Kirapim na Pinisim Ol Miting Long Taim Stret Ol i Bin Makim
1 Olgeta miting bilong kongrigesen na ol bung bilong autim tok i mas kirap na pinis long taim stret ol i bin makim. Bilong wanem? Long wanem, pasin bilong mekim ol samting long taim stret bilong en i makim olsem olgeta samting i wok gut wantaim na i makim olsem yumi tingim gut ol man i save kam long ol miting. (Sav 3:17b; 1 Ko 14:33) Bilong kamapim bel bilong yumi olsem yumi tingim ol dispela man, i gutpela sapos yumi bihainim tok bilong ol paragraf i kam bihain long dispela, na bai yumi no ken kalapim taim bilong kirapim na pinisim ol miting.
2 Gutpela yumi kamap long Haus Kingdom taim miting i no kirap yet na bai yumi inap pren gut wantaim ol brata sista na toktok wantaim ol, na yumi gat taim bilong mekim ol samting yumi mas mekim, na bai yumi inap insait long singsing na beten bilong kirapim miting. Ol i makim olsem 5 minit bilong mekim singsing na beten. Ol brata i mekim beten bilong kirapim na pinisim miting ol i mas mekim beten i stret long ol tok bilong miting. Ol beten i no ken longpela tumas.
3 MITING BILONG PABLIK-TOK: Dispela miting i mas pinis insait long 45 minit na i no ken kalapim ol minit bilong en, nogut dispela i mekim na Stadi Wastaua tu i kalapim ol minit bilong en. Tupela miting hia wantaim ol singsing na beten i mas pinis insait long tupela aua olgeta. Brata bilong mekim Pablik-Tok i mas bihainim stret ol minit Sosaiti i makim long autlain; em i no ken pulim ol narapela tok i kam insait, olsem sampela gude bilong ol brata sista long ol narapela hap. Sapos brata bilong narapela kongrigesen i kam mekim Pablik-Tok, gutpela sapos pastaim em i save gut long Haus Kingdom i stap we na hamas minit samting em i mas lusim bambai em inap kamap long Haus Kingdom taim miting i no kirap yet.
4 STADI WASTAUA: Ol i makim wanpela aua bilong mekim Stadi Wastaua, na insait long dispela aua ol i mas kaunim olgeta paragraf na kamapim gen ol bikpela tok. Brata bilong lukautim dispela stadi i ken mekim liklik tok i klia bilong kirapim stadi na bai ol man i gat laik long harim. Dispela brata i no ken mekim planti tok tumas insait long stadi—dispela bai pulim taim. Brata i mas skelim gut ol minit wantaim ol paragraf na bai em i no ken mekim isi isi tumas namba wan hap bilong stadi na nau em i mas mekim hariap laspela hap.
5 SKUL BILONG WOK AUTIM TOK: Dispela miting em inap 45 minit tasol. Long tok namba wan na tok bilong kamapim ol bikpela tok bilong hap bilong Baibel em sedyul i makim, sapos ol brata bilong mekim ol dispela tok i kalapim ol minit bilong tok, wasman bilong Skul i no ken pasim ol, tasol ol i mas was gut bambai ol i no ken pulim tok. Sapos brata i pulim tok, orait, bihain wasman bilong Skul i ken toktok wantaim dispela brata yet. Wasman bilong Skul tu em i no ken kalapim tupela minit bilong em long mekim sampela tok. Sapos olgeta sumatin i sindaun klostu long pletfom na ol i no kalapim minit bilong ol tok bilong ol, orait taim i no ken lus nating.—Lukim Sedyul Bilong Skul Bilong Wok Autim Tok Bilong 1991.
6 MITING BILONG WOK: Dispela miting tu em inap 45 minit tasol. Miting Bilong Wok na Skul Bilong Wok Autim Tok na ol singsing na beten i mas pinis insait long wanpela aua na 45 minit. Ol brata bilong mekim tok long Miting Bilong Wok, ol i no ken pulim taim. Ol brata i lukautim ol hap i gat askim long en, ol i mas mekim ol sotpela tok tasol bilong kirapim tok. Ol brata i mas redim gut ol soim na ol brata insait long soim ol i mas redi i stap na wet long ples ol i bin makim na bai ol i no ken lusim nating taim.
7 BUK-STADI: Dispela miting i go inap long wanpela aua, na beten bilong kirapim na pinisim miting i insait long dispela hap taim. Ol i mas kaunim olgeta paragraf. Nogut Buk-Stadi i kalapim ol minit bilong en, olsem na brata bilong lukautim Buk-Stadi em i mas skelim gut ol paragraf na bai em i no ken mekim hariap laspela hap bilong stadi o pinisim stadi hariap tumas na sampela hap taim i stap yet. Brata i mas save hamas minit em i mas lusim bilong mekim ol wan wan paragraf. Em i mas kamapim klia ol bikpela tok. Pasin bilong skulim gut ol manmeri bai helpim dispela brata long mekim gut ol dispela wok.—Taitus 1:9.
8 BUNG BILONG I GO AUTIM TOK: Dispela bung i no ken kalapim 15 minit. Brata i lukautim bung em i mas makim teritori bilong ol pablisa i ken autim tok long en na mekim beten insait long dispela 15 minit. Ol brata sista i laik bai ol i gat bikpela hap taim long mekim wok autim tok; nogut taim bilong ol i lus nating. Brata i mas kirapim bung long taim stret ol i bin makim, maski em i save bikpela lain bai kam bihain. Taim brata i makim pinis teritori bilong autim tok long en na em i mekim pinis beten, orait grup i ken i go stret long teritori. Yumi mas tingim ol painia, em ol i mas winim ol aua bilong ol.
9 Sapos olgeta miting i kirap na pinis long taim stret ol i bin makim, orait dispela bai helpim yumi olgeta. Dispela bai helpim tu ol marit Witnes, em poroman bilong ol i no Witnes, na ol i bin makim taim bilong poroman marit bilong ol i mas kam bek long haus. Ol Witnes, em wanhaus bilong ol i no Witnes, ol i mas tingim gut ol samting ol i mas mekim paslain na bihain long miting; ol i mas i gat taim bilong pren gut wantaim ol brata sista na kisim ol buk magasin samting. Ol i mas tingim ol dispela samting taim ol i stretim rot bilong i kam long miting na bai ol inap tokim wanhaus bilong ol long wanem taim stret ol bai kam bek long haus o wanem taim em i ken i kam long Haus Kingdom na kisim ol. Tru tumas, sapos ol miting i kirap na pinis long taim stret ol i bin makim, dispela bai helpim yumi olgeta long “bihainim stret ol gutpela pasin bilong lotu.”—1 Ko 14:40.
[Ol Askim]
1. (a) Saveman 3:17b na 1 Korin 14:33 i tok wanem na yumi save ol miting i mas kirap na pinis long taim stret ol i bin makim? (b) I gat wanem ol narapela samting na ol i no ken kalapim taim bilong kirapim na pinisim miting?
2. (a) Bilong wanem i gutpela yumi kam paslain liklik long taim miting i mas kirap? (b) Ol brata bilong mekim beten bilong kirapim na pinisim miting ol i mas tingim wanem ol samting?
3. Stadi Wastaua na Miting Bilong Pablik-Tok i mas pinis insait long hamas aua? Bilong wanem Miting Bilong Pablik-Tok i mas pinis insait long 45 minit tasol?
4. Stadi Wastaua em inap wanpela aua tasol. Ol i mas mekim wanem ol samting insait long dispela wanpela aua?
5, 6. Olgeta brata sista i kisim wok insait long Skul na Miting Bilong Wok, ol i mas tingim gut wanem ol samting na bai miting i ken pinis long taim stret ol i bin makim?
7. Brata bilong lukautim Buk-Stadi i mas mekim wanem na bai stadi i no ken pinis bihaintaim o pinis hariap tumas?
8. (a) Bung bilong i go autim tok i mas pinis insait long hamas minit? (b) Bilong wanem dispela bung i no ken kalapim ol minit bilong en na i pinis bihaintaim?
9. (a) Ol brata sista em wanhaus o poroman marit bilong ol i no Witnes, ol i mas tingim wanem ol samting taim ol i laik kam long miting? (b) Wanem samting inap helpim yumi olgeta long “bihainim stret ol gutpela pasin bilong lotu”?