Rot Bilong Kisim Amamas Long Ol Miting
1 Ol miting i bikpela samting long strongim yumi long ol samting bilong spirit. Ol samting yumi mekim paslain long miting, long taim bilong miting, na bihain long miting, ol i bikpela samting bilong helpim yumi long kisim amamas long ol miting. Olsem wanem yumi ken helpim yumi yet na ol narapela long amamas long kam long ol miting?
2 Paslain Long Ol Miting: Pasin bilong redim ol miting em i bikpela samting tru bilong helpim yumi long kisim amamas long ol miting. Taim yumi redi gut, dispela bai kirapim yumi long putim gut yau long ol tok na bekim sampela tok. Na tu, taim yumi gat ol tok long miting, yumi mas redi gut na kamapim stret ol tok, na kamapim gut na bai ol manmeri i amamas long harim. Yumi mas lainim gut dispela tok. Taim yumi redim gut ol miting na bekim sampela tok bilong strongim olgeta, ol narapela bai save olsem yumi wok long kamap strong long ol samting bilong spirit na yumi bai kisim bikpela amamas.—1 Ti 4:15, 16.
3 Long Taim Bilong Ol Miting: Taim yumi bekim ol tok long ol miting, dispela bai helpim yumi long kisim bikpela amamas long ol miting. Long ol hap bilong ol miting i gat ol askim na bekim samting, olgeta long kongrigesen i mas tingim olsem ol i gat wok long insait long en. Ol bekim i sotpela na i bekim stret askim, ol dispela kain bekim i gutpela. Taim yumi kamapim sampela sotpela ekspiriens dispela inap strongim ol narapela, na yumi mas redi oltaim long kamapim ol ekspiriens sapos i stret long mekim olsem. (Snd 15:23; Ap 15:3) Taim yumi mekim wanpela tok long hap bilong miting, yumi mas givim bel tru long mekim bambai ol man i ken pilim tru na amamas long harim, na i mas stret tru long ol na helpim ol.
4 Bihain Long Ol Miting: Pasin bilong mekim ol gutpela tok wantaim ol narapela, na tok gude na amamas long ol, na stori long sampela bikpela tok ol brata i bin kamapim long miting, dispela bai helpim yumi olgeta. Sapos yumi kamapim olsem yumi amamas long lukim ol yangpela, na ol lapun, na ol nupela, dispela bai strongim pasin sori i stap namel long yumi lain brata. No ken mekim sampela tok bilong daunim sampela i no kam long olgeta miting. I gutpela yumi stori wantaim ol long ol amamas yumi kisim taim yumi kam long ol miting, na long dispela rot yumi inap strongim ol long kam.—Hi 10:24, 25.
5 Yumi no ken lusim dispela gutpela rot Jehova i redim bilong helpim yumi long strongim narapela narapela. (Ro 1:11, 12) Sapos yumi wok strong long mekim ol dispela samting bilong helpim ol miting, yumi olgeta bai amamas long kam long ol dispela miting Kristen.