Ol Yangpela—Strongim Laik Bilong Yupela Long Mekim Wok Bilong Jehova
“God i bin wokim yumi olgeta. Olsem na long taim yupela i yangpela yet, yupela i mas tingim em.”—SAV. 12:1.
1. Wanem singaut i bin go long ol pikinini long Israel?
INAP olsem 3,500 yia i go pinis, profet bilong Jehova, Moses, i tokim ol pris na ol hetman bilong Israel: “Singautim olgeta man wantaim meri na pikinini . . . , bai olgeta i ken kam na harim dispela tok. Ol i ken harim na i stap aninit long God, Bikpela bilong yumi, na bihainim gut olgeta tok bilong em.” (Lo 31:12) Ol lain i mas i kam bung bilong mekim lotu, em ol man, ol meri, na ol pikinini. Yes, ol pikinini tu i stap namel long ol lain em ol i mas harim, kisim save, na bihainim ol tok bilong Jehova.
2. Olsem wanem Jehova i bin kamapim olsem em i tingim ol yangpela long kongrigesen Kristen bilong pastaim?
2 Long taim bilong ol aposel, Jehova i kamapim yet olsem em i tingim ol yangpela namel long lain bilong em. Olsem: Long sampela pas aposel Pol i salim i go long ol kongrigesen, Jehova i kirapim em long raitim sampela tok i go long ol yangpela. (Ritim Efesus 6:1; Kolosi 3:20.) Ol yangpela Kristen husat i bihainim dispela tok, ol i pilim moa yet ol gutpela pasin bilong Papa bilong ol long heven na kisim ol blesing i kam long em.
3. Ol yangpela long nau i mekim wanem bilong kamapim laik bilong ol long mekim wok bilong God?
3 Olsem wanem? Ol yangpela long nau ol tu i kisim singaut long kam bung bilong lotuim Jehova? Yes! Olsem na olgeta manmeri bilong God ol i amamas long lukim planti yangpela wokboi bilong God long olgeta hap bilong graun i bihainim dispela tok bilong Pol: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, olsem sampela man i save mekim. Nogat.” (Hi. 10:24, 25) Na tu, planti pikinini i save autim gutnius bilong Kingdom Bilong God wantaim papamama bilong ol. (Mt. 24:14) Na bilong kamapim olsem ol i laikim tru Jehova, long olgeta yia, planti tausen yangpela i save kisim baptais na amamas long ol blesing ol i kisim long rot bilong i stap disaipel bilong Krais.—Mt. 16:24; Mk. 10:29, 30.
Bihainim Singaut—Nau
4. Long wanem taim ol yangpela i ken kirap bihainim singaut bilong God long mekim wok bilong em?
4 Saveman 12:1 i tok: “God i bin wokim yumi olgeta. Olsem na long taim yupela i yangpela yet, yupela i mas tingim em.” Yupela ol yangpela i mas i gat hamas krismas na bai yupela inap bihainim dispela gutpela singaut long kam lotu long Jehova na mekim wok bilong em? Baibel i no kolim hamas krismas. Olsem na no ken surik long mekim olsem—nogut yu ting yu yangpela tumas long harim tok bilong Jehova na mekim wok bilong em. Maski yu gat hamas krismas, mipela i laik bai yu kirap kwiktaim na bihainim dispela singaut.
5. Ol papamama i ken mekim wanem bilong helpim ol pikinini bilong ol long kamap strong long tok i tru?
5 Planti bilong yupela i bin kamap strong long tok i tru long rot bilong ol helpim yupela i bin kisim long papa o mama bilong yupela o long tupela wantaim. Long dispela samting, yupela i wankain olsem Timoti. Taim em i stap bebi yet, mama bilong em Yunis, na bubu meri bilong em Lois, i bin lainim em long ol buk i gat tok bilong God. (2 Ti. 3:14, 15) Ating papamama bilong yu tu i mekim wankain samting na stadi wantaim yu long Baibel, beten wantaim yu, kisim yu i go long ol miting na kibung, na wok wantaim yu long autim tok. Tru tumas, wok bilong lainim yu long ol tok na ol lo bilong God em i wanpela bikpela wok papamama bilong yu i bin kisim long Jehova yet. Olsem wanem? Yu pilim tru pasin bilong ol long laikim na tingim yu?—Snd. 23:22.
6. (a) Olsem Song 110:3 (NW) i tok, Jehova i laik bai yumi mekim lotu long wanem kain pasin? (b) Nau bai yumi stori long wanem samting?
6 Tasol taim yupela ol yangpela i wok long kamap bikpela, Jehova i laik bai yupela i “save tru long laik bilong God . . . , long ol pasin i gutpela na long ol pasin God i laikim tumas na long ol pasin i inap tru na i stret olgeta,” olsem Timoti i bin mekim. (Ro. 12:2) Sapos yu mekim olsem, yu bai insait long ol wok bilong kongrigesen, long wanem, yu yet i gat laik long bihainim laik bilong God na i no olsem papamama bilong yu i laik bai yu mekim olsem. Sapos yu “amamas” long mekim wok bilong Jehova, dispela bai mekim Jehova i amamas. (Sng. 110:3, NW) Orait, olsem wanem yu ken soim olsem yu laik strongim laik bilong yu long harim tok bilong Jehova na bihainim? Bai yumi stori long 3-pela bikpela samting yu ken mekim. Em stadi, beten, na pasin yu bihainim. Orait nau bai yumi skelim dispela 3-pela samting.
Kisim Save Long Jehova Olsem Wanpela Man Yu Ken Pas Gut Wantaim Em
7. Olsem wanem Jisas i stap gutpela piksa long pasin bilong stadi long Tok Bilong God? Wanem samting i bin helpim em long mekim olsem?
7 Namba wan samting yu mas mekim bilong soim olsem yu laik strongim laik bilong yu long mekim wok bilong Jehova, em long rot bilong ritim Baibel long olgeta de. Yu ken inapim laik bilong yu long pas gut wantaim God na kisim gutpela save long Baibel, long rot bilong ritim Tok Bilong God long olgeta taim. (Mt. 5:3) Jisas i stap gutpela piksa long dispela samting. Taim em i gat 12-pela krismas, papamama i lukim em long tempel, “em i sindaun i stap namel long ol tisa . . . [na] harim tok bilong ol, na long askim ol tu.” (Lu. 2:44-46) Taim Jisas i pikinini yet, em i bin kisim pasin bilong laikim Tok Bilong God na long kliagut long en. Wanem samting i bin helpim em long mekim olsem? Mama bilong em, Maria, na waspapa bilong em, Josep, i bin mekim bikpela wok. Tupela i wokboi bilong God na ol i bin lainim Jisas long God kirap long taim em i bebi yet.—Mt. 1:18-20; Lu. 2:41, 51.
8. (a) Wanem taim ol papamama i mas stat long kirapim ol pikinini long kisim pasin bilong laikim tumas Tok Bilong God? (b) Kamapim wanpela ekspiriens i soim olsem i bikpela samting long skulim ol pikinini kirap long taim ol i bebi yet.
8 Long nau tu, ol papamama i stap daun long God ol i save em bikpela samting long putim laik bilong kisim save long tok i tru bilong Baibel long bel bilong ol pikinini, kirap long taim ol i bebi yet. (Lo 6:6-9) Em samting Rubi, wanpela sista Kristen, i bin mekim kwiktaim bihain long em i karim nambawan pikinini man bilong em, Joseph. Long olgeta de, em i save ritim ol tok bilong Baibel Stori Buk Bilong Mi long Joseph. Taim Joseph i wok long kamap bikpela, mama bilong em i helpim em long putim sampela skripsa long tingting. Olsem wanem? Dispela i bin helpim Joseph? Bihain tasol long em i stat long toktok, em inap kolim planti stori bilong Baibel long ol tok bilong em yet. Na taim em i gat 5-pela krismas, em i mekim namba wan tok bilong em long Skul Tiokratik Bilong Autim Tok.
9. Bilong wanem pasin bilong ritim Baibel na tingim tingim long bel ol tok yu ritim em i bikpela samting?
9 Bilong kamap strong moa long tok i tru, yupela ol yangpela i mas kisim pasin bilong ritim Baibel long olgeta de, na mekim yet dispela pasin long taim yu tineja i go inap long taim yu lapun. (Sng. 71:17) Bilong wanem pasin bilong ritim Baibel bai helpim yu long kamap strong? Tingim tok Jisas i mekim taim em i beten long Papa bilong em: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru.” (Jo. 17:3) Tru tumas, taim yu wok long kisim save moa long Jehova, yu bai pas gut moa wantaim em na laikim em moa yet. (Hi. 11:27) Olsem na olgeta taim yu ritim wanpela hap bilong Baibel, mekim wok long dispela taim bilong kisim sampela save moa long Jehova. Askim yu yet: ‘Dispela stori i skulim mi olsem wanem long Jehova? Olsem wanem dispela tok long Baibel i soim olsem God i laikim mi na tingim mi?’ Taim yu tingim tingim long bel ol kain askim olsem, dispela bai helpim yu long save long tingting bilong Jehova na ol samting em i pilim long bel na ol samting em i laik bai yu mas mekim. (Ritim Sindaun 2:1-5.) Na wankain olsem yangpela Timoti, yu bai “bilip strong” long ol tok bilong Baibel yu kisim save long en, na bel bai kirapim yu long amamas long lotuim Jehova.—2 Ti. 3:14.
Beten i Save Strongim Pasin Bilong Yu Long Laikim Jehova
10, 11. Olsem wanem pasin bilong beten i helpim yu long strongim laik bilong yu long mekim wok bilong God?
10 Namba 2 samting inap helpim yu long strongim laik bilong yu long givim bel olgeta long mekim wok bilong Jehova, em ol beten bilong yu. Song 65:2 i tok: “Yu save harim beten bilong mipela. Olsem na mipela olgeta manmeri i mas i go long yu.” Long taim ol Israel i stap lain bilong God, ol man bilong ol arapela kantri husat i kam long tempel bilong Jehova, ol tu inap beten long em. (1 Kin. 8:41, 42) God i save mekim wankain pasin long olgeta manmeri, maski ol i bilong wanem lain. Ol man husat i bihainim ol lo bilong em, ol i ken bilip olsem em bai harim beten bilong ol. (Snd. 15:8) Yupela ol yangpela, yupela tu i insait long dispela lain “olgeta manmeri.”
11 Pasin bilong toktok gut wantaim narapela i as bilong pasin bilong stap pren wantaim em. Ating yu amamas long kamapim long wanpela gutpela pren, ol tingting na ol wari bilong yu, na ol tingting i stap long bel. Na olsem tasol, long rot bilong mekim ol beten yu pilim tru long bel, yu inap toktok gut wantaim Man Bilong Wokim yu. (Fl. 4:6, 7) Long pasin i kain olsem yu kamapim bel bilong yu long wanpela gutpela papa o pren, tokim Jehova long ol tingting i stap long bel bilong yu. Taim yu kamapim bel bilong yu long Jehova, dispela bai kamapim klia yu gat wanem tingting long em. Yu bai luksave olsem, taim yu go klostu moa long Jehova olsem gutpela pren bilong em, ol beten bilong yu bai kamap gutpela moa.
12. (a) Olsem wanem yu inap mekim ol gutpela beten? (b) Wanem samting bai helpim yu long luksave olsem Jehova i stap klostu long yu?
12 Tasol tingim: Bilong mekim ol gutpela beten, no ken mekim long rot bilong kolim tasol ol tok. Yu mas kamapim tu ol samting yu pilim tru long bel. Long ol beten bilong yu, tokim Jehova yu laikim em na rispek long em, na yu bilip na wet long em i helpim yu. Taim yu luksave long olsem wanem Jehova i harim ol beten bilong yu, yu bai luksave olsem Jehova ‘i save stap klostu long ol manmeri i save bel tru na i singaut long em.’ (Sng. 145:18) Yes, Jehova bai kam klostu long yu, na em bai strongim yu long sakim Satan na helpim yu long wokim ol gutpela disisen.—Ritim Jems 4:7, 8.
13. (a) Pasin bilong i stap pren bilong God i bin helpim wanpela sista olsem wanem? (b) Olsem wanem pasin bilong stap pren bilong God inap helpim yu long sakim ol wanlain i laik pulim yu?
13 Tingim olsem wanem Cherie i kisim strong long rot bilong pas gut wantaim Jehova. Long haiskul, em i kisim sampela prais long kisim gutpela mak long ol tes na long mekim gut long spot. Taim em i pinisim skul, ol i tok long givim skolasip long em na bai em inap go long bikpela skul. Cherie i tok: “Dispela skolasip i wanpela gutpela samting tru na ol kosa na ol wanskul i strong long mi kisim.” Tasol em i save olsem sapos em i go long bikpela skul, em i mas lusim bikpela haptaim long stadi na trening long pilai spot na i no gat bikpela hap taim long mekim wok bilong Jehova. Cherie i mekim wanem? Em i tok: “Mi beten long Jehova, na bihain mi tok nogat long dispela skolasip na mi kirap mekim wok painia oltaim.” I kam inap nau, em i painia inap 5-pela yia. Em i tok: “Mi no bel hevi. Mi save disisen bilong mi i mekim Jehova i amamas, na dispela i mekim mi yet i amamas. Tru tumas, sapos yu putim Kingdom Bilong God i go pastaim, God bai givim olgeta arapela samting long yu.”—Mt. 6:33.
Gutpela Pasin i Kamapim Olsem ‘Bel Bilong Yu i Klin’
14. Bilong wanem gutpela pasin bilong yu i bikpela samting long ai bilong Jehova?
14 Namba 3 samting yu ken mekim bilong soim olsem yu amamas long mekim wok bilong Jehova, em long rot bilong ol pasin yu mekim. Jehova i save mekim gut long ol yangpela husat i bihainim stretpela pasin. (Ritim Song 24:3-5.) Yangpela Samuel i no laik tru long bihainim pasin pamuk bilong ol pikinini man bilong Hetpris Eli. Gutpela pasin bilong Samuel i no stap hait. Baibel i tok: “Long dispela taim Samuel i wok long kamap bikpela liklik, na Bikpela wantaim ol man i laikim em, na laik bilong ol i wok long kamap strong moa.”—1 Sml. 2:26.
15. Wanem sampela as na yu save bihainim gutpela pasin?
15 Yumi stap long taim we ol man i laikim ol yet tasol, hambak, sakim tok bilong papamama, no save tenkyu, pait na bagarapim ol man nabaut, tingim ol yet i bikpela man tru, laikim tumas ol kain kain pasin bilong amamas bilong dispela graun na ol i no laikim God—em sampela bilong ol pasin em Pol i kolim. (2 Ti. 3:1-5) Olsem na em i no isi long bihainim stretpela pasin long dispela taim nogut yumi stap long en. Tasol olgeta taim yu bihainim pasin i stret na yu no insait long pasin nogut, yu kamapim klia olsem yu stap long sait bilong Jehova long dispela bikpela tok i bin kamap long husat i gat rait long stap nambawan bos bilong heven na graun. (Jop 2:3, 4) Na tu, yu belgut long save olsem yu bihainim dispela gutpela singaut bilong Jehova: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” (Snd. 27:11) Taim yu save olsem Jehova i orait long yu, dispela i save strongim laik bilong yu long mekim wok bilong em.
16. Olsem wanem wanpela sista i bin mekim Jehova i belgut tru?
16 Taim wanpela sista Kristen, nem bilong em Carol, em i bin tineja na stap long skul, em i strong long bihainim ol stiatok bilong Baibel, na ol narapela i lukim dispela gutpela pasin bilong em. Wanem samting i kamap? Ol klasmeit i tok bilas long Carol, long wanem, maus bilong bel bilong em, em Baibel i skulim pinis, i no larim em i insait long sampela bung bilong holide na ol bung i litimapim kantri. Long ol kain taim olsem, Carol i gat rot long kamapim bilip bilong em long ol. Planti yia bihain, wanpela meri em bipo em klasmeit bilong Carol, em i salim wanpela kat long em, i tok: “Planti taim mi laik raitim pas long yu na tok tenkyu. Gutpela pasin yu bin bihainim olsem wanpela yangpela Kristen, na yu sanap strong na i no insait long ol bung bilong holide, dispela i no bin i stap hait. Yu namba wan Witnes Bilong Jehova mi bin bungim.” Dispela klasmeit i pilim tru gutpela pasin bilong Carol na bihain em i kirap stadi long Baibel. Long kat em i raitim long Carol, em i tok em i bin stap wanpela baptais Witnes winim 40 yia! Olsem Carol, yupela ol yangpela long nau husat i strongim bel na bihainim ol stiatok bilong Baibel, yupela inap kirapim ol man i gat gutpela bel long kisim save long Jehova.
Ol Yangpela i Litimapim Nem Bilong Jehova
17, 18. (a) Yu gat wanem tingting long ol yangpela long kongrigesen bilong yu? (b) Ol yangpela i stap daun long God ol i wetim wanem samting?
17 Yumi olgeta insait long oganaisesen bilong Jehova i stap long olgeta hap yumi amamas long lukim planti tausen yangpela em ol i givim bel long mekim ol wok insait long lotu i tru! Ol dispela yangpela i save strongim laik bilong ol long lotuim Jehova long rot bilong ritim Baibel long olgeta de, beten, na mekim ol pasin i stret wantaim laik bilong God. Ol kain yangpela olsem i save strongim bel bilong papamama bilong ol na olgeta manmeri bilong Jehova.—Snd. 23:24, 25.
18 Bihain, ol yangpela i stap gut long God ol bai stap namel long ol manmeri em ol bai abrusim bagarap na stap long nupela taim God i tok pinis long kamapim. (KTH 7:9, 14) Long dispela taim, ol bai kisim planti gutpela blesing tru na pilim moa yet ol gutpela pasin bilong Jehova, na ol inap litimapim nem bilong em i go inap olgeta taim bihain.—Sng. 148:12, 13.
Yu Inap Stori Long Dispela?
• Olsem wanem ol yangpela long nau inap mekim ol wok insait long lotu i tru?
• Bilong Baibel ritim i ken helpim yu, bilong wanem yu mas tingim tingim long bel ol tok yu ritim?
• Olsem wanem beten inap helpim yu long go klostu long Jehova?
• Gutpela pasin em Kristen i bihainim inap kamapim wanem samting?
[Piksa long pes 5]
Yu save ritim Baibel long olgeta de?