Skulim Ol Pikinini Bilong Yu

Josaia i Makim Olsem Em Bai Bihainim Stretpela Pasin

YU TING i hatwok long bihainim stretpela pasin?a​​​— Sapos yu tok yes, planti man bai i wanbel wantaim yu. Ol manmeri i bikpela pinis, ol tu i hatwok long mekim ol pasin em ol i save em i stret. Yumi ken skelim as na i hatwok long Josaia long bihainim stretpela tingting. Yu save long Josaia em i husat?​​​—

Josaia em i pikinini man bilong wanpela king bilong Juda, em Emon. Josaia i bin kamap taim Emon i gat 16 krismas. Emon em i man nogut, wankain olsem papa bilong em, King Manase. Insait long planti yia, Manase i bin stap olsem wanpela king nogut. Tasol bihain, ol Asiria i kam kisim em olsem wanpela kalabusman i go long Babilon. Taim Manase i stap long kalabus, Manase i beten strong long Jehova i ken lusim rong bilong em, na Jehova i bin mekim olsem.

Taim Manase i lusim kalabus, em i go bek long Jerusalem na kirapim gen wok king bilong em. Wantu em i stretim ol samting nogut em i bin wokim, na em i kirap helpim ol man long lotuim Jehova. Ating em i bin bel hevi tru taim pikinini man bilong em, Emon, i no bihainim gutpela pasin bilong em. Na ating mama i bin karim Josaia long dispela taim. Baibel i no stori olsem Manase i bin stap wantaim tumbuna pikinini bilong em, Josaia. Tasol olsem wanem? Yu ting Manase i bin traim long helpim Josaia long kirap lotuim Jehova?​​​—

Josaia i gat 3-pela krismas tasol taim Manase i dai, na papa bilong em, Emon, i kamap king. Emon i mekim wok king inap tupela yia tasol, na ol ofisa bilong em i kilim em i dai. Olsem na Josaia i kamap king bilong Juda taim em i gat 8-pela krismas. (2 Stori, sapta 33) Yu ting wanem samting i bin kamap? Yu ting Josaia i bin makim olsem em bai bihainim pasin nogut bilong papa bilong em, Emon? O em i bihainim gutpela pasin em tumbuna papa bilong em Manase i bin soim?​​​—

Maski Josaia i yangpela yet, em i save olsem em i laik lotuim Jehova. Olsem na em i harim tok bilong ol lain i laikim Jehova, na em i no harim tok bilong ol poroman bilong papa bilong em. Maski Josaia i gat 8-pela krismas tasol, em i save olsem i stret em i harim tok bilong ol lain husat i laikim God. (2 Stori 34:​1, 2) Olsem wanem? Yu laik save long ol lain i bin givim tok long Josaia na ol i stap gutpela piksa em i ken bihainim?​​​—

Wanpela husat i bin stap olsem gutpela piksa long Josaia, em profet Sefanaia. Em i wanpela wanblut bilong Josaia. Ating em i wanpela tumbuna pikinini bilong papa bilong Manase, em gutpela King Hesekia. Long kirap bilong wok king bilong Josaia, Sefanaia i raitim hap bilong Baibel ol i kolim Buk Sefanaia. Sefanaia i givim tok lukaut olsem samting nogut bai kamap long ol lain i no makim olsem ol bai bihainim stretpela pasin, na yumi ken tok Josaia i bin harim dispela tok lukaut.

Jeremaia tu i bin i stap, na ating yu harim pinis stori bilong em. Jeremaia na Josaia ol i yangpela man, na ol i bin kamap bikpela long wankain hap. Jehova i kirapim Jeremaia long raitim Buk Jeremaia long Baibel. Taim Josaia i dai long pait, Jeremaia i raitim wanpela singsing sori bilong kamapim bikpela bel hevi bilong em. (2 Stori 35:25) Yumi ken tingim tasol olsem tupela i bin strongim narapela narapela long stap gut long Jehova!

Yu ting yu ken lainim wanem samting long Josaia?​​​— Sapos papa bilong yu i no lotuim Jehova, olsem papa bilong Josaia, yu ting i gat wanpela husat inap helpim yu long kisim save long God? Ating em mama bilong yu, tumbuna bilong yu, o wanpela wanblut bilong yu. O ating em wanpela husat i lotuim Jehova, na mama bilong yu i orait long yu stadi long Baibel wantaim em.

Maski Josaia em i pikinini tasol, em i save olsem em i mas poroman wantaim ol man i lotuim Jehova. Yu tu ken mekim wankain pasin olsem Josaia, na makim olsem yu bai bihainim stretpela pasin!

[Futnot]

Ol Askim:

○ Husat i papa na tumbuna papa bilong Josaia? Na ol i wanem kain man?

○ Tumbuna papa bilong Josaia i bin mekim wanem ol senis long laip bilong em?

○ Wanem nem bilong tupela profet em ating ol i stap gutpela piksa long Josaia? Yu ting i gat wanem as na em i bikpela samting long i gat ol kain poroman olsem?

[Ol Piksa long pes 25]

Ating long wanem ol rot Sefanaia na Jeremaia i bin helpim Josaia long mekim stretpela pasin?