Yu Inap Kamap Gutpela Maski Yu Go Bikpela Insait Long Wanem Kain Famili
KIRAP long taim Nicholas i liklik yet, em i gat pasin bikhet.a Bel bilong em i no stap isi, na bihain dispela i mekim na em i kisim drak na dring planti tumas. Nicholas i tok: “Papa bilong mi em i man bilong dring oltaim, na em i givim bikpela pen na hevi long mi wantaim susa bilong mi.”
Long ai bilong ol man, i olsem papamama bilong Malinda i gutpela manmeri bilong i go oltaim long lotu, tasol tu ol i insait tru long wanpela liklik lain i save mekim ol narapela kain pasin bilong lotu. Malinda, nau em i gat 30 krismas samting, em i tok: “Sampela pasin ol i mekim insait long lotu i mekim nogut long mi taim mi liklik yet na i bagarapim tru bel bilong mi. Dispela i mekim na mi pilim olsem mi no inap wetim wanpela gutpela samting i kamap na mi pilim olsem mi nogut tasol.”
Yumi save pinis, taim planti manmeri i stap pikinini yet, sampela i bin paitim ol nogut tru, na mekim pasin nogut long ol, na papamama i no lukautim gut ol, na olkain samting olsem. Dispela kain sindaun inap bagarapim tru bel bilong pikinini, na em bai stap olsem inap longtaim. Tasol yu ting ol dispela hevi i mas pasim rot bilong em long kisim tok i tru bilong Baibel, na kisim liklik amamas long i stap bilong em? Maski Nicholas na Malinda i stap nogut olsem taim ol i pikinini yet, yu ting ol inap kamap gutpela olsem man i stap gut long God? Orait pastaim yumi ken tingim King Josaia bilong Juda.
Wanpela Em Baibel i Stori Long Em
Josaia i bosim Juda inap 31 yia. (659-629 B.C.E.) Ol birua i kilim i dai papa bilong Josaia, na taim Josaia i kamap king, ol samting long Juda i stap nogut tru. Planti man long Juda na Jerusalem i save lotuim god Bal na nambawan god bilong ol Amon, em Molek. Sefanaia, wanpela profet bilong God long dispela taim, em i tok ol lida bilong Juda ol i olsem “ol laion i hangre na i singaut strong,” na ol man bilong harim tok i olsem “ol weldok i hangre tumas.” Olsem na pasin giaman na bagarapim man i pulap long dispela kantri. Planti i save tok long bel bilong ol olsem: “God i save sindaun nating. Em i no helpim ol gutpela man na em i no bekim pe long ol man nogut.”—Sefanaia 1:3–2:3; 3:1-5.
Josaia i wanem kain king? Man bilong raitim Baibel, em Esra, i tok: “Josaia i mekim gutpela pasin long ai bilong Bikpela. Em i bihainim gutpela pasin olsem tumbuna bilong en, King Devit, i bin mekim bipo. Na em i strong long bihainim olgeta tok bilong Bikpela.” (2 Stori 34:1, 2) Em nau, Josaia i mekim pasin i stret long ai bilong God, tasol em i go bikpela insait long wanem kain famili?
Sindaun i Gutpela o i Nogut?
Taim mama i karim Josaia long yia 667 B.C.E., papa bilong em Emon i gat 16 krismas tasol, na bubu bilong em Manase i stap king bilong Juda. Manase em i wanpela king nogut tru, winim ol narapela king bilong Juda. Manase i wokim ol alta bilong mekim lotu long god Bal, na em “i mekim planti sin moa long ai bilong Bikpela.” Em i kukim ol pikinini man bilong em yet long paia olsem ofa, na wokim marila, na askim ol glasman long helpim em, na mekim wok bilong ol spirit nogut, na kilim i dai planti man i no gat rong. Na tu, em i kisim piksa bilong god giaman em i bin wokim na putim insait long haus bilong God. Em i pulim ol Juda na Jerusalem long “mekim planti pasin nogut moa. Dispela pasin nogut bilong ol i winim pasin nogut bilong ol manmeri i bin i stap bipo long dispela graun na Bikpela i bin rausim ol.”—2 Stori 33:1-9.
Pasin bilong Manase i nogut tru, olsem na Jehova i larim ol Asiria i pasim hanlek bilong em long sen na kisim em i go long Babilon, em wanpela biktaun king bilong Asiria i bosim. Taim Manase i stap long kalabus, em i tanim bel, na daunim em yet, na krai long Jehova i ken lusim ol rong bilong em. God i harim prea bilong em na larim em i kamap king gen long Jerusalem. Bihain, Manase i mekim sampela samting bilong stretim bek lotu i tru na wok em i mekim i kamap gutpela liklik.—2 Stori 33:10-17.
Manase i bin mekim pasin nogut na bihain em i tanim bel na dispela i mekim wanem long pikinini man bilong em, Emon? Em i kamap man nogut tru. Taim Manase i tanim bel na wok long rausim olgeta samting nogut em yet i bin kamapim long Juda, Emon i no tanim bel. Taim em i gat 22 krismas na i kamap king, em “i mekim pasin nogut long ai bilong Bikpela, olsem papa bilong en, Manase, i bin mekim.” Em i no daunim em yet long ai bilong Jehova; “em i wok long mekim sin moa moa yet.” (2 Stori 33:21-23) Josaia i gat 6-pela krismas tasol taim Emon i kamap king bilong Juda. Ating sindaun bilong Josaia taim em i pikinini em i nogut tru!
Inap tupela yia bihain, wok king nogut bilong Emon i pinis taim ol wokboi bilong em i bung na toktok long painim rot bilong kilim em, na bihain ol i kilim em i dai. Tasol ol manmeri bilong Juda i kirap na kilim ol dispela man i bin kilim Emon, na ol i kisim Josaia, pikinini man bilong Emon, na makim em i kamap king.—2 Stori 33:24, 25.
Tasol maski Josaia i gat ol dispela hevi long sindaun bilong em taim em i pikinini yet, em i mekim ol samting i gutpela long ai bilong Jehova. Em i mekim gutpela wok king tru, olsem na Baibel i tok: “Josaia em i gutpela king tru. Em i gat wanpela laik na tingting tasol, em long bihainim Bikpela long olgeta strong bilong em na long bihainim olgeta tok bilong lo bilong Moses. Bipo i no gat wanpela king i gutpela olsem Josaia, na bihain tu i no gat wanpela king olsem em. Em i winim ol.”—2 King 23:19-25.
Tru tumas, Josaia i stap olsem gutpela piksa tru bilong ol man em sindaun bilong ol i nogut tru taim ol i pikinini yet! Orait pasin bilong Josaia inap skulim yumi long wanem samting? Wanem samting i helpim Josaia long makim stretpela rot long bihainim na stap gut long dispela rot?
Wok Long Kisim Save Long Jehova
Wanpela gutpela samting i bin kamap long i stap bilong Josaia taim em i stap yangpela yet, em bubu bilong em Manase i tanim bel. Baibel i no tokim yumi long hamas taim Manase i bin bung na toktok wantaim Josaia o long krismas bilong Josaia taim Manase i stretim pasin bilong em yet. Ol famili Juda i save pas gut wantaim, olsem na ating Manase i bin wok strong long skulim liklik bubu bilong em long tingim trupela God Jehova na tok bilong em, na long dispela rot em i helpim Josaia na bai em i no ken kisim pasin nogut bilong ol man em i stap namel long ol. Ol gutpela tok i tru Manase i planim long bel bilong Josaia, wantaim sampela gutpela pasin moa, bihain ol dispela samting i kamapim gutpela kaikai. Long namba 8 yia bilong Josaia i stap king, long taim em i gat 15 krismas, em i wok long kisim save long laik bilong Jehova na em i bihainim.—2 Stori 34:1-3.
Sampela man taim ol i pikinini yet ol i bin kisim liklik save long Baibel long rot bilong wanpela wanblut o pren o man i sindaun klostu long ol—ol i no gat narapela rot. Tasol sapos ol i tingim tingim dispela tok ol i kisim, olsem pikinini bilong kaikai ol i lukautim gut, dispela inap kamapim gutpela kaikai bihain. Wanpela man i gat pasin olsem wanpela lapun bubu em i save kam long haus bilong Malinda, em pastaim yumi stori long em, na givim nius Wastaua na Kirap! long em. Malinda i amamas long tingim em, na em i tok: “Samting mi laikim bilong dispela man i olsem: Em i no mekim ol bikpela de bilong lotu. Dispela em i bikpela samting long mi, long wanem, Halowin na sampela bikpela de moa em taim bilong mekim kain kain pasin bilong dispela liklik lotu papamama i insait long en.” Tenpela yia bihain, taim wanpela pren i singautim Malinda long go long wanpela miting Kristen long Haus Kingdom bilong ol Witnes Bilong Jehova, em i tingim dispela man na em i amamas long go. Dispela i bin helpim em long painim tok i tru.
Daunim Yu Yet Long Ai Bilong God
Taim Josaia i stap king, em i mekim bikpela wok bilong stretim bek lotu i tru long kantri Juda. I go inap 6-pela yia, Josaia i mekim wok bilong rausim ol samting bilong ol god giaman long Juda. Mekim pinis, orait nau em i stretim haus bilong Jehova. Taim dispela wok i stap, Hetpris Hilkia i painim wanpela gutpela samting tru! Em i lukim “buk i gat tok bilong lo,” em Moses yet i bin raitim. Hilkia i givim dispela buk long Safan, em kuskus, na Safan i go tokim king long dispela. Yu ting Josaia, em i gat 25 krismas, em i hambak long ol dispela samting?—2 Stori 34:3-18.
Esra i tok: ‘Taim king i harim ol tok bilong lo bilong God i stap insait long dispela buk, em i brukim klos bilong en.’ Dispela i makim olsem em i bel hevi tru—em i save ol tumbuna bilong ol i no bin bihainim olgeta lo bilong God! Man! Em i daunim em yet long ai bilong God! Kwiktaim king i salim 5-pela man i go lukim wanpela profet meri, nem bilong em Hulda, bilong askim Jehova long wanem samting bai kamap. Ol i bringim tok i kam bek, olsem: ‘Bagarap bai painim ol manmeri, long wanem, ol i bin givim baksait long Lo bilong Jehova. Tasol King Josaia, yu bin daunim yu yet long ai bilong mi, olsem na bai yu no lukim dispela bagarap. Bai yu stap gut. Bihain long taim yu dai na ol i planim yu pinis, bai mi bringim dispela bagarap.’ (2 Stori 34:19-28) Jehova i amamas long pasin na tingting bilong Josaia.
Olsem na maski yumi go bikpela insait long wanem kain pasin, yumi tu inap daunim yumi yet long ai bilong trupela God, Jehova, na kamapim klia olsem yumi tingim em na daun long Baibel, em Tok bilong em. Nicholas, em pastaim yumi stori long em, em i mekim dispela samting. Em i tok: “Tru, sindaun bilong mi i nogut stret, long wanem, mi save kisim drak na dring planti tumas, tasol mi laikim ol tok bilong Baibel na mi gat bikpela laik long i stap bilong mi i mas i gat as bilong en. Bihain moa mi bungim ol Witnes Bilong Jehova, na mi senisim pasin bilong mi, na kisim tok i tru.” Em nau, maski yumi sindaun namel long wanem kain pasin, yumi inap tingim God na daun long Tok bilong em.
Larim Samting Jehova i Putim i Helpim Yu
Josaia i daun tu long ol profet bilong Jehova. Em i askim profet meri Hulda long samting em i mas mekim, na em i larim sampela profet moa, ol i stap long taim bilong em, long stiaim em. Olsem: Jeremaia na Sefanaia i save mekim strongpela tok long pasin bilong lotuim ol god giaman em ol man long Juda i save mekim. Josaia i tingim gut dispela tok bilong ol na dispela i strongim em taim em i wok long pinisim lotu giaman!—Jeremaia 1:1, 2; 3:6-10; Sefanaia 1:1-6.
“Bikman,” em Jisas Krais, i bin givim wok long ol disaipel God i bin makim—em “wokboi i gat gutpela tingting”—long tilim kaikai bilong spirit long taim stret bilong en. (Matyu 24:45-47) Long rot bilong ol buk bilong Baibel na kongrigesen, lain wokboi i helpim yumi long save long olsem wanem pasin bilong bihainim tok bilong Baibel inap helpim yumi, na long ol samting yumi ken mekim bilong bihainim dispela tok long olgeta de. Olsem na sapos yumi gat sampela tingting kranki em longtaim yumi bin bihainim, i stret yumi larim dispela samting Jehova i putim i helpim yumi long daunim ol dispela tingting! Kirap long taim Nicholas i liklik pikinini, em i no laik tru long daun long ol man i gat wok long bosim em. Taim em i wok long kisim tok i tru bilong Tok Bilong God, dispela pasin kranki bilong em i pasim em long mekim sampela wok moa bilong Jehova. Em i hatwok tru long daunim dispela tingting bilong em, tasol bihain, em i daunim pinis. Em i mekim olsem wanem? Nicholas i tok: “Tupela elda i pilim gut tingting bilong mi ol i helpim mi na mi tokaut long dispela pasin kranki na mi kirap long bihainim ol gutpela tok bilong Baibel ol i givim long mi.” Em i tok moa: “Tru, sampela taim mi bel nogut liklik, tasol mi ken tok olsem mi daunim pinis pasin bikhet bilong mi.”
Taim Malinda i skelim sampela bikpela samting em i mas mekim long i stap bilong em, em tu i askim ol elda long givim sampela gutpela tok long em. Sampela stori long Wastaua na Kirap! i bin helpim gut em taim em i pilim olsem em i no inap wetim wanpela gutpela samting i kamap na em i pilim olsem em i nogut tasol—em i kisim dispela kain tingting taim em i yangpela yet. Em i tok: “Sampela taim i gat wanpela paragraf o sentens tasol long stori em mi pilim tru. Inap 9-pela yia i go pinis, mi kirap bungim olkain stori olsem, na putim ol insait long wanpela karamap, olsem buk, bambai mi no ken hatwok long painim gen.” Nau em i gat 3-pela notbuk olsem i gat 400 stori long en!
Tru tumas, sapos man i bin go bikpela insait long wanpela famili em pasin bilong ol i no gutpela tumas, i no olsem dispela i mas nogutim em inap olgeta taim, nogat. Sapos Jehova i helpim em, em inap kamap gutpela long ol samting bilong spirit. Em nau, sapos man i go bikpela insait long famili i bihainim gutpela pasin, dispela i no makim olsem em bai stap gut long God. Na olsem tasol, sapos man i go bikpela insait long famili i bihainim pasin nogut, dispela i no inap pasim em long kamap man i stap aninit long God.
Taim ol i stretim tempel na painim pinis buk bilong Lo, Josaia ‘i mekim kontrak wantaim Bikpela, long em bai bihainim tru olgeta lo na tok bilong Bikpela.’ (2 Stori 34:31) I go inap long taim em i dai, em i no lusim dispela pasin. Malinda na Nicholas ol tu i gat strongpela tingting long stap gut long God Jehova na stap olsem man i stap gut long God. Mipela i laik bai yu tu i stap klostu long God Jehova na stap gut long mekim wok bilong en. Yu ken bilip tru olsem yu inap kamap gutpela, long wanem, Jehova i tok promis: “Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela. Bai mi was gut long yupela na long bikpela strong bilong mi bai mi daunim ol birua bilong yupela.”—Aisaia 41:10, 13.
[Futnot]
a Mipela i senisim nem bilong sampela.
[Ol Piksa long pes 26]
Maski sindaun bilong Josaia i nogut tru taim em i pikinini yet, em i wok long painim Jehova, na ol samting em i mekim long i stap bilong em i kamap gutpela
[Piksa long pes 28]
Ol elda inap helpim yu long daunim wanpela pasin nogut i hatwok long daunim
[Piksa long pes 28]
“Wastaua” na “Kirap!” inap helpim yu long stap gut long God