Ol Yangpela, Makim Olsem Yu Bai Lotuim Jehova
“Yupela i tingting gut nau. Bai yupela i lotu long husat?”—JOSUA 24:15.
1, 2. Kristendom i bin bihainim wanem ol kain pasin bilong baptais na ol dispela pasin i no stret?
“LARIM ol pikinini i kamap Kristen taim ol inap save long Krais.” Wanpela man, nem bilong em Tertullian, i bin raitim dispela tok klostu long yia 200 C.E. Em i no wanbel long baptaisim ol bebi, em samting i wok long kamap insait long lain Kristen i tromoi lotu i tru, long taim bilong em. Augustine, tisa bilong lotu, i no wanbel wantaim tok bilong Tertullian na Baibel, na em i tok baptais i save rausim mak bilong sin, na ol pikinini i dai na ol i no baptais yet ol bai go long helpaia. Dispela bilip i bin kirapim ol man long baptaisim ol bebi kwiktaim bihain long mama i karim ol.
2 Long nau yet planti misin bilong Kristendom i save baptaisim ol bebi bihain liklik long taim mama i karim ol. Na tu, kirap long bipo, ol bikman bilong gavman na bilong lotu bilong ol kantri ol i tok ol i Kristen, ol i save fosim ol “haiden,” em ol i winim ol long pait, long kisim baptais. Tasol Baibel i no sapotim pasin bilong baptaisim ol bebi na fosim ol man long kisim baptais.
Ol Wan Wan Yet i Mas Dediket
3, 4. Wanem samting inap helpim ol pikinini, em papamama bilong ol i dediket pinis, long dediket long laik bilong ol yet?
3 Baibel i tok sapos papa o mama i stap olsem gutpela Kristen, orait long tingting bilong God ol yangpela pikinini i stap holi. (1 Korin 7:14) Olsem wanem? Dispela i mekim na ol kain pikinini olsem ol i stap wokboi bilong Jehova i dediket pinis? Nogat. Tasol sapos papamama bilong ol pikinini ol i dediket long Jehova na ol i skulim gut ol pikinini, dispela inap kirapim ol pikinini long dediket long Jehova long laik bilong ol yet. Saveman King Solomon i bin tok: “Pikinini, yu mas harim tok bilong papamama bilong yu na yu no ken sakim tok bilong tupela. . . . Long taim yu wokabaut, dispela tok bai i soim rot long yu. Na long taim yu slip, bai dispela tok i was long yu. Na long taim yu kirap, bai dispela tok i givim gutpela tingting long yu. Tok bilong papamama i olsem wanpela lam i lait gutpela bilong soim rot long yu. Na taim tupela i stretim yu, tupela i soim yu gutpela pasin yu mas bihainim long laip bilong yu.”—Sindaun 6:20-23.
4 Gutpela tok ol papamama Kristen i mekim bilong stiaim ol pikinini inap lukautim ol yangpela, sapos ol i wok long bihainim dispela tok. Solomon i bin tok moa olsem: “Sapos pikinini man i gat gutpela tingting na save, orait papamama bilong en i amamas. Tasol sapos pikinini i bihainim longlong pasin, orait papamama i bel hevi tru.” “Pikinini bilong mi, harim tok bilong mi na kisim gutpela tingting. Yu mas tingting gut long wokabaut bilong yu.” (Sindaun 10:1; 23:19) Em nau, bilong ol tok bilong papamama i ken helpim yupela ol yangpela, yupela i mas i gat laik long kisim ol gutpela tok bilong helpim na stretim yupela. Yupela i no gat gutpela tingting taim mama i karim yupela, tasol yupela inap “kisim gutpela tingting” na long laik bilong yupela yet yupela inap bihainim pasin bilong “wokabaut” i go long laip.
Skulim Ol Olsem Wanem?
5. Pol i givim wanem gutpela tok long ol pikinini na long ol papa?
5 Aposel Pol i tok: “Yupela pikinini, yupela i mas bihainim tok bilong papamama bilong yupela. Yupela olgeta i pas wantaim Bikpela, na dispela pasin em i stretpela pasin bilong yupela i mekim. Buk bilong God i tok olsem, ‘Yu mas aninit long papamama bilong yu na bihainim tok bilong ol.’ Dispela lo em i namba wan lo i gat promis i stap wantaim, em promis i tok olsem, ‘Sapos yu mekim olsem, orait olgeta wok samting yu mekim i ken kamap gutpela, na bai yu stap longpela taim long dispela graun.’ Na yupela papa, yupela i no ken bagarapim tingting bilong ol pikinini bilong yupela na mekim ol i belhat long yupela. Nogat. Yupela i mas mekim gutpela pasin long ai bilong Bikpela, na stretim gut ol pikinini bilong yupela na skulim ol long tok bilong Bikpela.”—Efesus 6:1-4.
6, 7. Wanem samting i insait long pasin bilong skulim ol pikinini long tok bilong Jehova? Bilong wanem yumi ken tok dispela i no olsem papamama i bosim tumas tingting bilong pikinini?
6 Yu ting ol papamama Kristen i wok long bosim tumas tingting bilong ol pikinini taim ol i ‘stretim gut ol pikinini bilong ol na skulim ol long tok bilong Bikpela’? Nogat. Husat inap sutim tok long ol papamama taim ol i laik skulim ol pikinini long ol samting ol i ting em i stret na em inap helpim ol? Ol man i no sutim tok long ol man i no bilip long God taim ol i skulim ol pikinini olsem i no gat God i stap. Ol Katolik i pilim strong olsem ol i mas skulim ol pikinini long kamap Katolik, na ol man i no save sutim tok long ol taim ol i mekim olsem. Olsem na i no stret long ol man i sutim tok long ol Witnes Bilong Jehova, olsem ol i bosim tumas tingting bilong ol pikinini taim ol i skulim ol long tingting bilong Jehova long ol bilip na ol pasin ol i mas bihainim.
7 Buk Theological Dictionary of the New Testament, i tok dispela tok Grik ol i tanim “skulim” long Efesus 6:4 i makim pasin bilong “stretim tingting, stretim samting i no stret, mekim tingting man i holim long God i kamap gutpela moa.” Olsem wanem sapos wanpela yangpela i sakim skul papamama i givim em, long wanem, em i laik mekim ol samting ol wankrismas i mekim? Sapos samting olsem i kamap, orait nau husat i wok long bosim tumas tingting bilong pikinini—papamama o ol wankrismas? Sapos ol wankrismas i wok long kirapim em long kisim drak, dring planti tumas, o mekim pasin pamuk samting, yu ting i stret long sutim tok long papamama taim ol i wok long stretim tingting bilong pikinini na helpim em long luksave long ol hevi inap painim em sapos em i bihainim ol dispela pasin nogut?
8. Wanem samting i mekim na Timoti i bilip?
8 Aposel Pol i bin tokim yangpela man Timoti: “Yu mas holim strong dispela tok yu bin kisim na yu save bilip strong long en. Yu save gut long mipela ol manmeri i bin skulim yu long dispela tok. Na yu save, taim yu bin i stap liklik pikinini yet, yu stat long kisim save long ol buk i gat tok bilong God. Dispela ol buk ol inap long givim gutpela tingting long yu, na bai yu bilip long Krais Jisas, na bai God i kisim bek yu.” (2 Timoti 3:14, 15) Kirap long taim Timoti i liklik yet, mama na bubu meri i bin skulim em long tok bilong Baibel na dispela i bin strongim tru bilip bilong em long God. (Aposel 16:1; 2 Timoti 1:5) Bihain, taim ol i kamap Kristen, ol i no gat wok long fosim Timoti long bilip, nogat, ol i toktok gut wantaim em long ol tok bilong Baibel na em i bilip.
Jehova i Singautim Yu Long Makim Rot
9. (a) Olsem wanem Jehova i givim ona long ol man na ol ensel em i wokim? Bilong wanem em i mekim olsem? (b) Dispela wanpela Pikinini tasol bilong God i mekim wanem long laik bilong em yet?
9 Jehova inap wokim ol man na ol ensel olsem wanpela masin we ol bai mekim tasol ol samting Jehova i laik bai ol i mekim na ol i no inap mekim narapela samting. Tasol nogat, em i givim ona long ol na larim ol yet i makim ol samting ol i laik mekim. God bilong yumi i laik bai yumi mekim wok bilong em long laik bilong yumi yet. Em i amamas long lukim ol man, ol lapun na ol yangpela, i lotuim em, long wanem, ol i laikim em tumas. Nambawan gutpela piksa bilong man i laikim God na daun long Em, em dispela wanpela Pikinini tasol bilong em. Jehova i tok long em olsem: “Dispela em i Pikinini bilong mi. Mi laikim em tumas. Bel bilong mi em i amamas long em.” (Matyu 3:17) Dispela fesbon Pikinini i tokim Papa: “God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.”—Song 40:8; Hibru 10:9, 10.
10. Bilong mekim wok Jehova bai amamas long en yumi mas mekim wanem?
10 Ol man i stap aninit long Jisas na mekim wok bilong Jehova, ol i mas amamas long daun long laik bilong Jehova, wankain olsem Jisas. Man bilong raitim song i mekim tok profet olsem: “Taim yu laik pait long ol birua ol manmeri bilong yu bai i go wantaim yu na helpim yu, na bai yupela i go antap long maunten bilong God. Olgeta nait, wara i save kamap long gras, na gras i kisim nupela strong. Na bai yu tu yu kisim strong long olgeta de.” (Song 110:3) Oganaisesen olgeta bilong Jehova, hap i stap long heven na hap i stap long graun, i laik stap daun long mekim laik bilong God.
11. Ol yangpela husat i gat papamama i dediket pinis na ol i bin mekim bikpela long ol, ol dispela yangpela i mas wokim wanem disisen?
11 Olsem na ol yangpela, yupela i mas kliagut olsem ol papamama na ol elda Kristen long kongrigesen ol i no inap fosim yu long baptais. Yu yet i mas i gat laik long mekim wok bilong Jehova. Josua i bin tokim ol Israel: “Yupela i mas pret long Jehova na mekim wok bilong em long pasin i stret olgeta na i tru.” “Yupela i tingting gut nau. Bai yupela i lotu long husat?” (Josua 24:14-22; NW) Olsem na yupela yet i mas wokim disisen na makim olsem yupela bai dediket long Jehova na givim laip bilong yupela long mekim laik bilong em o nogat.
Luksave Long Wok Yu Mas Mekim
12. (a) Tru, ol papamama inap skulim gut ol pikinini, tasol wanem samting papamama i no inap mekim? (b) Kirap long wanem taim bai Jehova i kotim ol yangpela long ol samting ol i makim long mekim?
12 Bihain, pasin bilong papamama bilong yu long stap gut long Jehova i no inap lukautim yu moa. (1 Korin 7:14) Disaipel Jems i tok: “Sapos yu save pinis long wanpela gutpela pasin yu mas mekim, tasol yu no mekim, orait yu mekim sin.” (Jems 4:17) I no inap papamama i mekim wok bilong God bilong helpim pikinini, na pikinini tu i no inap mekim wok bilong God bilong helpim papamama. (Esekiel 18:20) Olsem wanem? Yu kisim save pinis long Jehova na ol samting em i tingting pinis long mekim? Yu kliagut long samting yu lainim na yu kirap pinis long pas gut wantaim Jehova? Olsem na yumi inap ting olsem God i ting yu yet inap wokim disisen long mekim wok bilong em, a?
13. I gutpela sapos ol yangpela i no baptais yet i tingim wanem ol askim?
13 Olsem wanem? Yu wanpela yangpela i no baptais yet na papamama bilong yu i save lotuim God, na yu save bung long ol miting Kristen na yu save insait long wok bilong autim gutnius bilong Kingdom? Sapos olsem, orait askim yu yet olsem: ‘Bilong wanem na mi mekim ol dispela samting? Mi save go long ol miting na mekim wok autim tok bikos papamama i laik bai mi mekim o mi mekim, long wanem, mi laik amamasim Jehova?’ Olsem wanem? Yu bin stadi gut na yu save tru long “ol pasin i gutpela na long ol pasin God i laikim tumas na long ol pasin i inap tru na i stret olgeta”?—Rom 12:2.
No Ken Surik Long Kisim Baptais
14. Wanem ol stori i stap long Baibel i soim olsem i no stret long man i surikim nating taim bilong em long kisim baptais?
14 “Ating wanpela samting i pasim rot na mi no inap kisim baptais?” Man bilong Itiopia i bin givim dispela askim long Filip bihain stret long em i kisim save olsem Jisas em i Mesaia. Tasol save dispela man Itiopia i gat long Baibel em inap long em i ken luksave olsem em i no ken surik long tokaut olsem kirap long dispela taim na i go em bai mekim wok bilong Jehova wantaim kongrigesen Kristen, na dispela i mekim em i amamas. (Aposel 8:26-39) Na i wankain long wanpela meri, nem bilong em Lidia, em “Bikpela i tanim bel bilong em, na em i putim yau long dispela tok Pol i mekim,” na wantu em wantaim ol wanhaus i “kisim baptais.” (Aposel 16:14, 15) Na tu i wankain long woda long Filipai husat i harim tok bilong Pol na Sailas taim “tupela i autim tok bilong Bikpela long em,” na “em wantaim olgeta lain bilong en i kisim baptais.” (Aposel 16:25-34) Olsem na sapos yu save long Jehova na ol samting em i tingting pinis long mekim, yu gat laik tru long mekim laik bilong em, yu gat gutnem insait long kongrigesen na yu save kam oltaim long ol miting na oltaim yu save autim tok bilong Kingdom, orait i gat wanem as na yu surik long kisim baptais?—Matyu 28:19, 20.
15, 16. (a) Wanem tingting kranki inap mekim na sampela yangpela i no laik kisim baptais? (b) Olsem wanem pasin bilong dediket na baptais inap lukautim ol yangpela?
15 Olsem wanem? Yu save surik long kisim baptais, long wanem, yu pret olsem yu bai i gat kot sapos yu pundaun na mekim rong? Sapos olsem, tingim dispela tok piksa: Bai yu tok maski long traim long kisim laisens bilong draivim ka bikos yu pret olsem bihain bai yu insait long wanpela eksiden? Nogat! Olsem na sapos yu winim mak bilong kisim baptais yu no ken surik. Tru tumas, taim yu dediketim pinis laip bilong yu long Jehova na tokaut olsem yu bai mekim laik bilong em, dispela bai strongim yu long sakim ol pasin nogut. (Filipai 4:13) Ol yangpela, no ken ting olsem sapos yu no kisim baptais bai yu inap abrusim kot. Nogat. Taim yu save pinis long laik bilong Jehova, orait long dispela taim yu mas tokim Jehova long as bilong olgeta samting yu bin mekim, maski yu baptais pinis o nogat.—Rom 14:11, 12.
16 Planti Witnes long olgeta hap i pilim olsem disisen bilong ol long kisim baptais taim ol i yangpela i bin helpim ol tru. Tingim wanpela Witnes i gat 23 krismas long Westen Yurop. Em i tok taim em i kisim baptais taim em i gat 13 krismas, dispela i bin kirapim em long was gut na “givim baksait long olgeta kain laik nogut i save kamap long bel bilong ol yangpela man.” (2 Timoti 2:22) Taim em i yangpela yet em i bin putim mak long mekim wok autim tok fultaim. Long nau em i amamas long mekim wok long wanpela brens ofis bilong ol Witnes Bilong Jehova. Ol gutpela samting i wetim ol yangpela husat i wokim disisen bilong mekim wok bilong Jehova. Yu tu inap kisim ol gutpela samting olsem.
17. Yumi gat wok long save gut long “laik bilong Bikpela” long wanem ol samting?
17 Kirap long taim yumi dediket na baptais bai yumi tingim laik bilong Jehova long olgeta samting yumi mekim. Bilong truim dediket bilong yumi, yumi mas i “gat taim bilong mekim.” Bai yumi mekim olsem wanem? Bai yumi no yusim taim bilong yumi long mekim sampela samting bipo yumi bin mekim, em ol samting i no gat as bilong en. Na bai yumi yusim dispela taim bilong stadi gut long Baibel, go oltaim long ol miting, na insait long wok bilong ‘autim gutnius bilong kingdom’ inap tru long skel bilong yumi. (Efesus 5:15, 16; Matyu 24:14) Dediket bilong yumi long Jehova na laik bilong yumi long mekim laik bilong em bai mekim olgeta samting yumi mekim i kamap gutpela moa—olsem ol samting yumi mekim bilong kisim amamas na malolo, pasin bilong yumi long kaikai na dring, na ol musik yumi save harim. Em i gutpela long makim ol samting bilong amamas na malolo em yu inap amamas long en inap olgeta taim bihain. Planti tausen yangpela Witnes, em ol i amamas i stap, inap tokim yu long ol gutpela rot bilong painim amamas i stret wantaim “laik bilong Bikpela.”—Efesus 5:17-19.
“Mipela i Laik Kamap Wanlain Wantaim Yupela”
18. I gutpela sapos ol yangpela i givim wanem askim long ol yet?
18 Kirap long 1513 B.C.E. i go inap long Pentikos 33 C.E., Jehova i gat wanpela lain pipel em i bin makim bilong lotuim em na stap olsem witnes bilong em. (Aisaia 43:12) Mama bilong ol yangpela Israel i bin karim ol insait long dispela lain. Kirap long Pentikos, Jehova i gat nupela “lain” hia long graun, em lain Israel bilong spirit, “wanpela lain i holim nem bilong em.” (1 Pita 2:9, 10; Aposel 15:14, NW; Galesia 6:16) Aposel Pol i tok Krais i mekim wanpela lain i kamap klin tru na ol i stap “lain manmeri bilong em yet, na [ol i] wok strong long mekim olgeta kain gutpela pasin.” (Taitus 2:14) Em samting bilong yupela ol yangpela long skelim na makim olsem dispela lain i stap we. Husat long nau i olsem “dispela stretpela lain ol i save holimpas stretpela pasin,” ol i bihainim ol stiatok bilong Baibel, ol i stap gutpela Witnes Bilong Jehova, na ol i autim tok olsem Kingdom bilong em tasol inap helpim ol man? (Aisaia 26:2-4, NW) Lukluk long ol misin bilong Kristendom na ol narapela lotu, na skelim pasin bilong ol wantaim ol tok Baibel i kamapim long pasin ol trupela wokboi bilong God i mas bihainim.
19. Planti milion manmeri long olgeta hap i bilip strong long wanem samting?
19 Planti milion manmeri long olgeta hap, na planti yangpela tu, ol i bilip strong olsem liklik lain remnan bilong ol Kristen God i bin makim long lain Witnes Bilong Jehova ol i dispela “stretpela lain.” Ol i tokim ol dispela lain Israel bilong spirit olsem: “Mipela i harim olsem God i stap wantaim yupela Juda. Olsem na mipela i laik kamap wanlain wantaim yupela.” (Sekaraia 8:23) Mipela i gat bikpela laik tru na mipela beten olsem yupela ol yangpela bai wokim disisen long i stap wantaim ol lain manmeri bilong God na makim olsem yu laik “bihainim rot bilong i stap gut”—em laip oltaim oltaim long nupela taim Jehova bai kamapim.—Lo 30:15-20; 2 Pita 3:11-13.
Sampela Askim
• Wanem samting i insait long pasin bilong skulim ol pikinini long tok bilong Bikpela?
• Bilong mekim wok Jehova bai amamas long en yumi mas mekim wanem?
• Ol yangpela husat i gat papamama i dediket pinis na ol i bin mekim bikpela long ol, ol dispela yangpela i mas wokim wanem disisen?
• Bilong wanem i no stret long man i surikim nating taim bilong em long kisim baptais?
[Ol Piksa long pes 26]
Bai yu bihainim tok bilong husat?
[Piksa long pes 28]
Olsem wanem dediket na baptais inap lukautim yu?
[Piksa long pes 29]
Wanem samting i pasim yu long kisim baptais?