Autim Tok Long Ol Man Bilong Ol Narapela Tokples

1. Taim yumi autim tok long teritori, yumi inap bungim wanem ol lain?

¹ Jisas Krais i tok profet olsem ol bai autim gutnius long olgeta hap bilong graun na “bai olgeta lain man i ken harim.” Ol manmeri husat i insait long wok bilong autim tok na skulim ol man, ol i luksave olsem dispela tok i bikpela samting. (Mat. 24:14; 28:​19, 20) Taim yumi autim tok na kamapim ol disaipel, ating bai yumi bungim ol manmeri bilong ol narapela kantri em ol i gat narapela tokples. Ol dispela lain tu ol i mas harim gutnius bilong Kingdom na kamap strong long tok i tru paslain long bikpela de bilong Jehova i kamap. (Mal. 3:18) Olsem wanem yumi inap autim tok long ol manmeri bilong narapela tokples long teritori bilong yumi?

2. Taim yumi autim tok long ol man bilong narapela tokples, olsem wanem yumi bihainim pasin bilong Jehova?

² Kisim Tingting Bilong Jehova Long Ol Man Bilong Narapela Tokples: Bilong kamapim pasin laikim bilong Jehova long olgeta kain man yumi bungim long teritori, yumi mas i gat bikpela laik long helpim ol man long kisim stretpela save long God tru, Jehova, maski ol i gat wanem kain tokples. (Sng. 83:18; Apo. 10:​34, 35) Tru yumi mas autim tok long ol man i mekim tokples bilong yumi, tasol yumi mas tingim tu ol man bilong narapela tokples na painim rot long autim tok bilong Kingdom long ol. Sapos yumi no autim tok long ol man bilong narapela tokples, dispela i no stret wantaim laik bilong Jehova long yumi mas autim tok long ol man bilong olgeta lain. Orait, olsem wanem yumi ken helpim ol man bilong narapela tokples?

3. Ol i wokim wanem buklet bilong helpim yumi? Yumi ken mekim wanem bilong redi long yusim dispela buklet?

³ Mekim Wok Long Buklet Good News for People of All Nations: Ol i wokim dispela buklet bilong helpim yumi taim yumi bungim ol man bilong narapela tokples. Long olgeta taim yu mas karim dispela buklet, kisim save gut long ol narapela narapela hap insait long en, na redi long yusim. Bilong helpim yu long painim hariap ol tokples we sampela man long teritori bilong yu i save mekim, putim mak long ol pes i gat ol dispela tokples. Sapos kongrigesen i gat ol buk na nius long ol dispela tokples, i gutpela long kisim sampela i go wantaim yu bilong tilim long man taim yu kamapim pinis tok i stap long buklet.

4. Olsem wanem yumi ken mekim wok long buklet Nations taim yumi autim tok?

⁴ Sapos yu bungim man i gat narapela tokples na yu no kliagut long wanem tokples stret bilong em, orait pastaim soim em karamap bilong buklet. Poin long yu yet na kolim kantri bilong yu na poinim em na tokim em long kolim kantri bilong em, na wanem tokples bilong em. Taim yu save pinis long tokples bilong em, orait lukluk long lista bilong ol tokples, na painim wanem namba bilong pes i gat tokples bilong em. Soim em tok i stap long strongpela rait antap long pes, na tokim em long ritim dispela tok. Taim em i ritim pinis, tilim wanpela nius long tokples bilong em o poinim sentens i stap long kala grei i kamapim dispela tok olsem yu amamas long bringim wanpela buk o nius long tokples bilong em yet. Nau poin long dispela strongpela rait i tok “nem bilong mi,” na kolim klia nem bilong yu. Poin long strongpela rait i tok “nem bilong yu” na wet long em i bekim. Stretim tok long go bek lukim em.

5. Yumi ken mekim wanem bilong helpim ol man bilong narapela tokples husat i laik harim tok?

⁵ Stretim Rot Long Go Bek: Yumi mas wok strong long mekim gobek long ol man i gat laik long harim tok, maski ol i gat narapela tokples. Taim yumi lukim olsem em i laik save long God na tok bilong Baibel, yumi ken pulapim fom S-43 (Please Follow Up) na givim long kuskus bilong kongrigesen, na bai em i ken salim i go long brens ofis na ol i ken stretim rot bilong wanpela i save long tokples bilong em i ken i go lukim em. Brens ofis bai salim dispela fom i go long grup em ol i mekim dispela tokples. Taim dispela grup i kisim dispela toksave, kwiktaim ol i mas go bungim dispela man. Kuskus bilong kongrigesen i mas givim kopi bilong dispela fom long wasman autim tok na bai em i ken save wok bilong grup i go olsem wanem. Sapos man i gat laik tru long kisim save, orait yupela i ken mekim wok long dispela fom.

6. Sapos yumi bungim wanpela man bilong narapela tokples, yumi gat wok long mekim wanem?

⁶ Sampela haptaim bai lus, kirap long taim ol i salim fom S-43 i go long brens na brens i salim i go long grup i mekim dispela tokples. Olsem na namel long dispela haptaim, pablisa husat i bin bungim dispela man, em i mas wok yet long go lukim em inap long taim wanpela pablisa husat i save long tokples bilong em i kam lukim em. Ating pablisa i ken kirapim Baibel stadi wantaim dispela man i laik harim tok. Tasol long dispela haptaim, olsem wanem pablisa i ken kisim ol buk na nius long tokples bilong dispela man i laik harim tok na givim long em?

7. I gat wanem rot bilong kisim ol buk na nius long tokples bilong ol man yumi bungim ol?

⁷ Ol Buk na Nius Long Narapela Tokples: Ol kongrigesen i no ken holim planti buk na nius bilong ol narapela tokples. Tasol sapos wasman autim tok i luksave olsem ol manmeri bilong wanpela tokples ol i gat laik long save long tok i tru, ating em i ken putim sampela buk na nius bilong dispela tokples long kongrigesen na ol pablisa i ken mekim wok long en. Sapos i no gat buk samting long dispela tokples, orait em i ken putim oda long en. Ating ol i mas wet longtaim liklik bilong kisim ol dispela buk na nius. Tasol Sosaiti i stretim rot na putim ol buk na nius bilong kain kain tokples long Web sait www.watchtower.org. na ol man yet i ken prinim. Dispela Web sait i gat planti buk samting i stap long planti handret tokples em ol pablisa o man i laik harim tok, ol i ken lukim na ritim. Olsem na dispela Web sait i gutpela rot bilong helpim yumi taim yumi helpim ol man i laik harim tok em ol i gat narapela tokples.

8. Kongrigesen i gat wanem wok bilong helpim ol man bilong narapela tokples i gat laik long harim tok?

⁸ Wok Bilong Kongrigesen: Sampela taim i gat planti manmeri bilong wanpela tokples ol i kam long hap bilong yumi, tasol i no gat wanpela kongrigesen i save mekim ol miting long tokples bilong ol. Sapos olsem, yu ken singautim ol dispela manmeri husat i gat laik long harim tok long kam long ol miting bilong yu. Gutpela pasin pren bilong ol bratasista long tingim ol bai kirapim ol long bung oltaim wantaim kongrigesen. Pastaim bai hatwok liklik, long wanem, ol i gat narapela tokples na kastam. Tasol insait long lain Witnes Bilong Jehova, pasin laikim Kristen i bungim yumi olgeta wantaim. (Sef. 3:​9, NW; Jon 13:35) Olsem wanem? Yu save gut long narapela tokples? Sapos yu save, na yu amamas long mekim gobek long ol man i mekim dispela tokples, orait toksave long kuskus bilong kongrigesen na em bai toksave long brens ofis. Dispela bai helpim brens ofis taim ol i painim wanpela pablisa bilong go lukim wanpela man bilong narapela tokples husat i laik harim tok.

9. Wanem taim i stret bilong mekim skul bilong lainim tokples? Ol bai mekim olsem wanem?

⁹ Skul Bilong Lainim Tokples: Sapos yu helpim ol manmeri husat i mekim narapela tokples, i gutpela long kirapim ol long go long wanpela kongrigesen we i mekim tokples bilong ol. Tasol sapos i no gat wanpela kongrigesen long tokples bilong ol, sampela pablisa i ken lainim tokples bilong ol dispela manmeri na helpim gut ol. Sapos i no gat kongrigesen i stap klostu, brens ofis bai skelim sapos i gat planti manmeri bilong narapela tokples i stap, orait ol bai kamapim skul bilong lainim tokples. Sapos olsem, brens ofis bai toksave long ol kongrigesen i stap klostu, na stretim rot bilong kamapim toksave long dispela skul bai kirap. Ol pablisa husat i laik insait long dispela skul, ol i mas putim mak olsem ol bai senisim grup o kongrigesen bilong ol bilong sapotim grup o kongrigesen i mekim dispela tokples.

10. Wanem ol samting i makim olsem ol i ken kamapim wanpela grup bilong narapela tokples?

¹⁰ Kirapim Wanpela Grup: Bilong kamapim wanpela grup bilong narapela tokples, ol i mas inapim ol dispela 4-pela mak. (1) I mas i gat planti manmeri bilong narapela tokples i gat laik long harim tok. (2) I mas i gat sampela pablisa ol i save long dispela tokples o ol i wok long lainim dispela tokples. (3) I mas i gat wanpela elda o kongrigesen sevan husat inap go pas na lukautim wanpela miting long wik. (4) Lain elda i mas amamas long helpim dispela grup. Taim ol inapim ol dispela mak, ol elda i ken raitim pas long brens ofis na stori long dispela grup na askim brens long ol i laik dispela liklik lain i ken kamap wanpela grup na i stap aninit long kongrigesen bilong ol. (Lukim buk Oganaisesen, p. 106-107.) Brata elda o kongrigesen sevan i go pas long dispela grup em bai i stap olsem “wasman bilong grup” o “sevan bilong grup” na lukautim dispela grup.

11. Bilong wanem em i gutpela samting long autim tok long ol manmeri bilong narapela tokples long teritori bilong yumi?

¹¹ Wok bilong autim tok long ol man bilong narapela tokples long teritori bilong yumi em i wanpela bikpela hap bilong wok autim tok, em Man i stap gutpela piksa bilong yumi, Jisas Krais, i bin tokim yumi long mekim. Yumi mas givim bel tru long mekim wok bilong yumi na lukim olsem wanem Jehova i seksekim olgeta lain man na bringim ol man i gat gutpela bel i kam long em. (Hag. 2:​7, NW ) Em i gutpela samting tru long wok bung wantaim long mekim dispela wok! Jehova i ken blesim wok bilong yumi long autim tok long ol manmeri bilong narapela tokples long teritori bilong yumi, na yumi mas tingim olsem maski ol man i gat wanem wanem tokples, God inap mekim dispela wok i go bikpela!​—⁠1 Kor. 3:​6-9.