‘Gutpela Mi Kisim Baptais?’

TAIM yumi stap laip, i gat wanpela bikpela samting tru yumi mas tingim, winim ol narapela samting. Dispela bikpela samting yumi mas tingim em olsem: ‘Gutpela mi kisim baptais?’ Bilong wanem dispela em i bikpela samting tru? Long wanem, samting yumi tingting long mekim long dispela, em bai stiaim wokabaut bilong yumi, na em bai helpim yumi long i stap laip oltaim long bihain, o em bai nogutim yumi.

Orait, dispela bikpela askim, ‘Gutpela mi kisim baptais?’ em wanpela samting yu yet yu mas tingim? Ating yu bin stadi long Baibel wantaim ol Witnes Bilong Jehova inap longtaim liklik, o papamama i bin skulim yu long tok bilong Baibel taim yu liklik yet i kam inap nau. Orait, nau yu mas tingim gut samting yu bai mekim. Bilong tingim gut na bai samting yu mekim i stret, yu mas save, baptais i bilong makim wanem samting, na husat i mas kisim baptais.

Ol Samting Bilong Baptais

Bilong save long ol samting bilong baptais, yumi ken tok piksa long de bilong marit. Man na meri i laik marit, narapela i save gut long narapela na ol i stap wanbel na pas gut wantaim. Orait, nau long de bilong marit tupela i mas sanap long ai bilong ol man na tokaut long ol samting tupela i pasim tok pinis long mekim, olsem nau tupela i laik marit. Taim tupela i marit pinis, tupela inap kisim ol amamas bilong marit, na tu, ol i mas mekim ol wok bilong man na meri marit olsem ol i tok promis long mekim.

Orait, baptais i wankain liklik. Taim yumi stadi long Baibel, yumi kisim save long ol gutpela samting Jehova i bin mekim bilong helpim yumi. Em i bin givim laip long yumi na olgeta narapela samting yumi mas kisim bilong helpim yumi long i stap laip. Tasol em i givim Pikinini bilong em tu bilong opim rot bambai ol sinman bilong graun inap kamap wanbel wantaim Jehova na pas gut long em na bai ol inap kisim laip i stap oltaim long paradais long graun. Taim yumi tingim ol dispela samting, dispela i kirapim yumi long mekim wanpela samting, a?

Olsem na yumi ken mekim wanem? Krais Jisas i tokim yumi: “Sapos wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en na bihainim mi.” (Matyu 16:⁠24) Em nau, yumi inap kamap disaipel bilong Krais Jisas na bihainim pasin bilong em long mekim wok bilong Papa bilong em Jehova. Tasol bilong mekim olsem, yumi mas ‘daunim laik bilong yumi yet,’ olsem yumi pasim tok long bel bilong yumi olsem: Long laik bilong yumi yet yumi laik putim laik bilong God i stap nambawan na laik bilong yumi i stap nambatu. Bilong mekim olsem, yumi givim skin bilong yumi long Jehova bilong mekim wok bilong em, olsem dediket long em. Orait, bilong kamapim long ples klia dispela tok promis yumi pasim pinis long bel bilong yumi, i gat wanpela bung i save kamap, na long ai bilong ol man yumi kisim baptais long wara bilong makim olsem yumi dediket pinis long God.

Husat i Ken Kisim Baptais?

Jisas i bin tokim ol disaipel, ‘Yupela go mekim olgeta lain manmeri i kamap disaipel bilong mi. Na baptaisim ol long nem bilong Papa na bilong Pikinini na bilong Holi Spirit. Na lainim ol long bihainim olgeta tok mi bin givim long yupela.’ (Matyu 28:​19, 20) Dispela tok i kamapim klia olsem: Ol man i laik kisim baptais, ol i mas i gat tingting olsem bilong man i bikpela pinis. Ol i bin lain long ol tok bilong God long Baibel, na long bel ol i pilim tru olsem ol i mas tanim bel na lusim olpela pasin na wokabaut bilong ol. (Aposel 3:19) Orait, nau ol i save pinis ol i mas kamap disaipel bilong Jisas na autim tok olsem em i bin mekim. Ol i mas mekim ol dispela samting paslain long taim ol i kisim baptais.

Olsem wanem long yu? Yu kamap pinis long dispela mak? Yu gat laik long mekim wok bilong God? Sapos olsem, orait yu mas beten na tingim gut stori bilong man Itiopia long Baibel, long Aposel sapta 8. Taim wanpela disaipel i kamapim klia ol tok profet i makim Mesaia Jisas, dispela man i skelim gut tingting na bel bilong em na em i askim olsem: “Ating wanpela samting i pasim rot na mi no inap kisim baptais?” I olsem i no gat wanpela samting i pasim em, olsem na em i kisim baptais.​—⁠Aposel 8:​26-38.

Long nau tu planti ol i gat dispela wankain askim: “Ating wanpela samting i pasim rot na mi no inap kisim baptais?” Olsem na long 1991 inap 300,945 manmeri i kisim baptais. Lain bilong Jehova i amamas tru long dispela samting, na ol elda long ol kongrigesen i amamas long helpim ol narapela i gat gutpela bel na bai ol i ken wok long kamap strong na inapim ol mak bilong kisim baptais.

Tasol ating ol elda i tokim yu, gutpela yu wet pastaim. O sapos yu yangpela yet, ating papamama i tokim yu long wet pastaim. Orait, nau bai yu mekim wanem? Yu no ken bel hevi. Yu mas save, em bikpela samting tru long kamap pren bilong God Antap Tru na stap wanbel wantaim em​—⁠yu mas kisim stretpela pasin na bihainim oltaim. Olsem na yu mas harim gut ol tok ol i givim long yu bilong helpim yu, na yu mas givim bel long bihainim. Tasol sapos yu no klia gut long as bilong sampela tok ol i givim long yu, orait yu no ken sem long askim ol, na bai yu ken save gut long ol samting yu mas mekim.

Tasol sampela ol i surik long dediket na kisim baptais. Yu wanpela bilong ol? Sapos olsem, ating i gat as na yu laik wet pastaim. O ating yu inapim pinis ol mak tasol yu surik long kisim baptais. Sapos olsem, orait yu mas askim yu yet: “Ating wanpela samting i pasim rot na mi no inap kisim baptais?” Beten na skelim gut ol samting na bai yu ken save, i gat as tru na yu no dediket long Jehova na kamap wanbel wantaim em o olsem wanem?

‘Mi Yangpela Yet’

Sapos yu yangpela, ating bai yu tok, ‘Mi yangpela yet.’ Tru, sapos yangpela i bihainim tok bilong papamama Kristen na wok strong long bihainim ol lo bilong Baibel, em i olsem “holi” long ai bilong Jehova. Baibel i tok, sapos papamama i bihainim stretpela pasin, Jehova i orait long ol yangpela pikinini bilong ol. (1 Korin 7:14) Tasol Baibel i no kolim hamas krismas bilong pikinini na Jehova i kirap skelim em long ol samting em yet i mekim. Olsem na ol yangpela Kristen i mas tingim gut dispela askim: ‘Gutpela mi kisim baptais?’

Baibel i laik kirapim ol yangpela long ‘tingim God taim ol i yangpela yet.’ (Saveman 12:⁠1) Samuel i bin mekim olsem. Taim ‘em i manki yet em i mekim wok bilong Jehova.’ Na Timoti tu, taim em i liklik yet, mama wantaim bubu bilong em i bin lainim em long tok i tru, na em i putim gut long bel bilong em.​—⁠1 Samuel 2:18; 2 Timoti 1:5; 3:​14, 15.

Long nau tu, planti yangpela i dediket pinis long Jehova bilong mekim wok bilong em. Akefusa i gat 15 krismas, na em i tok, i gat wanpela tok i bin kamap long Miting Bilong Wok Autim Tok na dispela i bin helpim em na em i pasim tok long bel olsem em bai kisim baptais. Ayumi i kisim baptais taim em i gat 10-pela krismas. Em i laik mekim wok bilong Jehova, long wanem em i laikim tumas Jehova. Nau em i gat 13 krismas, na em i amamas long lukim Baibel-stadi bilong em i kisim baptais taim em i gat 12-pela krismas. Liklik brata bilong Ayumi, em Hikaru, em tu i kisim baptais taim em i gat 10-pela krismas. Em i tok, “Sampela i tok mi yangpela tumas. Tasol Jehova i save long bel bilong mi. Taim mi pasim tok pinis long bel olsem mi laik dediket long God bilong mekim wok bilong em, mi strong long mi mas kisim baptais.”

Pasin bilong papa o mama tu inap helpim ol yangpela. Wanpela yangpela sista i tok, papa i bin tambuim mama long stadi wantaim em na brata susa bilong em long Baibel. Papa i paitim ol na kukim ol buk bilong ol. Tasol mama i sanap strong long bilip, olsem na ol pikinini i save, em i bikpela samting long mekim wok bilong Jehova. Dispela yangpela meri i kisim baptais taim em i gat 13 krismas, na ol brata susa i bihainim pasin bilong em na ol tu i baptais.

‘Mi Lapun Pinis’

Man bilong raitim song long Baibel i tok: “Ol yangpela man . . . na ol lapun . . . yupela olgeta litimapim nem bilong [Jehova]!” (Song 148:​12, 13) Em nau, ol lapun tu i mas mekim wok bilong Jehova. Sampela lapun i no laik senisim sampela samting long i stap bilong ol. Ol i tok, em hatwok long ol lapun i lain long mekim nupela wok. Tasol tingim Abraham: Taim em i gat 75 krismas Jehova i tokim em: “Yu lusim graun bilong yu, . . . na ol lain bilong papa bilong yu, na yu go long wanpela graun bai mi soim yu long en.” (Aposel 7:3; Stat 12:​1, 4) Moses i gat 80 krismas taim Jehova i tokim em: “Bringim ol manmeri bilong mi . . . i lusim Isip na i kam.” (Kisim Bek 3:10) Dispela tupela man i lain pinis long kain sindaun bilong ol na ol i stap olsem inap planti yia taim Jehova i laik bai ol i kamapim klia olsem ol i givim bel long em. Orait, ol i no gat tupela tingting​—⁠kwiktaim ol i bihainim tok bilong Jehova.

Olsem wanem long nau? Sisumu i bin i stap long lotu Buda inap 78 yia na em i kirap stadi long Baibel. Famili bilong em i birua long em, na maski em i papa bilong haus, ol i no larim em i stadi long haus bilong em. Orait, em i stadi inap wanpela yia tasol na em i save em i mas dediket long Jehova, olsem na em i kisim baptais. Wanem samting i mekim na em i senisim lotu bilong em? Em i tok: “Inap planti yia lotu giaman i bin giamanim mi, na mi laik kisim tok i tru long Jehova inap oltaim oltaim.”

‘Em i Save Kisim Bek Yupela’

Taim i sot pinis. Bikpela bagarap i laik painim ol man. Olsem na yu no ken lusim taim​—⁠yu mas tingting gut na dediket long Jehova na kisim baptais. Aposel Pita i tokaut olsem: “God i save kisim bek yupela long . . . baptais.” Na em i tok, baptais “i no bilong rausim doti bilong skin (long wanem, man i mekim pinis dispela samting taim em i wok long inapim ol mak bilong kisim baptais). Nogat. Em i promis yupela i mekim long God long [bel bilong] yupela bai i stap klin long ai bilong en.”​—⁠1 Pita 3:⁠21.

Taim wanpela disaipel em inapim pinis ol mak Jehova i putim na em i kisim baptais, nau ‘bel bilong em i stap klin long ai bilong God.’ Sapos em i wok strong long mekim wok bilong Jehova, nau bel bilong em bai stap isi, na em bai stap belgut. (Jems 1:25) Na bikpela samting tru, em inap tingting long i stap oltaim na kisim ol gutpela samting long Jehova long nupela taim bihain. Orait, olsem wanem long dispela askim, ‘Gutpela mi kisim baptais?’ Sapos yu bekim tok olsem: ‘Yes, mi mas kisim baptais,’ bai yu tu inap kisim ol dispela gutpela samting long Jehova inap oltaim oltaim.

[Piksa long pes 21]

Taim Samuel i manki yet em i mekim wok bilong Jehova

[Piksa long pes 22]

Moses i gat 80 krismas taim em i kirap mekim wok bilong Jehova

[Ol Piksa long pes 23]

Long nau ol yangpela na lapun i kisim baptais pinis ol inap tingting long kisim ol gutpela blesing inap oltaim oltaim long nupela taim God bai kamapim