Ol Yangpela—Wok Strong Long Kamap Pren Tru Bilong Jehova
1 Gutpela tok i stap long Buk Song 24:3-5, olsem: “Husat inap i go antap long maunten bilong God? Husat inap i go insait long haus bilong em yet? Man i no mekim pasin nogut, na bel bilong en i klin, man i no save lotu long ol giaman god, na man i no tok tru antap bilong giamanim narapela man, kain man olsem em inap. God bai i mekim gut long dispela kain man. God bai i kisim bek em na kolim em stretpela man.” Tru tumas, Jehova i laikim kain man olsem i stap pren bilong em. Em i save laikim ol man ol i no mekim pasin nogut, na bel bilong ol i klin, na ol i no giaman long mekim stretpela pasin, olsem mekim tok tru antap bilong giamanim narapela man. Mipela i amamas tru, long wanem, long nau planti yangpela Kristen i stap kain man olsem. Ol i stap gut long Jehova, na pasin bilong ol i litimapim nem bilong Jehova na oganaisesen bilong em. Ol i mekim gutpela klinpela pasin na long ai bilong God ol i stap gutpela tru.
2 Olsem wanem? I hatwok long ol yangpela i bihainim stretpela pasin long nau o nogat? Em hatwok. Long olgeta de traim i save painim ol. Long olgeta hap bilong graun i gat kain kain samting i save pulim ol man long mekim pasin doti na pasin i no stret. Yu ken mekim wanem bilong abrusim ol dispela samting? Yu mas wok strong long kamap pren tru bilong Jehova.
YUMI MAS MEKIM WANEM?
3 Sapos yumi laik i stap pren tru bilong Jehova yumi mas kisim save long olgeta pasin bilong em na laikim tru ol dispela pasin. Olsem na yumi mas wok strong long stadi long Baibel na long ol buk na nius samting bilong Baibel. Yumi mas mekim olsem Timoti i bin mekim, yumi mas “kisim bikpela strong long ol gutpela tok yumi bilip long en na long olgeta gutpela save [yumi] bin kisim na bihainim.” (1 Ti 4:6) Sapos yumi mekim olsem, dispela inap helpim yumi long save long gutpela pasin bilong Jehova, em i save mekim “gutpela tumas” long yumi. (Sng 27:4) Taim yumi kisim bikpela save moa long Jehova, dispela i pulim yumi i go klostu moa long em olsem pren tru bilong em.
4 Bilong kamap pren tru bilong God yumi mas lusim bikpela hap taim na yumi mas wok strong. Pol i bin tokim Timoti olsem: “Oltaim yu mas lukautim gut ol dispela wok bilong yu. Yu mas wok [strong] long mekim olgeta dispela wok i kamap gut, na bai olgeta manmeri i lukim pasin bilong yu yet i kamap gutpela tru.” (1 Ti 4:15) Sapos yu no kisim baptais yet, orait wok long kamap strong na bai yu dediket long God na kisim baptais. Yumi stap klostu long pinis bilong ol pasin nogut bilong nau, na yumi mas wok strong long “bihainim wanem kain pasin?” Yumi mas “bihainim olgeta pasin bilong God.” (2 Pi 3:11) Tingting bilong yumi long Jehova, em i God bilong yumi na Man bilong givim lo long yumi, dispela tingting em i bikpela samting tru. Sapos yumi laikim tru Jehova olsem gutpela papa bilong yumi, orait, dispela bai kirapim yumi long harim tok bilong em na bihainim pasin bilong em.—Mal 1:6.
5 Planti tausen yangpela insait long oganaisesen bilong Jehova i save wok strong na givim bel long mekim wok bilong autim tok. Ol i go long ol miting long Haus Kingdom na ol i amamas na redi long bekim tok. Sampela tausen ol i mekim wok painia. Ol i mekim gutpela wok long strong bilong skin bilong ol, na Sindaun 20:29 i tok, “dispela i mekim ol manmeri i amamas long ol.” Bilong kamap pren bilong God, yu mas wok strong long mekim wok bilong em, tasol sapos yu stap pren bilong em, em gutpela samting tru!
6 Planti bilong yupela ol yangpela i gat papamama Kristen i bin soim rot long yupela. Papamama i bin lainim yu long ol samting yu mas mekim bambai yu inap bihainim rot i go long laip. Yu mas bihainim tok bilong papamama, long wanem dispela pasin i stret long ai bilong God. (Ef 6:1) Ol i sori tru long yu na ol i laik bai yu winim ol traim. Ol i laik bai yu stap long nupela taim bihain, olsem na yu mas wok gut wantaim ol long ol taim ol i makim bilong stadi. Yu yet yu mas wok long kisim save long ol tok i tru na putim gut long bel bilong yu. Yu mas wok strong long kisim bikpela save long olgeta pasin bilong Jehova, na isi isi bai yu lain long laikim tumas em, na bai yu mekim wok bilong em inap oltaim oltaim.
[Ol Askim]
1. (a) Jehova i laikim wanem kain man i stap pren bilong em? (b) Ol yangpela i mas mekim wanem kain pasin na bai ol i kamap gutpela tru long ai bilong God?
2. (a) Bilong wanem nau i hatwok long ol yangpela i bihainim pasin i stret? (b) Yumi mas wok strong long mekim wanem na bai yumi inap bihainim pasin i stret?
3. (a) Bilong wanem yumi mas kisim save long Jehova? (b) Olsem wanem yumi ken kisim save long em? (c) Ol yangpela i mas kisim strong long wanem samting olsem 1 Timoti 4:6 i tok?
4. Bilong kamap pren bilong Jehova yumi mas mekim wanem, olsem 1 Timoti 4:15 i tok?
5. “Ol manmeri i save amamas” long wanem samting, olsem Sindaun 20:29 i tok?
6. (a) Planti papamama Kristen i bihainim tok bilong Efesus 6:1 na ol i mekim wanem? (b) Bilong wanem ol pikinini i mas wok gut wantaim papamama? (c) Sapos ol i mekim olsem, wanem samting bai kamap?