Ol Yangpela Husat i Mekim Jehova i Belgut Tru

Dispela tupela stadi i bilong ol yangpela Witnes Bilong Jehova. Olsem na mipela i laik kirapim ol yangpela long stadi gut long ol dispela tok na givim bel long bekim tok taim ol i skelim long Wastaua Stadi bilong kongrigesen.

“Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”—⁠Sindaun 27:⁠11.

1, 2. (a) Sapos long tingting yu laikim ol samting bilong dispela graun, yu ting dispela i makim olsem yu no fit long stap olsem wanpela Kristen? Stori long dispela. (Rom 7:21) (b) Stori bilong Asap i givim wanem save long yu? (Lukim blok, long pes 13.)

TINGIM olsem yu raun long ol stua bilong painim sampela klos. Taim yu wok long skelim ol samting yu lukim wanpela klos na wantu yu laikim. Kala na stail bilong en i stret olgeta long yu, na pe tu i gutpela. Tasol nau yu sekim gut tru. Yu kirap nogut long lukim arere bilong klos i bruk bruk, na ol i no samapim gut. Klos i luk nais, tasol ol i no wokim gut. Olsem wanem? Bai yu tromoi mani bilong yu long kain samting olsem?

² Orait tingim stori antap na skelim wantaim samting em inap painim yu olsem wanpela yangpela Kristen. Taim yu lukluk nating long ol samting bilong dispela graun​—⁠kain olsem namba wan taim yu lukim klos hia​—⁠ating bai yu laikim tru samting yu lukim. Olsem: Ating ol wanskul i save go long ol pati, kisim drak, dring, poromanim nating wanpela boipren o gelpren, mekim maritpasin maski ol i no marit. Olsem wanem? Sampela taim kain pasin olsem i pulim yu? Yu gat laik long insait liklik long ol dispela kain pasin em planti yangpela bai tingim olsem pasin bilong mekim long laik tasol? Sapos olsem yu no ken hariap na ting dispela i makim olsem yu nogut tasol na yu no fit long stap olsem wanpela Kristen. Baibel yet i tokaut olsem ol samting bilong graun i gat bikpela strong bilong pulim man​—⁠maski man i gat laik long amamasim God.​—⁠2 Timoti 4:⁠10.

3. (a) Bilong wanem i no gutpela long givim bel long ol samting bilong dispela graun? (b) Wanpela Kristen i stori olsem wanem long pasin bilong givim bel long ol samting bilong graun?

³ Orait nau skelim gut ol samting bilong dispela graun, kain olsem yu bai mekim long wanpela klos yu laik baim. Askim yu yet, ‘Ol samting bilong dispela graun i gutpela tru o olsem wanem?’ Baibel i tok “dispela graun bai i pinis.” (1 Jon 2:17) Amamas bilong en i bilong sotpela taim tasol. Na tu, pasin i no stret long ai bilong God i kamapim ol bikpela hevi. Bai em i no helpim yu. Wanpela Kristen husat i bin karim hevi long samting em yet i kolim olsem “hevi bilong lusim nating taim bilong yangpela,” em i tok: “Long ai, i luk olsem ol samting bilong dispela graun i gutpela na samting bilong amamas long en. Na dispela graun bai kirapim yu long ting yu inap kisim amamas bilong en na no gat hevi, tasol nogat. I olsem ol samting bilong graun bai kisim nating ol gutpela samting bilong yu, na bihain tromoi yu yet i go long rabis.”a I no gutpela long westim hap taim bilong yu long stap yangpela long kain sindaun olsem, a?

Lukautim Ol Long “Man Nogut”

4, 5. (a) Paslain liklik long em i dai, Jisas i beten askim Jehova long wanem samting? (b) Bilong wanem i stret Jisas i mekim kain askim olsem?

⁴ Ol yangpela bilong ol Witnes Bilong Jehova ol i save olsem dispela graun i no gat gutpela samting bilong givim ol, olsem na ol i wok strong long no ken pren wantaim pasin bilong graun. (Jems 4:⁠4) Olsem wanem? Yu wanpela bilong ol dispela gutpela yangpela? Sapos olsem, mipela i laik tok amamas long yu. Tru i no isi long sakim pasin ol wankrismas i bihainim na stap narapela kain long ai bilong ol man, tasol helpim i stap.

⁵ Paslain liklik long em i dai, Jisas i beten askim Jehova long “lukautim” ol disaipel bilong em, long wanem, i gat wanpela “man nogut” i stap. (Jon 17:15) I gat gutpela as na Jisas i kamapim dispela askim. Em i save olsem ol lain i bihainim em bai i gat hatwok long stap gut long bilip maski ol i gat hamas krismas. Bilong wanem i olsem? Wanpela as i olsem Jisas i tok, ol disaipel bilong em bai i gat hevi long wanpela strongpela birua ol i no inap lukim long ai bilong ol, em dispela “man nogut,” Satan. Baibel i tok dispela spirit nogut “em i olsem wanpela laion i singaut strong. Oltaim em i save raun bilong painim ol manmeri bilong kaikai.”​—⁠1 Pita 5:⁠8.

6. Olsem wanem yumi save Satan i no sori liklik long ol yangpela?

⁶ Kirap long bipo yet na i kam inap long nau, Satan i kisim narapela kain amamas long mekim nogut tru long ol man. Tingim ol hevi nogut Satan i mekim i kamap long Jop na famili bilong em. (Jop 1:​13-19; 2:⁠7) Ating yu inap tingim sampela bikpela samting i bin kamap long taim bilong yu na pasin bilong Satan long bagarapim man i insait long en. Satan i wok long raun, em i strong tru long bagarapim man na em i no marimari liklik long ol yangpela. Olsem: Bihain liklik long Maria i karim Jisas, Herot i stretim rot long kilim i dai olgeta pikinini man long Betlehem husat i no winim yet 2-pela krismas. (Matyu 2:16) Em mas Satan tasol i kirapim Herot long mekim olsem, Satan i mekim olgeta dispela samting bilong kilim i dai dispela pikinini husat bai kamap Mesaia God i tok promis long en, dispela pikinini bai givim strafe bilong God i go long Satan! (Stat 3:15) Dispela i kamapim klia olsem Satan i no sori liklik long ol yangpela. Namba wan bikpela tingting bilong em, em bilong bagarapim planti manmeri tru. Tok hia i stret moa yet long nau, long wanem, Satan i raus pinis long heven na i kam daun long graun, em i “belhat nogut tru. Em i save, em i gat sotpela taim tasol bilong i stap.”​—⁠KTH 12:​9, 12.

7. (a) Olsem wanem pasin bilong Jehova i narapela kain tru long pasin bilong Satan? (b) Jehova i gat wanem tingting long samting yu mekim bilong stap amamas?

⁷ Pasin bilong Jehova i narapela kain tru long pasin bilong Satan, Satan i “belhat nogut tru” i stap, tasol Jehova em i God bilong “marimari.” (Luk 1:​77, 78) Em i win tru long pasin bilong laikim tru narapela. Dispela pasin i makim tru pasin bilong Man bilong wokim yumi, olsem na Baibel i tok: “God yet em i as bilong dispela pasin bilong laikim ol arapela.” (1 Jon 4:⁠8) Pasin bilong god giaman bilong dispela graun na dispela God yu inap lotu long en i narapela kain tru! Satan i laik bagarapim man, tasol Jehova “i no laik bai wanpela man i lus.” (2 Pita 3:⁠9) Em i tingim laip bilong man i bikpela samting​—⁠na laip bilong yu tu wantaim. Long Baibel, taim Jehova i tok yu no ken insait long ol samting bilong graun, em i no laik pasim yu long kisim amamas o pasim yu long stap fri long bihainim laik bilong yu yet, nogat. (Jon 15:19) Em i mekim bilong lukautim yu long dispela man nogut. Papa bilong yu long heven i laik bai yu kisim gutpela samting i winim tru amamas bilong dispela graun i bilong sotpela taim tasol. Em i laik bai yu kisim “laip tru”​—⁠laip oltaim long graun i kamap wanpela ples paradais. (1 Timoti 6:​17-19) Jehova i laik bai yu win, na em i wok long kirapim yu long winim mak olsem. (1 Timoti 2:⁠4) Na tu, Jehova i laik bai yu mekim wanpela gutpela samting. Em i wanem samting?

Mekim “Mi Belgut Tru”

8, 9. (a) Yu inap givim wanem samting long Jehova olsem presen? (b) Olsem stori bilong Jop i kamapim, Satan i sutim tok long Jehova olsem wanem?

⁸ Olsem wanem? Wanpela taim yu baim presen bilong wanpela gutpela pren na yu lukim em i smail bikpela na amamas tru long taim yu givim long em? Ating yu bin wokim tingting inap longpela taim liklik bilong skelim wanem kain presen bai i gutpela long givim long dispela pren. Orait nau tingim dispela askim: Bai yu givim wanem kain presen i go long man bilong wokim yu, God Jehova? Pastaim, yu inap pilim olsem em i narapela kain askim. Long wanem, God i gat olgeta strong i mas kisim wanem samting long wanpela man nating bilong graun? Bai yu givim em wanem samting em i no holim pinis? Baibel i bekim dispela askim long Sindaun 27:11: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”

⁹ Yu save stadi long Baibel, olsem na ating yu save olsem man i sutim tok long Jehova em Satan. Em i tok ol man i lotuim God, ol i no mekim long wanem ol i laikim em tru, nogat, ol i mekim bilong helpim ol yet tasol. Satan i tok sapos hevi i painim ol, wantu ol bai lusim lotu i tru. Tingim tok Satan i mekim long Jehova taim em i stori long stretpela man Jop: “Oltaim yu save lukaut gut long em na long famili bilong en na long olgeta samting bilong en. Oltaim yu save mekim gut long em, na yu bin givim em planti bulmakau moa inap long pulapim olgeta hap bilong kantri em i stap long en. Tasol sapos yu bagarapim na rausim dispela olgeta samting bilong en, orait bai yu lukim em i tok nogut tru long yu.”​—⁠Jop 1:​10, 11.

10. (a) Olsem wanem yumi save Satan i no sutim tok long pasin bilong Jop tasol long stap gut long God? (b) Olsem wanem yu insait long dispela bikpela tok long husat i mas i stap nambawan bos?

¹⁰ Olsem Baibel i kamapim, Satan i sutim tok long pasin bilong Jop long stap gut long God, tasol em i sutim tok tu long olgeta man i mekim wok bilong God​—⁠na long yu tu. Satan i stori long olgeta man bilong graun taim em i tokim Jehova: “Sapos wanpela man [i no Jop tasol, em i tok long olgeta man] i laik i stap gut, em inap givim olgeta samting bilong en bilong baim bek laip bilong en.” (Jop 2:⁠4) Yu luksave long olsem wanem yu insait long dispela bikpela tok? Olsem Sindaun 27:11 i kamapim, Jehova i tok i gat wanpela samting yu inap givim long em​—⁠samting i stap olsem bekim em i ken mekim long man i sutim tok long em, Satan. Tingim, King bilong heven na graun i askim yu long insait long wok bilong stretim wanpela bikpela tok i winim tru olgeta narapela bikpela tok i bin kamap long graun. Em wanpela bikpela wok tru yu inap mekim! Yu ting yu inap mekim samting Jehova i askim yu long mekim? Jop i bin mekim. (Jop 2:​9, 10) Jisas i mekim, wankain olsem planti ol narapela lain bilong bipo tru na i kam inap long nau, na i gat planti yangpela i insait long dispela lain. (Filipai 2:8; KTH 6:⁠9) Yu tu inap mekim wankain samting. Tasol yu mas save gut long wanpela samting​—⁠i no olsem yu no insait long dispela bikpela tok. Pasin bilong yu i kamapim klia yu sapotim tok bilas bilong Satan o dispela bekim Jehova i mekim long em. Bai yu helpim tok bilong husat?

Jehova i Laikim Yu Tru!

11, 12. Olsem wanem? Em i bikpela samting long Jehova long yu lotuim em o nogat? Stori long dispela.

¹¹ Yu ting samting yu laik mekim i bikpela samting long Jehova? Ating planti man pinis i bin stap gut long em na bai em inap bekim tok long Satan, a? Tru, Satan i tok pasin bilong laikim tru Jehova i no as na ol man i lotu long Em, dispela em i wanpela tok ol samting i kamap pinis i soim olsem em i tok giaman. Tasol Jehova i laik bai yu stap long sait bilong em long dispela bikpela tok long nambawan wok bos, long wanem, em i laikim yu tru. Jisas i tok: “Papa bilong yupela i stap long heven em i no laik bai wanpela bilong ol dispela liklik pikinini i lus.”​—⁠Matyu 18:⁠14.

¹² Tru tumas, Jehova em i tingim rot yu makim bilong bihainim. Tasol dispela i mekim bikpela samting long em tu. Baibel i kamapim klia olsem pasin ol man bilong graun i bihainim olsem gutpela pasin o pasin nogut, dispela i save mekim bikpela samting long bel bilong Jehova. Olsem: Taim ol Israel i sakim tok bilong God klostu klostu, Jehova i pilim “bel hevi.” (Song 78:​40, 41) Paslain long Bikpela Tait long taim bilong Noa “pasin bilong ol manmeri . . . i nogut tru,” na dispela i mekim Jehova “i bel hevi tru.” (Stat 6:​5, 6) Tingim olsem wanem dispela em i bikpela samting long yu. Sapos yu kirap insait long ol pasin i no stret, yu inap mekim Man i wokim yu i pilim pen. Dispela i no makim olsem God em i no gat strong o samting em i pilim long bel i bosim ol samting em i mekim, nogat. Dispela i makim olsem em i laikim yu tru na em i laik bai yu stap gut. Tasol taim yu bihainim stretpela pasin, Jehova i save belgut. Em i amamas, long wanem, em i gat sampela tok moa long givim long Satan, na rot i op bilong em i ken kamap Man bilong mekim gut long yu. Na dispela em i samting Jehova i laik mekim. (Hibru 11:⁠6) Jehova em i gutpela papa i save laikim yu tru!

Planti Gutpela Blesing Long Nau

13. Olsem wanem pasin bilong lotuim Jehova i givim blesing long ol man long nau?

¹³ Ol gutpela blesing i kamap long rot bilong mekim wok bilong Jehova i no samting bilong kisim long bihain tasol. Planti yangpela bilong ol Witnes Bilong Jehova ol i kisim blesing long nau, olsem ol i stap amamas na belgut tru, na i gat as na ol i stap olsem. Man bilong raitim song i tok: “Bikpela i save skulim yumi long gutpela tok tumas. Dispela tok i save mekim bel bilong yumi i amamas.” (Song 19:⁠8) Jehova i save gut long wanem ol samting i gutpela long helpim yumi, winim tru save bilong ol man. Long rot bilong profet Aisaia, Jehova i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut. Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.”​—⁠Aisaia 48:​17, 18.

14. Olsem wanem ol stiatok bilong Baibel i ken helpim yu long abrusim hevi bilong planti tumas dinau?

¹⁴ Pasin bilong bihainim ol stiatok bilong Baibel bai helpim yu long abrusim ol bikpela pen na belhevi. Olsem: Baibel i tok ol man husat i kisim pasin bilong laikim tumas mani “ol i karim bikpela hevi moa.” (1 Timoti 6:​9, 10) Olsem wanem? Samting dispela skripsa i stori long en i painim sampela wankrismas bilong yu? Sampela yangpela man na meri ol i gat planti dinau, long wanem, ol i ting ol i mas i gat ol klos i gat bikpela pe o ol nupela samting i kamap long sait bilong wok kompiuta samting. Hatwok bilong bekim bikpela dinau wantaim winmani bilong en, long wanem, yu laikim ol samting yu no gat mani long baim, dispela i kain olsem wanpela wok kalabus!​—⁠Sindaun 22:⁠7.

15. Long wanem ol rot ol stiatok bilong Baibel i helpim yu long abrusim hevi em pasin pamuk i kamapim?

¹⁵ Tingim tu hevi bilong pasin pamuk. Long olgeta yia inap long olgeta hap bilong graun, planti tumas yangpela meri i no marit i kisim bel. Sampela i karim pikinini ol yet i no gat laik long lukautim o ol i no inap mekim bikpela long en. Sampela narapela ol i rausim bel, na bihain ol i karim bikpela hevi long bel i kotim ol nogut tru. Na i gat sampela yangpela man na meri ol i kisim wanpela sik bilong pamuk, olsem AIDS. Tasol husat i save long Jehova na insait long dispela pasin, nambawan bikpela hevi i painim ol i olsem dispela bai bagarapim pasin bilong ol long stap wanbel wantaim Jehova.b (Galesia 5:​19-21) Olsem na i gat gutpela as na Baibel i tok: “Stap longwe long pasin pamuk.”​—⁠1 Korin 6:⁠18.

Lotuim God Bilong “Amamas”

16. (a) Olsem wanem yumi save olsem Jehova i laik bai yu stap amamas long taim yu yangpela? (b) I gat wanem as na Jehova i bin kamapim ol stiatok bilong yu long bihainim?

¹⁶ Baibel i stori long Jehova olsem em i God bilong “amamas.” (1 Timoti 1:11) Na em i laik bai yu i stap amamas tu. Long Baibel em i tok olsem: “Yupela yangpela manmeri, yupela i mas amamas long taim yupela i yangpela yet.” (Saveman 11:⁠9) Tasol Jehova i no save tingim ol samting bilong nau tasol, em inap save tu long ol samting em gutpela pasin na pasin nogut bai kamapim long bihain. Dispela em i as na em i tokim yu: “God i bin wokim yumi olgeta. Olsem na long taim yupela i yangpela yet, yupela i mas tingim em. Nogut yupela i lusim tingting long em, na bihain yupela i kamap lapun na taim nogut i painim yupela, na bai yupela wan wan i tok olsem, ‘Mi no amamas long laip bilong mi.’ ”​—⁠Saveman 12:⁠1.

17, 18. Wanpela yangpela Kristen i tok wanem bilong kamapim amamas bilong em long lotuim Jehova? Olsem wanem bai yu kisim wankain amamas?

¹⁷ Planti yangpela long nau i kisim bikpela amamas long lotuim Jehova. Olsem: Lina em i gat 15 krismas, em i tok: “Mi no gat samting bilong sem long en. Bodi bilong mi i gat strong, long wanem, mi abrusim smok na ol drak. Long kongrigesen mi kisim ol gutpela tok i helpim mi long sakim ol samting Satan i kamapim bilong putim hevi long mi. Pes bilong mi i lait, long wanem, mi gat ol gutpela poroman long Haus Kingdom. Nambawan gutpela samting em i olsem rot i op bilong mi inap kisim laip i stap oltaim long graun.”

¹⁸ Olsem Lina, planti yangpela Kristen ol i wok hat long stap gut long bilip, na dispela i givim amamas long ol. Ol i save olsem laip bilong ol i gat as tru bilong en na i gat gutpela samting bai painim ol long bihain, maski sampela taim ol i gat hatwok. Olsem na wok yet long lotuim dispela God husat i tingim tru ol samting i gutpela long helpim yu. Mekim em i stap belgut, na em bai mekim yu i stap amamas long nau na inap oltaim bihain!​—⁠Song 5:⁠11.

[Ol Futnot]

Yu Inap Tingim?

• Dispela “man nogut,” Satan, i laik mekim wanem long yu?

• Olsem wanem yu inap mekim Jehova i belgut?

• Olsem wanem Baibel i kamapim klia olsem Jehova i save tingim yu?

• Wanem sampela gutpela blesing i kam long pasin bilong mekim wok bilong Jehova?

[Blok/Piksa long pes 13]

Wanpela Stretpela Man i Laik Pundaun

Asap i bilong lain Livai na em i gat biknem olsem man bilong wokim musik long tempel bilong Jehova long Israel bipo. Na tu, em i bin raitim ol singsing ol i yusim long taim bilong lotu. Tasol maski em i holim ol gutpela wok, taim Asap i lukim ol wankrismas bilong em i brukim ol lo bilong God na i luk olsem ol i no gat hevi, dispela i kirapim em na em tu i gat laik long mekim olsem. Bihain Asap yet i tokaut: “Klostu mi laik pundaun long sin. Mi olsem lek i wel pinis na mi laik pundaun na lusim bilip. Long wanem, mi lukim ol man nogut i kamap maniman na mi mangal long ol samting bilong ol dispela bikhetman.”​—⁠Song 73:​2, 3.

Bihain, Asap i go long tempel bilong God na beten long dispela samting. Em i kisim gen pasin bilong tingim ol samting bilong spirit na skelim gut ol samting, na em i save olsem Jehova i no laikim tru ol pasin nogut na i gat hap taim long bihain we ol man nogut na ol stretpela man bai kamautim kaikai ol i planim. (Song 73:​17-20; Galesia 6:​7, 8) Tru tumas, ol man nogut i stap long graun i wel. Sapos ol yet i no bagarap pastaim, orait bihain ol bai i pundaun long taim Jehova i bagarapim ol samting nogut bilong nau.​—⁠KTH 21:⁠8.

[Ol Piksa long pes 15]

Jehova i tingim tru ol samting i gutpela long helpim yu, tasol Satan i laik bagarapim yu

[Piksa long pes 16]

Planti yangpela i kisim bikpela amamas moa long rot bilong mekim wok bilong Jehova wantaim ol wanbilip Kristen