Ol Yangpela i Mekim Jehova i Belgut
“Yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”−PROVEP 27:11.
1. Ol samting yumi mekim, dispela i mekim wanem samting long papamama bilong yumi?
ATING yu save o nogat, tasol ol samting yu mekim em bikpela samting. Em bikpela samting long papamama bilong yu. Baibel i tok: “Sapos pikinini man i gat gutpela tingting na save, orait papamama bilong em i amamas. Tasol sapos pikinini i bihainim longlong pasin, orait papamama i belhevi tru.” (Provep 10:1; 23:24, 25) Na bikpela samting moa em olsem: Ol samting yu mekim em inap amamasim God Jehova o mekim em i bel hevi. Jehova i tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”−Provep 27:11.
2 Man i sutim tok long Jehova, em Seten. Long Gaden Iden Seten i kamapim wanpela bikpela tok na God i mas stretim. Taim Seten i pulim Iv na bihain Adam long brukim lo bilong God na i olsem i no hatwok long em i mekim, i gat sampela samting i makim olsem nau Seten i kirap sutim tok bilas long God, olsem: ‘Sapos yu givim rot long mi, mi inap pulim olgeta man na bai ol i lusim yu.’ (Jop 1:6-12) Olsem na Jehova i mekim dispela gutpela tok long Provep 27:11. Em i singaut long pikinini bilong em bambai em inap “bekim tok” long Seten.
3 Tasol Jehova i singaut long husat tru na em i kolim em “pikinini bilong mi”? Krais Jisas em i pikinini tru bilong God; em i dispela wanpela Pikinini tasol God wanpela i bin wokim em. (Jon 1:14) Na Jisas wanpela tasol em i man i nambawan olgeta, olsem na em inap kamapim tru olsem man inap i stap gut long God. Adam tu em i man i nambawan olgeta, tasol em i no stap gut long God. (1 Korin 15:45) Olsem na Jehova i singaut tru long Jisas. Na Jisas i mekim dispela samting Papa bilong em i laik bai em i mekim. Em i stap gut long God, em Papa bilong em, na God inap bekim tok long Seten, em Seten i hambak na tok bilas long God, na em i tok, sapos em i putim traim long ol man bai ol i lusim God. (Hibru 2:14; 12:2) Na olgeta manmeri ol bai mekim wok king wantaim Krais long heven, ol tu bai mekim Jehova i belgut, long wanem ol i stap gut long Em inap long taim ol i dai.−Revelesen 2:10.
4 Tasol olsem wanem long yumi long nau? Olsem wanem long yupela ol yangpela? Yu insait long dispela bikpela tok, olsem ol man bai i stap gut long God o nogat? Tru tumas yu insait long en! (Sam 147:11; 148:12, 13) Ating yu save o nogat, tasol ol samting yu mekim em i helpim God long bekim tok long Seten, o em i helpim tok bilas bilong Seten. Ol samting yu mekim i amamasim Jehova o amamasim Seten. Olsem na singaut bilong Jehova i go long yu tu, em Jehova i tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” (Provep 27:11) Sapos yu wok long mekim Man bilong wokim yu i belgut tru, em nambawan gutpela wok yu ken mekim, a?
Sapos Yu Mekim Olsem, Olsem Wanem Yu Bihainim Savepasin?
5 Jehova i tok, yumi mas “kisim gutpela tingting na save.” Sapos yumi wok long mekim Jehova i belgut, olsem wanem yumi bihainim savepasin? Long wanem Jehova em i gutpela Papa bilong yumi, em i gat bikpela sori long yumi na em i laik helpim yumi. Olsem na olgeta samting em i tokim yumi long mekim em i bilong helpim yumi. Long Aisaia 48:17, 18 (NW ) Jehova i tok: “Mi Jehova, mi God bilong yu, na mi save lainim yu long pasin bilong helpim yu yet; mi Man bilong mekim yu i wokabaut long rot i stret yu mas wokabaut long en. Mi laik bai yu bihainim tok bilong mi! Olsem bai bel isi bilong yu i kamap olsem wanpela bikpela wara, na stretpela pasin bilong yu bai kamap olsem si bilong solwara.”
6 Jehova em i gutpela Papa, em i givim laip long yu na yu stap na em i laik bai yu stap amamas. Olsem na em i tok: “Yes, yangpela man: Nau yu mas amamas taim yu stap yangpela yet, na bel bilong yu i mas amamasim yu taim yu stap yangpela man, na yu mas bihainim laik bilong bel bilong yu na ol samting ai bilong yu i save lukim. Tasol bihain bai God tru i mekim kot na skelim ol dispela samting yu mekim.” (Eklisiastis 11:9, NW ) Tru tumas, yu no inap abrusim dispela kot; God bai bekim pe long yu long pasin yu bin mekim. Dispela lo i stret, olsem: “Sapos man i planim pikinini bilong kaikai, orait dispela kain kaikai tasol bihain bai em i kamautim.”−Galesia 6:7.
7 Olsem na Jehova i tok moa olsem: “Olsem na yu mas lusim ol samting i save mekim bel bilong yu i gat hevi [o mekim yu tingting planti], na yu mas abrusim ol samting i save bagarapim skin bilong yu; long wanem strong bilong ol yangpela manmeri, na yangpela bilong ol, em i giaman tasol.” (Eklisiastis 11:10, NW ) Tru tumas, sapos yu klia long ol pasin em inap givim hevi long yu long bihain, yu bihainim savepasin. Tru, sampela man bai tok yu lus long kisim gutpela amamas, long wanem yu no bin spak o mekim pasin pamuk o mekim narapela kain pasin olsem. Tasol ol dispela man i longlong! Wanpela yangpela sumatin i mekim pasin pamuk, na bihain em i krai na em i tok, “Mi no kisim amamas; inap long nau bel bilong mi i gat hevi na mi tingting planti.”
8 Olsem na yupela ol yangpela manmeri: Yupela i mas bihainim savepasin−bihainim tok bilong God na abrusim ol samting em inap mekim bel bilong yu i gat hevi. Planti yangpela manmeri i mekim nabaut na bihainim laik bilong ol yet tasol na hevi i painim ol. Wanpela man bilong raitim buk, em i stap 300 samting yia bipo, em i tok: ‘Planti man i lusim yangpela bilong ol long mekim ol samting bihain bai givim hevi long ol.’ Dispela tok i stret, tasol sori tru! Taim yangpela man i mekim nabaut na lusim strong bilong em long ol samtingbihain bai givim hevi na hatwok long em, tru tumas, strong bilong em na yangpela bilong em i giaman tasol−i lus nating tasol! (Provep 22:3) Olsem na yu mas kisim gutpela tingting na bihainim savepasin! Bihainim dispela tok, olsem: “Taim yu yangpela yet, yu mas tingim Bikpela Man i bin wokim yu.”−Eklisiastis 12:1, NW.
9 Sapos yu tingim Jehova taim yu yangpela yet, dispela bai helpim yu tru. Bai yu abrusim hevi na hatwok na bai yu stap amamas na mekim gutpela wok, em wok bilong Bikpela Man i bin wokim yu. Bai yu bihainim savepasin, long wanem bai yu bungim ol gutpela samting bilong yu long heven, em ol samting bilong i stap oltaim oltaim. (Matyu 6:19-21) Sapos nau yu tingim Jehova, olsem yu bihainim laik bilong em, orait bai em i tingim yu na “givim yu ol samting yu laikim tru”−yes, bai yu inap i stap amamas na i stap oltaim long Paradais!−Sam 37:4; 133:3; Luk 23:43; Revelesen 21:3, 4.
Yu Ting Olsem Wanem long Jehova?
10 Yu no ken tingting tasol long bihainim savepasin na yu kirap mekim wok bilong Jehova. Nogat. Seten i save tru long pasin bilong giaman, na sapos yu tingting long helpim yu yet tasol bai Seten i mekim wok long dispela tingting bilong pundaunim yu, na bai yu lusim wok bilong Jehova. Olsem na Jehova i no singaut long yu bilong bihainim gutpela tingting tasol. Nogat. Em i laik bai yu givim bel olgeta long em, olsem Jisas i tok: “[Jehova] em i God bilong yu. Na yu mas laikim em long bel bilong yu olgeta.” (Matyu 22:37) Olsem wanem yu ken givim “bel bilong yu olgeta” long Jehova? Yu save long insait bilong dispela tok?
11 Dispela tok “bel” i makim olgeta tingting i stap insait tru long bel bilong yu na i kirapim yu long mekim ol samting. Olsem na bilong givim bel bilong yu olgeta long Jehova, yu mas laikim tumas Em na yu mas laik tru long mekim ol samting bambai em inap bekim tok long Seten na bai em i belgut. Yu mas laik tru long mekim dispela samting, winim olgeta narapela samting yu laik mekim. Sapos yu gat gutpela tingting olsem na yu laikim tumas God, dispela strongpela laik bai kirapim yu long bihainim laik bilong God maski i gat planti samting bilong grisim yu na pulim yu long sakim laik bilong Em. Yangpela man Josep i givim bel olgeta long Jehova, olsem na taim wanpela meri i gat nem i tokim em: “Yu kam slip wantaim mi,” Josep i bekim tok olsem: “Olsem wanem bai mi mekim dispela pasin nogut? Sapos mi mekim olsem bai mi mekim sin long ai bilong God.”−Jenesis 39:7-9.
12 Taim yu beten tokim Jehova yu laik kamap wokboi bilong em na mekim wok bilong em oltaim, long dispela rot yu kamapim bel bilong yu, yu givim bel olgeta long Em. Yu dediket long Em. Yu bin mekim olsem? Sapos nogat, bilong wanem yu no bin mekim? Olsem wanem? Yu bikpela pinis inap long yu save long bikpela tok i bin kamap namel long God na Seten? Yu laik mekim Jehova i belgut? Seten i no laik bai yu givim bel olgeta long Jehova. Em i laik bai yu tingim skin bilong yu yet tasol na yu bihainim laik bilong yu yet. Orait, yu laik amamasim husat? God o Seten? Yu mas tingim gut dispela samting.
13 Sapos yu dediket long God na yu kisim pinis baptais, orait olsem wanem? Ol samting yu mekim i kamapim long ples klia olsem yu givim bel olgeta long God? Yu gat bikpela tingting na laik long wanem samting? long kisim nupela ka? long kisim mani bilong baim klos o narapela samting bilong yu yet? Yu tingim laik bilong husat pastaim−laik bilong Jehova o laik bilong yu yet? Yu harim singaut bilong Jehova na givim bel tru long Em?
14 Ol lapun i gat save pinis na ating ol i gat gutpela tingting winim bilong ol yangpela, tasol ol yangpela i gat wanpela samting ol inap mekim wok long en bilong mekim Jehova i belgut. Baibel i tok, “ol yangpela man i gat strong.” (Provep 20:29) Olsem na nau yu mas mekim wok long dispela strong bilong yu. Taim “hevi” bilong taim bilong lapun i no painim yet yu, yu mas tingim Bikpela Man Antap em i bin wokim yu. Taim yu go lapun bai skin bilong yu i no gat strong moa na bai ai samting i no wok gut moa. Sori tru long man i no tingim God taim em i yangpela yet na taim em i lapun em i no gat gutpela nem long ai bilong God. Yangpela na strong bilong em i “giaman tasol”−olgeta wok em i mekim bai lus nating tasol. (Eklisiastis 12:1-8, NW ) Olsem na yu mas kisim gutpela tingting na taim skin bilong yu i strong yet, yu mas tingim Man bilong wokim yu. Yu mas stap gut long wok bilong Em na bai em i amamas long yu, na bai yu inap kisim laip i stap oltaim oltaim.−Hibru 6:10-12; Eklisiastis 12:13, 14.
Ol i Mekim God i Belgut
15 Baibel i stori long planti yangpela manmeri ol i mekim wok long “strong” bilong ol bilong mekim wok bilong God. Josua i salim tupela “yangpela man” i go lukstil long Ples Promis, em ol inap ran strong samting. (Josua 6:22, 23, NW; 2:15, 16, 23) Taim Devit yet i gat 20 samting krismas tasol em i salim “10-pela yangpela man” i go long Nabal bilong askim Nabal long helpim em. (1 Samuel 25:4, 5) Taim ol Juda i laik wokim gen banis bilong Jerusalem, Niemaia i bosim wok. Ol birua i laik pait long ol na Niemaia i makim husat bilong wok long banis? Em i makim “ol yangpela man.” Em i tok: “Mi brukim ol yangpela man bilong mi i kamap tupela lain; wanpela lain ol i mekim wok na wanpela lain ol i holim spia na plang na banara na pasim klospait.” (Niemaia 4:16, NW ) Taim God i kisim i dai Ananaias na Sapaira, long wanem tupela i mekim tok giaman, “ol yangpela man” i karim tupela i go planim ol.−Aposel 5:5, 6, 10.
16 Taim ol yangpela i redi long mekim wanem wanem wok i stret long wanpela taim, dispela i save mekim Jehova i belgut. Sampela yangpela, olsem Ilaihu, ol i bin mekim sampela wok bilong God na i no strong bilong skin tasol inapim ol long mekim. Iaaihu i tok, “Mi yangpela,” tasol Jehova i givim wok long em bilong stretim Jop. (Jop 32:4-6, NW ) Samuel i manki nating taim em i kirap mekim wok long haus lotu bilong Jehova long Silo. (1 Samuel 2:18) Wanpela “liklik meri” em i wok kalabus long haul bilong Neman, em i no pret long tokaut long ol samting profet bilong Jehova inap mekim. (2 King 5:2-4) Taim Jehova i givim wok profet long Jeremaia, Jeremaia i tok: “Mi manki tasol.” (Jeremaia 1:5, 6, NW ) Na “dispela 4-pela yangpela man,” em Danyel wantaim tripela poroman Hibru bilong em, ol i stap gut tru long wok bilong Jehova taim ol i kalabus longwe long ples bilong ol long Babilon! (Danyel, sapta 1 na 3) Pikinini man bilong susa bilong Pol, em i “yangpela man,” tasol em i no pret long helpim Pol. (Aposel 23:16-22) Na Baibel i stori tu long yangpela man Timoti, taim em i liklik pikinini yet em i kirap long kisim save long Buk Holi na em i givim yangpela bilong em bilong mekim wok bilong Jehova.−2 Timoti 3:15; Filipai 2:19-23; 1 Korin 4:17.
Mekim Jehova i Belgut long Nau
17 Sampela yangpela long bipo ol i stap gut long wok bilong God na ol i mekim God i belgut, tasol i no ol dispela yangpela tasol. God i tok, “Klostu long las de bai mi kapsaitim strong bilong Spirit bilong mi long olgeta manmeri. Na ol pikinini man na pikinini meri bilong yupela bambai ol i telimautim tok olsem profet. Na bai mi soim narakain narakain samting long ol yangpela man bilong yupela.” (Aposel 2:17; Joel 2:28) Olsem na yumi save, nau long las taim i mas i gat planti yangpela Kristen ol i mekim Jehova i belgut. Na yumi lukim ol i stap! Ol dispela yangpela Witnes i no gutpela olgeta; no gat wanpela man i gutpela olgeta. Tasol planti yangpela Witnes ol i mekim gutpela wok Kristen. Ol i gat bikpela tingting long mekim Jehova i belgut−Provep 27:11; 3:1, 2.
18 Nau long las taim Jehova i laik bai yumi autim tok bilong Kingdom bilong em long olgeta hap bilong graun. Em bikpela wok tru. (Matyu 24:14) Yumi mas wokim ol Haus Kingdom bilong lotuim Jehova long en, na wokim ol bikpela haus bung bilong mekim ol kibung sekit samting. Long planti kantri haus faktori bilong wokim ol buk na Baibel em i liklik tumas na ol i mas skruim i go bikpela o wokim nupela haus faktori na nupela haus Betel. Wok bilong wokim ol dispela haus em i bikpela wok, wankain olsem wok bilong wokim gen banis bilong Jerusalem long taim bilong Niemaia. Ol yangpela i gat bikpela strong bilong skin na ol i helpim gut ol dispela wok.
19 Na ol yangpela i mekim bikpela wok bilong wokim planti tausen tausen buk na nius bilong Baibel long olgeta yia na salim i go. Ol i mas i gat bikpela strong bilong skin bilong mekim dispela wok. Long Nu Yok, long hetkota bilong ol Witnes Bilong Jehova na long ol gaden o fam bilong Sosaiti Was Taua, i gat 1,400 yangpela manmeri ol i wok i stap, em ol i gat 25 krismas o ol i no winim yet 25 krismas. Long wik ol i mekim bikpela wok long strong bilong skin, tasol i no dispela tasol; long Sarere na Sande ol i wok strong long autim tok na i go long ol miting bilong kongrigesen. Ol i mekim Jehova i belgut tru!
20 Long hap bilong Amerika i gat 12,700 moa yangpela man na meri em ol i mekim wok bilong Jehova long olgeta de. Ol i mekim wok painia oltaim. Long ol narapela hap tu i gat planti tausen tausen yangpela man na meri ol i mekim wok painia. Sapos yu yangpela na yu no kirap yet long mekim wok painia, orait olsem wanem? Yu inap tingim sampela wok yu ken mekim na bai yu tingim Jehova pastaim na yu no tingting tasol long kisim bikpela wok mani na marit na kamapim pikinini? Olsem wanem? Yu save pinis long bikpela tok i bin kamap namel long God na Seten na olgeta ensel na olgeta man i insait long en? Sapos olsem, orait i stret yu mas givim bel olgeta long mekim wok bilong Jehova, a? Olsem na planti moa ol inap kirap mekim wok long Betel o mekim wok painia, a?
21 Harim! Jehova i singautim yu long mekim wok bilong em bambai em i ken bekim tok long Seten. Yu harim singaut bilong Jehova i wankain long tok em i bin mekim long Aisaia? “Mi mas salim husat? Husat bai go mekim dispela wok bilong yumi?” Sapos yu gat gutpela tingting bai yu bekim tok wankain olsem Aisaia, em Aisaia i tok: “Mi stap! Salim mi!” (Aisaia 6:8, NW ) Mipela i save, yupela planti yangpela yupela bai bihainim singaut bilong Jehova na mekim wok bilong em, long wanem Tok Bilong God, em Baibel, i tok promis olsem: “Taim yu laik pait wantaim ol birua bai ol pipel bilong yu i go wantaim yu na helpim yu.” “Ol yangpela man na ol yangpela meri, . . . litimapim nem bilong [Jehova].” (Sam 110:3; 148:12, 13) Taim yu bihainim singaut bilong Jehova na mekim wok bilong em, yu ken amamas, long wanem yu save Jehova i lukim ol samting yu mekim na em i amamas−tru tumas yu mekim em i belgut!
STORI GEN LONG SAMPELA TOK
◻ Ol samting yumi mekim, bilong wanem em i bikpela samting long Jehova?
◻ Sapos yumi mekim Jehova i belgut, olsem wanem yumi bihainim savepasin?
◻ Yumi mas mekim wanem na bai yumi kamapim long ples klia olsem yumi givim bel long Jehova?
◻ Husat long bipo ol i bin mekim Jehova i belgut? Ol i mekim wanem na em i belgut?
◻ Husat long nau ol i mekim Jehova i belgut? Ol i mekim wanem na em i belgut?
2. Seten i kamapim wanem bikpela tok? Olsem wanem yumi insait long dispela tok?
3. Olsem wanem yumi save, dispela singaut bilong Jehova i go tru long Jisas?
4. Taim yu tingim ol samting yu laik mekim, yu mas tingim gut wanem samting?
5. Sapos yu wok long mekim Jehova i belgut, olsem wanem yu bihainim savepasin?
6. (a) Wanem samting i makim olsem Jehova i laik bai yu stap amamas? (b) Tasol yu no inap abrusim wanem samting?
7, 8. (a) Yu mas mekim wanem na bai yu abrusim ol samting em inap mekim bel bilong yu i gat hevi? (b) Taim man i yangpela yet, sapos em i mekim wanem, orait bai yangpela bilong em i lus nating tasol?
9. Sapos yu tingim Jehova taim yu yangpela yet, dispela bai helpim yu olsem wanem?
10. (a) Bilong wanem yu no ken tingting tasol long bihainim savepasin na yu mekim wok bilong God? (b) Jehova i laik bai yu mekim wanem samting moa?
11. (a) Olsem wanem yu ken laikim Jehova “long bel bilong yu olgeta”? (b) Ol samting i painim Josep, olsem wanem dispela i makim olsem sapos yumi gat stretpela tingting long bel, dispela inap kirapim yumi long bihainim laik bilong God?
12. (a) Yu mekim wanem na yu kamapim long ples klia olsem yu givim bel long Jehova? (b) Sapos yu no givim bel long Jehova, gutpela sapos yu tingim wanem ol askim?
13. Sapos yu dediket na baptais pinis, yu mas givim wanem ol askim long skin bilong yu yet?
14. (a) Ol yangpela i gat wanem gutpela samting? (b) Taim man i yangpela yet, sapos em i no tingim Man i bin wokim em, dispela bai nogutim em olsem wanem?
15. Baibel i stori long husat ol i bin mekim wok long strong na yangpela bilong ol bilong mekim wok bilong God?
16. Sampela yangpela long bipo i mekim wanem ol wok bilong God?
17. Olsem wanem yumi save bai i gat Sampela yangpela long nau ol i mekim Jehova i belgut?
18, 19. I gat wanem wok yumi mas mekim long nau? Na olsem wanem ol yangpela ol inap tru long mekim?
20. (a) Planti yangpela i mekim wok painia o olsem wanem? (b) Ol yangpela i no mekim wok painia, ol i mas givim wanem ol askim long skin bilong ol yet?
21. (a) Yu mas bihainim wanem singaut bilong Jehova? Yu mas mekim wanem na bai yu bihainim? (b) Olsem wanem yumi save, planti yangpela moa bai kirap bihainim singaut bilong Jehova olsem Aisaia i bin mekim?
[Rait long pes 20]
Taim ol yangpela i kalapim ol lo bilong God, hevi i save painim ol
[Piksa long pes 21]
Sampela yangpela i helpim wok bilong wokim gen banis bilong Jerusalem na ol i mekim God i belgut