Ol Samting Yu Ken Mekim na Bai Ol Miting i Helpim Yu Yet na Ol Narapela Tu
1 Ol miting i save helpim yumi long kisim sampela save moa long Jehova. Ol i helpim yumi long save gut long ol lo bilong em na kirapim yumi long bihainim ol dispela lo. Ol miting i save helpim yumi long mekim gutpela wok moa long autim tok bilong helpim ol man long kisim laip. Na ol i helpim yumi long winim mak bilong kisim laip oltaim. Na taim yumi bung wantaim ol brata sista long miting, sapos yumi olgeta wan wan i putim gut yau na bekim ol tok, orait, ol miting bai helpim gut yumi yet na ol narapela tu.
2 I gat 3-pela samting yumi mas mekim na bai ol miting i helpim yumi, olsem: (1) yumi mas redi gut, na (2) yumi mas bekim tok, na (3) yumi mas bihainim ol tok yumi kisim save long en. Yumi mas mekim namba wan samting bambai yumi inap mekim namba 2 samting, na yumi mas mekim namba 2 samting bambai yumi inap mekim namba 3 samting. Sapos yumi redim gut ol tok bilong miting, i no hatwok long bekim tok na bai yumi amamas long mekim. Taim yumi amamas long bekim tok na yumi givim bel long kamapim bilip bilong yumi, dispela samting i strongim ol man i harim na kirapim ol long mekim wok. (Ef 4:29) Sapos olgeta long miting i kisim gut ol tok ol i harim na ol i save olsem wanem dispela tok inap helpim ol yet, o helpim ol long kamapim ol disaipel, dispela bai kirapim ol long bihainim ol dispela tok.
STADI WASTAUA NA BUK-STADI
3 Miting bilong Stadi Wastaua na Buk-Stadi i bikpela samting tru long yumi, long wanem, long rot bilong dispela tupela miting, lain ‘gutpela wokboi’ i givim kaikai bilong spirit long lain bilong God. (Mt 24:45-47) Olsem wanem? Yu save lusim hap taim long stadi na redim ol tok bilong miting? Yu redi long bekim tok long taim bilong miting? Em bikpela wok yu mas mekim.
4 Sapos yu bin stadi gut na redim ol tok bilong Stadi Wastaua na bilong Buk-Stadi, bai yu redi long bekim tok, na bai yu kisim bikpela amamas, long wanem man i givim samting em i kisim bikpela amamas moa. (Ap 20:35) Sampela i save katim tasol ol bikpela tok bilong Wastaua na buk bilong Buk-Stadi. Sapos yu kaunim ol skripsa em Wastaua o buk i kolim namba bilong en tasol, na tingting long olsem wanem dispela skripsa i helpim tok bilong Wastaua o buk, dispela bai helpim yu long kisim gut ol tok bilong Baibel i olsem as bilong ol bekim. Olsem wanem? Yu inap bekim tok long save yu kisim pinis na i stap long tingting bilong yu, o yu save kaunim tasol ol bekim? Taim yu stadi, bikpela samting yu laik mekim em olsem: Yu laik putim dispela tok i go daun long bel bilong yu, na bel bilong yu bai pilim na kirapim yu long bihainim.—Snd 2:5; 4:7, 8.
SKUL BILONG WOK AUTIM TOK NA MITING BILONG WOK
5 Taim ol i makim yu long mekim wanpela tok long Skul, yu pilim olsem Jehova i bin makim yu long mekim dispela tok na dispela i kirapim yu long redim gut tok bilong yu? Yu mas save gut long ol tok yu laik kamapim, na taim yu mekim tok bilong yu, ol narapela i ken amamas long harim. Tasol maski i no taim bilong yu bilong mekim tok, gutpela sapos yu kaunim ol hap Baibel em sedyul bilong Skul i makim, na redim ol narapela hap tok bilong Skul. Na yu mas mekim olsem tu long Miting Bilong Wok. Sapos yu redim gut pastaim, orait long taim bilong miting bai yu inap putim tingting i go long ol tok brata i mekim, na bai yu no hatwok long kisim save long ol tok bilong miting.
6 Ol soim long Miting Bilong Wok na ol tok long Skul i mas stret olsem samting i save kamap long hap bilong yupela. Sapos ol i makim yu long mekim wanpela tok o soim long taim bilong miting, yu mas redim gut, na yu mas pasim klos i stret bambai ol narapela i ken bihainim gutpela pasin bilong yu.
7 Yumi mas redim gut ol tok bilong yumi long miting, na kamapim gut bambai ol brata sista inap amamas long harim. Ol papamama i mas helpim pikinini bilong ol long redi bambai ol inap bekim tok long toktok bilong ol yet. Sapos olgeta brata sista i kamap long miting taim miting i no kirap yet, na sapos ol i redi long bekim tok, ol brata sista bai amamas long ol tok i kamap long miting na ol dispela tok bai kirapim tingting na bel bilong ol. Olsem wanem? Bai yu wok strong bambai “olgeta samting yupela i mekim, yupela i . . . mekim bilong strongim [kongrigesen]”?—1 Ko 14:26.
[Ol Askim]
1. (a) Ol miting i helpim yumi long wanem 4-pela samting? (b) Yumi mas mekim wanem na bai ol miting inap helpim gut yumi?
2. (a) Stori long 3-pela samting yumi mas mekim na bai miting i helpim yumi. (b) Olsem wanem narapela samting i helpim narapela samting? (c) Tok bilong Efesus 4:29 i kirapim yumi long mekim wanem? (d) Wanem samting bai kirapim ol manmeri long bihainim ol tok ol i harim long miting?
3. (a) Long wanem rot lain ‘gutpela wokboi’ i givim kaikai bilong spirit long lain bilong God? (b) Stori long tupela samting ol manmeri inap mekim, na bai dispela “kaikai” i helpim ol moa?
4. (a) Olsem Aposel 20:35 i tok, olsem wanem yumi inap kisim bikpela amamas moa long ol miting? (b) Bilong wanem i gutpela sapos yumi bekim tok olsem i stap pinis long tingting bilong yumi? (c) Tok bilong Sindaun 4:7, 8 i kirapim yumi olgeta long mekim wanem?
5. (a) Yumi mas ting olsem wanem taim ol i makim yumi bilong mekim wanpela tok long Skul? (b) Sapos yumi redi gut pastaim, olsem wanem dispela inap helpim yumi?
6. Yumi mas mekim wanem na bai ol tok bilong yumi long Skul o long soim yumi insait long en inap helpim ol narapela?
7. Yumi olgeta inap mekim wanem na bai ol brata sista i amamas long harim ol tok bilong miting?
This article is repeated in km 9/95.