Ol i Givim Liklik Hap Taim Tasol Long Pikinini Bilong Ol
LONG nau planti papamama i no gat taim bilong sindaun wantaim pikinini na mekim sampela samting wantaim ol. Planti bilong ol i stap wanpis, olsem na ol i hatwok long lukautim pikinini long ol samting bilong skin. Na nau pe bilong ol samting i go antap na i gat hevi long mani, olsem na papa na mama i mas wok mani bilong lukautim famili. Dispela i mekim na planti i ting sapos ol i lusim ol narapela samting na toktok o pilai wantaim pikinini liklik hap taim olsem 10-pela minit, dispela hap taim em inap.
Planti papamama i ting sapos ol i makim dispela hap taim na mekim wanpela samting, olsem kisim pikinini i raun long wanpela hap, maski em liklik hap taim tasol, em inap. Em i gutpela ol i laik i stap wantaim pikinini inap liklik taim, tasol em i no gutpela olgeta. Ol man i save skelim sindaun bilong ol pikinini, ol i save long dispela tu.
Sampela papamama i wok mani ol i gat tingting kranki. Ol i ting sapos ol i makim liklik hap taim, olsem 10-pela minit samting bilong toktok o sindaun wantaim pikinini, i no gat narapela samting ol i mas mekim long pikinini. Dokta Lee Salk bilong wanpela yunivesiti (Cornell University Medical School) i kamapim tingting bilong em long wanpela nius (Daily News), na em i tok: ‘Tingting bilong ol long lusim ol narapela samting na toktok wantaim pikinini inap liklik taim tasol, em tingting kranki. Bel bilong papamama i gat tok, olsem na ol i ting sapos ol i givim liklik hap taim, olsem 10-pela minit samting long pikinini, em inap. Ol man i ting i orait long ol i no ken tromoi bikpela hap taim bilong toktok na sindaun wantaim pikinini bilong ol.’
Olsem wanem? Sapos planti taim papamama i no lusim taim bilong sindaun na toktok wantaim pikinini, na wan wan taim ol i lusim 5 minit samting na sindaun wantaim pikinini, dispela em inap? Nogat. Long wanem pikinini i kisim save taim em i lukim pasin bilong papamama o harim tok bilong ol. Ol saveman i bin skelim pasin bilong sampela yangpela long ol biktaun na ol i kisim save olsem: Sapos sampela famili bilong ol i stap kalabus taim ol dispela pikinini i wok long go bikpela, ol tu inap mekim rong na kalabus. Na tu, sapos man i mekim bikpela long ol na em i save kisim drak o dring, ol pikinini inap bihainim wankain pasin bilong em.
Na i olsem tu sapos papamama i kamapim gutpela pasin long pikinini—dispela i bikpela samting bilong stiaim pikinini. Tasol bilong mekim olsem, papamama i mas tromoi bikpela hap taim. Ol i no ken tromoi 5 minit 5 minit tasol na ting dispela em inap. Nogat. Wanpela nius (Daily News) bilong Nu Yok i tok: ‘Wanpela hevi long pasin bilong givim liklik hap taim long pikinini na skelim pastaim ol samting bai ol i toktok long en i olsem: Sampela taim papa o mama o pikinini i no tingting pastaim long ol samting—wantu ol i kamapim ol tingting i stap long bel bilong ol.’ Sapos papa o mama i lusim ol narapela samting na sindaun wantaim pikinini 15 minit tasol, yumi no save papa o mama o pikinini bai kamapim tingting i stap long bel bilong ol long dispela taim o nogat, a? Na sapos papamama i tromoi liklik hap taim tasol olsem 15 minit bilong toktok o sindaun wantaim pikinini, olsem wanem pasin na toktok bilong papamama i ken lainim gut pikinini?
Olgeta papamama i gat planti wok, olsem na ol i ken mekim wanem bilong stretim dispela hevi? Tru em i hatwok. Nau sindaun bilong olgeta man i narapela kain, olsem na em i hatwok long mekim bikpela long pikinini. Ating sampela papamama inap lusim wok mani liklik. Man bilong raitim wanpela buk long ol samting bilong lukautim pikinini, i tok, sapos i gat rot, mama i no ken wok mani, mobeta em i stap long haus wantaim pikinini. Tasol planti papamama i no inap mekim olsem, tupela wantaim i mas wok mani. Na sampela papamama i no pas tumas long wok mani, na sampela mama i stap long haus, tasol ol tu i hatwok long painim bikpela hap taim bilong toktok o pilai samting wantaim pikinini bilong ol.
Olsem na ol saveman i tok i gutpela sapos papamama i skelim ol wok bilong haus olsem kukim kaikai, klinim haus, stretim sampela samting i bruk long haus, stretim ka, wasim ol laplap, baim kaikai, na traim mekim dispela wok wantaim pikinini. Sapos ol i wok wantaim long mekim sampela wok long haus, ating i gat rot long papamama i ken toktok wantaim pikinini na makim gutpela pasin pikinini i ken bihainim. Ol papamama Kristen i gat narapela wok tu na i gutpela ol i mekim dispela wok wantaim pikinini bilong ol. Olsem: Go long olgeta miting Kristen, autim tok, famili-stadi, bung wantaim ol narapela Kristen—olgeta dispela samting i gutpela rot bilong papamama i ken stap wantaim pikinini bilong ol.
Lo Israel i bin kisim inap 3,000 yia i go pinis i kamapim wankain tingting. Em i tok long Lo 6:6, 7 olsem: “Oltaim yupela i mas tingim ol dispela lo nau mi givim long yupela. Na yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.” Sindaun bilong ol man long bipo tu i gat hatwok. Tingim bikpela hap taim ol i mas tromoi bilong lukautim skin bilong ol—papa i mas mekim bikpela wok tru bilong painim kaikai bilong famili—mama i mas mekim bikpela wok long kukim kaikai na wasim ol laplap. Tasol ol papamama i laikim tru Jehova, ol pikinini bilong ol i bin stap wantaim ol taim ol i mekim wok, olsem na ol i gat rot na taim long putim Lo bilong God long bel bilong pikinini bilong ol.
Long nau ol papamama i mas mekim wankain samting. Nogut ol i no laik hatwok olgeta taim long sindaun na toktok wantaim pikinini bilong ol. Taim pikinini i wok long go bikpela, papamama i mas tingim gut ol na tromoi bikpela hap taim bilong i stap wantaim ol.
[Piksa long pes 17]
Ol pikinini i wok wantaim papamama long haus
[Piksa long pes 17]
Ol i lotuim Jehova wantaim