol manmeri i kirap mekim dispela tok ples?
5 Dispela gutpela tok ples em stretpela save long God Jehova na ol samting em i tingting pinis long mekim olsem em i kamapim long Tok bilong em, em Baibel. Ol samting i insait long dispela “tok ples” em stretpela save long Kingdom Bilong God na rot bilong en long stretim bek nem bilong Jehova, kamapim klia olsem i stret em i stap nambawan bos, na givim ol blesing bilong i stap oltaim long ol manmeri i stap gut long God. Wanem samting i kamap taim ol manmeri i kirap mekim dispela tok ples? Baibel i tok ol bai “singaut long nem bilong Jehova” na ol bai “wok gut wantaim long mekim wok bilong em.” Taim ol man i kirap mekim dispela gutpela tok ples, dispela i litimapim nem bilong Jehova na mekim lain bilong em i stap wanbel, tasol samting i bin kamap long Babel i no bin kamapim ol dispela gutpela samting.
Lain Long Mekim Gutpela Tok Ples
6, 7. (a) Man i mas mekim wanem ol samting bilong lainim nupela tok ples? Olsem wanem dispela i stret wantaim pasin bilong lainim gutpela tok ples? (b) Nau bai yumi skelim wanem samting?
6 Taim wanpela i kirap lainim narapela tok ples, em i mas putim long tingting ol nupela tok, tasol i gat narapela samting tu em i mas mekim. Em i mas lain long nupela pasin bilong tingting. Pasin bilong wokim tingting na ol samting ol man i lap long en i no wankain long olgeta tok ples. Bilong man i ken kolim gut ol nupela tok, em i mas yusim maus na tang samting bilong em long narapela pasin. Na i wankain taim yumi kirap lainim gutpela tok ples bilong tok i tru bilong Baibel. I no inap long yumi lainim tasol sampela bikpela tok bilong Baibel. Nogat. Bilong save gut long dispela gutpela tok ples, yumi mas stretim stretim tingting na mekim tingting i kamap nupela.—Ritim Rom 12:2; Efesus 4:23.
7 Wanem samting bai helpim yumi long kliagut long gutpela tok ples na mekim gut dispela tok ples? Taim man i lainim narapela tok ples, i gat ol samting em i ken mekim bilong helpim em long lain, na olsem tasol i gat ol samting yumi ken mekim bilong helpim yumi long mekim gut tok ples bilong tok i tru bilong Baibel. Nau yumi ken skelim sampela pasin ol man husat i lainim narapela tok ples i save bihainim, na yumi ken lukim olsem wanem ol dispela samting i ken helpim yumi long lainim gutpela tok ples.
Mekim Gut Gutpela Tok Ples
8, 9. Yumi mas mekim wanem bilong yumi ken lainim gutpela tok ples? Bilong wanem dispela i bikpela samting?
8 Putim gut yau. Ating pastaim man i no inap kliagut long tok ples em i no bin harim bipo. (Ais. 33:19) Tasol taim em i lain long putim tingting long tok em i harim, em bai kirap long save long ol wan wan tok na pasin bilong kolim tok. Na olsem tasol, Baibel i tokim yumi: “Dispela tok yumi harim pinis, yumi mas holim strong long tingting na bihainim gut. Nogut yumi slek long bihainim dispela tok na yumi lusim olgeta.” (Hi. 2:1) Planti taim Jisas i tokim ol disaipel bilong em olsem: “Man i gat yau em i mas harim dispela tok.” (Mt. 11:15; 13:43; Mk. 4:23; Lu. 14:35) Em nau, yumi mas “harim na tingim gut” ol tok yumi harim na bai yumi ken kliagut moa long gutpela tok ples.—Mt. 15:10; Mk. 7:14.
9 Bilong putim gut yau yumi mas bosim tingting, na dispela bai kamapim gutpela samting. (Lu. 8:18) Olsem wanem? Long taim bilong ol miting Kristen yumi save putim gut tingting long ol tok i kamap, o tingting bilong yumi i save wokabaut? Em i bikpela samting long yumi wok strong long bosim tingting na putim yau long ol tok i kamap. Nogut tingting bilong yumi i pas na yumi no kliagut long ol tok.—Hi. 5:11.
10, 11. (a) Yumi mas putim gut yau, tasol yumi mas mekim wanem samting moa? (b) Yumi mas mekim wanem narapela samting bilong mekim gutpela tok ples?
10 Bihainim pasin bilong ol man i save toktok gut. Ol man i lainim nupela tok ples i mas putim gut yau long ol man i save toktok gut na traim long bihainim pasin bilong ol long kolim ol tok. Dispela bai helpim sumatin na krai bilong nek bilong em i no kamap narapela kain em dispela samting inap mekim na ol man i hatwok long kliagut long tok bilong em. Na olsem tasol, yumi mas kisim skul long ol man i gat save long ‘skulim gut’ ol narapela long gutpela tok ples. (2 Ti. 4:2) Askim ol long helpim yu. Taim yu popaia, amamas long kisim ol tok bilong stretim yu.—Ritim Hibru 12:5, 6, 11.
11 Bilong mekim gutpela tok ples, yumi mas bilip long tok i tru na lainim ol narapela man long en, na tu, pasin bilong yumi i mas stret wantaim ol lo na stiatok bilong God. Bilong helpim yumi long mekim olsem, yumi mas bihainim pasin bilong ol narapela. Yumi mas bihainim pasin bilong ol long bilip na givim bel long wok. Na tu, dispela i makim olsem yumi mas bihainim olgeta wokabaut bilong Jisas. (1 Ko. 11:1; Hi. 12:2; 13:7) Sapos yumi strong long mekim olsem, dispela bai mekim na lain bilong God i stap wanbel, na ol inap mekim gutpela tok ples long wankain pasin.—1 Ko. 4:16, 17.
12. Olsem wanem pasin bilong putim ol tok long tingting i helpim man long lainim nupela tok ples?
12 Putim long tingting. Ol man i lainim nupela tok ples, ol i mas putim planti nupela samting long tingting bilong ol, olsem ol nupela tok. Pasin bilong putim ol tok long tingting i gutpela samting tru bilong helpim ol Kristen long lainim gutpela tok ples. I gutpela yumi putim long tingting ol nem bilong ol buk bilong Baibel olsem i stap long Baibel, kirap long Buk Stat i go long Buk Kamapim Tok Hait. Sampela i bin putim mak long tingim tok bilong sampela skripsa o nem bilong buk na sapta na ves bilong sampela skripsa. Sampela i putim ol singsing bilong Kingdom long tingting bilong ol, nem bilong ol lain bilong Israel na 12-pela aposel, na ol pasin em holi spirit i save kamapim. Long bipo, planti man bilong Israel i putim tok bilong ol song long tingting. Long taim bilong yumi, i gat wanpela mangi na taim em i gat 6-pela krismas tasol, em i bin kolim olgeta wan wan tok bilong 80 ves bilong Baibel. Olsem wanem? Yumi inap mekim gut moa dispela pasin bilong putim ol tok long tingting?
13. Bilong wanem pasin bilong kolim gen ol tok i bikpela samting?
13 Pasin bilong kolim gen ol tok i helpim yumi long tingim ol tok, na pasin bilong harim wankain tok planti taim i bikpela samting long skul Kristen bilong yumi. Aposel Pita i tok: “I tru, yupela i save pinis long ol dispela samting, na yupela i kisim pinis dispela tok tru, na yupela i sanap strong long en. Tasol mi no laik bai yupela i lusim tingting, olsem na olgeta taim mi laik tokim yupela gen.” (2 Pi. 1:12) Bilong wanem yumi mas kisim gen ol tok bilong kirapim tingting? Long wanem, dispela bai helpim yumi long kliagut moa long ol tok, mekim save bilong yumi i go bikpela, na strongim tingting bilong yumi long bihainim tok bilong Jehova. (Sng. 119:129) Pasin bilong tingim gen ol lo na stiatok bilong God i helpim yumi long skelim yumi yet na long sakim pasin bilong “harim nating tasol.” (Jem. 1:22-25) Sapos yumi no wok long kirapim yumi yet long tingim tok i tru, ol narapela samting bai pulim bel na tingting bilong yumi na yumi no inap mekim gut moa gutpela tok ples.
14. Wanem samting bai helpim yumi taim yumi stadi long gutpela tok ples?
14 Ritim na kolim long maus. (KTH 1:3) Bilong lainim nupela tok ples, sampela sumatin i save stap wanpis na ritim tasol ol buk long tingting. Dispela i no helpim ol tumas long lainim nupela tok ples. Taim yumi stadi long gutpela tok ples, ating sampela taim yumi mas ritim na “kolim isi ol tok” bilong helpim yumi long tingim gut ol tok yumi stadi long en. (Ritim Song 1:1, 2.a) Dispela bai mekim na ol tok yumi ritim bai stap long tingting bilong yumi. Long tok Hibru, dispela tok ‘ritim na kolim isi ol tok’ i poroman wantaim pasin bilong tingim tingim long bel ol tok. Bel i mas brukbrukim kaikai na bai yumi kisim ol gutpela marasin samting i stap long kaikai, na olsem tasol yumi mas tingim tingim long bel ol tok yumi ritim na bai yumi ken kliagut long en. Olsem wanem? Yumi lusim hap taim bilong tingim tingim long bel ol tok yumi stadi long en? Taim yumi ritim pinis sampela hap bilong Baibel, yumi mas tingim tingim ol tok yumi bin ritim.
15. Olsem wanem yumi ken stadi long “ol lo” bilong gutpela tok ples?
15 Skelim ol lo bilong tok ples. Taim yumi lainim nupela tok ples, em i gutpela long stadi long ol lo bilong tok ples, o pasin bilong bungim ol tok wantaim. Dispela i helpim yumi long kliagut long pasin bilong mekim dispela tok ples, na yumi inap toktok gut na kolim stret. Tok ples i gat pasin bilong bungim ol tok, na olsem tasol gutpela tok ples bilong tok i tru bilong Baibel i gat pasin bilong bungim “ol dispela gutpela tok.” (2 Ti. 1:13) Yumi mas bihainim dispela pasin.
16. Yumi mas winim wanem samting? Olsem wanem yumi ken winim?
16 Wok yet long lainim. Man inap lainim nupela tok ples inap long em i ken toktok liklik, tasol bihain em i no lainim moa. Wankain samting inap kamap long ol man i mekim gutpela tok ples. (Ritim Hibru 5:11-14.) Wanem samting inap helpim yumi long winim dispela samting? Yumi mas redi long lainim sampela tok moa. Baibel i tok: “Orait yumi no ken toktok tasol long ol skul yumi save kisim pastaim long tok bilong Krais. . . . Yumi no ken skruim planti toktok long pasin bilong tanim bel na bilip long God na givim baksait long olgeta pasin i no gat laip tru long en, na long ol kain kain pasin bilong kisim baptais na long pasin bilong putim han antap long ol man. Na yumi no ken mekim planti toktok long ol man i dai pinis ol bai i kirap bek, na long yumi olgeta i mas sanap long kot bilong God, na long em bai i tok long yumi bai i kisim gutpela laip o yumi bai i kisim pe nogut bilong oltaim oltaim.”—Hi. 6:1, 2.
17. Bilong wanem em i bikpela samting long stadi oltaim long Baibel? Stori long dispela.
17 Makim taim bilong stadi. I gutpela moa long stadi planti taim inap sotpela hap taim, winim pasin bilong mekim longpela stadi long wan wan taim tasol. Mekim stadi long taim tingting bilong yu i wok gut na i no gat ol samting inap pulim tingting bilong yu. Wok bilong lainim nupela tok ples em olsem man i wokim rot long bikbus. Taim em i wokabaut i go i kam planti taim long dispela rot, nau i no hatwok tumas long wokabaut long en. Sapos man i no wokabaut long dispela rot inap longpela taim, i no longtaim na bus bai karamapim rot. Olsem na em i bikpela samting long wok oltaim na no ken givap! (Dan. 6:16, 20) Beten na ‘was gut oltaim na no ken malolo’ long mekim gutpela tok ples bilong tok i tru bilong Baibel.—Ef. 6:18.
18. Bilong wanem yumi mas mekim gutpela tok ples long olgeta taim rot i op?
18 Toktok! Toktok! Toktok! Sampela man husat i wok long lainim nupela tok ples ol i surik long toktok, long wanem, ol i sem o ol i pret long ol bai popaia long kolim ol tok. Dispela bai mekim na ol i no inap lainim tok ples. Bilong lainim nupela tok ples, em i bikpela samting long prektis. Taim sumatin i toktok planti taim long nupela tok ples, em bai isi moa long em long mekim dispela tok ples. Na olsem tasol, yumi mas mekim gutpela tok ples long olgeta taim rot i op. Baibel i tok: “Long bel yumi save bilip na God i kolim yumi stretpela manmeri. Na long maus yumi save autim bilip bilong yumi na God i kisim bek yumi.” (Ro. 10:10) Yumi “autim bilip” bilong yumi taim yumi kisim baptais, na tu, taim yumi toktok wantaim ol man long Jehova long olgeta taim rot i op, em wok autim tok tu i insait long en. (Mt. 28:19, 20; Hi. 13:15) Long ol miting Kristen bilong yumi, yumi inap mekim gutpela tok ples na kamapim ol sotpela tok i klia.—Ritim Hibru 10:23-25.
Stap Wanbel na Yusim Gutpela Tok Ples Bilong Litimapim Nem Bilong Jehova
19, 20. (a) Ol Witnes Bilong Jehova long nau i mekim wanem samting em yumi kirap nogut long en? (b) Yu tingting strong long mekim wanem?
19 Ating bai yumi amamas tru sapos yumi bin stap long Jerusalem long Sande moning, Sivan 6, long yia 33 C.E.! Long moningtaim, paslain long 9 klok, ol lain i stap long rum antap ol i “stat long mekim tok long ol kain kain tok ples.” (Ap. 2:4) Long nau, ol wokboi bilong God i no kisim presen bilong mekim kain kain tok ples. (1 Ko. 13:8) Tasol maski i olsem, ol Witnes Bilong Jehova i save autim gutnius bilong Kingdom long winim 430 narapela narapela tok ples.
20 Yumi amamas tru olsem maski yumi save mekim wanem wanem tok ples, yumi olgeta i wanbel long mekim gutpela tok ples bilong tok i tru bilong Baibel! Dispela i narapela kain long samting i bin kamap long Babel. Yumi lain bilong Jehova i litimapim nem bilong em na i olsem yumi mekim long wanpela tok ples tasol. I olsem lain bilong Jehova i mekim wanpela tok ples bilong litimapim nem bilong em. (1 Ko. 1:10) Gutpela sapos yumi tingting strong long “wok gut wantaim” ol brata na sista bilong yumi long olgeta hap, na lain long mekim gut moa gutpela tok ples bilong givim biknem long Papa bilong yumi long heven, em Jehova.—Ritim Song 150:1-6.
[Futnot]
a Buk Song 1:1, 2 (NW): “Man i no save bihainim tok bilong ol man nogut, na em i no save stap namel long ol sinman, na em i no save sindaun wantaim ol man bilong tok bilas, dispela man i ken amamas. Lo bilong Jehova i save givim amamas long dispela man, na long san na long nait em i save ritim dispela lo na kolim isi ol tok bilong en.”
Bai Yu Bekim Olsem Wanem?
• Gutpela tok ples em wanem samting?
• Bilong mekim gutpela tok ples, yumi mas mekim wanem?
• Wanem samting bai helpim yumi long mekim gut gutpela tok ples?
[Blok long pes 23]
Lain Long Mekim Gut Moa Gutpela Tok Ples Long Rot Bilong
◆ putim gut yau.
◆ bihainim pasin bilong ol man i save toktok gut.
◆ putim long tingting na kolim gen ol tok.
◆ ritim na kolim long maus.
Sng. 1:1, 2, NW; KTH 1:3
◆ skelim “ol lo” bilong tok ples.
◆ wok yet long lainim.
◆ makim taim bilong stadi.
◆ toktok.
[Ol Piksa long pes 24]
Lain bilong Jehova i wanbel long mekim gutpela tok ples