Baibel i Tok Wanem?
Givim Mani Bilong Helpim Ol Man—Em Wanpela Wok Bilong Kristen?
KLOSTU olsem tenpela yia i go pinis, klap bilong lotu PTL (Praise the Lord), em hetkota bilong ol i stap long saut-is bilong Yunaitet Stets, ol i wok long singaut long mani bilong helpim lotu bilong ol. Ol i mekim dispela wok long rot bilong televisen na ol pas, na ol i kisim planti handet milion kina—ol i tok dispela mani i bilong helpim ol long autim gutnius long ol man.
Tasol bihain ol man i bin givim mani long dispela lotu PTL ol i kaunim sampela ripot long ol nius (olsem nius Associated Press) i tok, Jim Bakker, bipo em i presiden bilong lotu PTL, wantaim meri bilong em Tammy, ‘long 1986 ol i kisim pe na ol narapela mani olsem 1.6 milion dola.’ Na ripot i tok, ‘Ol i kisim dispela mani, maski lotu bilong ol i gat bikpela dinau tru, inap olsem 50 milion dola. Na ol i makim olsem 265,000 dola long mani bilong lotu em i bilong pasim maus bilong [Jessica] Hahn na bai em i no ken tokaut olsem em i bin prenim Bakker [olsem slip wantaim em].’
Bakker i kot long paulim mani bilong ol man, na jas i tok: “Yumi ol man i gat lotu, yumi les pinis long ol man bilong autim tok bilong lotu na ol pris em ol i wok long pulim mani bilong yumi.”
Na i no ol lotu tasol i save kirapim ol man long givim mani long ol na ol yet i kisim bikpela hap bilong dispela mani. Sampela lain ol i save singaut long mani bilong helpim ol rabisman samting, ol yet i save kisim bikpela hap tru bilong dispela mani ol man i givim long ol, inap olsem 90 pesen samting.
Olsem na long nau planti man ol i les pinis long ol dispela lain i save singaut long mani bilong helpim lotu o helpim ol man samting. Tasol ol Kristen i ken mekim wanem? Ol i gat wok long givim mani long ol kain lain olsem? Baibel i gat wanem tok long dispela bilong stiaim yumi na taim yumi givim mani bilong helpim ol man, dispela mani i ken mekim gutpela wok? Wanem gutpela rot tru bilong helpim ol man?
Pasin Bilong Givim Samting
Tru, Baibel i tok yumi mas givim samting bilong helpim man i sot. Kirap long bipo yet God i bin tokim lain bilong em long mekim olsem. (1 Timoti 6:18; Lo 15:7, 10, 11) Na 1 Jon 3:17 i tokim ol Kristen olsem: “Sapos wanpela man i gat ol samting bilong dispela graun, na em i lukim narapela brata i sot long ol samting, na sapos em i no sori long dispela brata, orait yumi save, pasin bilong God bilong laikim tru ol arapela, em i no i stap long dispela man.”
Olsem na yumi mas givim samting bilong helpim man; tasol lukaut! Oltaim ol kain kain lain i save singaut long mani—ol i tok ol i laik helpim ol taranguman, o ol lotu, o sampela lain i laik mekim ol wok bilong helpim ples; olgeta i strong long yumi mas givim mani bilong helpim dispela wok. Tasol pastaim yumi mas tingim tok bilong Baibel i tok: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.” (Sindaun 14:15) Olsem na nogut yumi bilip kwik long tok bilong sampela lain. Yumi mas save: Ol bai mekim wanem wok long dispela mani? Kristen i mas helpim kain lain olsem? Ol i insait long sampela wok politik o wok bilong litimapim kantri o wok bilong lotu giaman? Na dispela wok bai helpim tru ol man o em i pait wantaim ol lo bilong Baibel?
Tru, sampela lain i save helpim gut ol taranguman. Sampela taim ol bikpela bagarap o bikpela sik i bin kamap na ol dispela lain i bin helpim ol Kristen yet. Tasol sampela lain i save tromoi bikpela hap bilong dispela mani long stretim dispela wok bilong ol, olsem na liklik hap mani tasol i stap bilong mekim wok ol i tok long mekim long dispela mani. Olsem: Ol i bin skelim 117 bikpela oganaisesen long Amerika i no save kisim winmani, em sampela i save bungim mani bilong helpim ol taranguman. Orait, ol i kisim save olsem, sampela man i holim bikpela wok insait long ol dispela lain ol i save kisim bikpela pe olsem 200,000 kina insait long wanpela yia. Na sampela samting moa i kamap ples klia—ol i save baim ol gutpela gutpela samting bilong ol yet long dispela mani, na ol i gat gutpela sindaun tru. Olsem na bilong helpim ol taranguman olsem Baibel i tok, yumi no ken ting yumi mas givim mani long ol kain lain olsem.
Stretpela Tingting
Tru, yumi no laik tromoi nating mani bilong yumi, na yumi no laik lukim ol i kisim dispela mani bilong helpim ol yet. Tasol nogut dispela tingting i pasim yumi na yumi no laik givim samting bilong helpim man. Maski sampela lain i no mekim gut wok long dispela mani, o ol i giaman na paulim mani, yumi no ken givim baksait long ol taranguman na yumi no sori liklik long ol. Sindaun 3:27, 28 i tok: “Sapos wanpela man i sot long samting na em i askim yu long givim em, yu no ken tok, ‘Nogat.’ Sapos yu inap, yu mas givim em. . . . Yu no ken tokim em olsem, ‘Wet pastaim. Tumora yu kam bek na bai mi givim yu.’ ” (Lukim 1 Jon 3:18.) Yu no ken ting olgeta lain olsem ol i save tromoi nating dispela mani o ol i save paulim. Skelim wok ol i mekim na nau yu ken tingting—bai yu givim mani long dispela lain o nogat—em samting bilong yu.
Planti man ol i laik givim mani samting i go stret long man o famili i sot long samting. Olsem na ol i save, dispela mani inap helpim kwik ol. Na nau ol i gat rot bilong mekim sampela samting bilong helpim ol o givim gutpela tok long ol bilong strongim bel bilong ol. Na maski yu yet yu no gat planti mani samting, yu inap givim liklik samting long ol. Olsem na bihain sapos yu harim olsem wanpela man o famili i sot long kaikai samting, givim ol samting long ol inap long skel bilong yu, olsem 2 Korin 8:12 i tok: “God i save ting long ol samting ol wan wan man ol inap long givim.”
Na tingim tu, sampela taim i no mani inap helpim tru ol man. Jisas i tokim ol disaipel: “Yupela go na autim tok olsem, ‘Kingdom bilong heven em i kam klostu pinis.’ . . . Yupela i mas givim nating long ol manmeri.” (Matyu 10:7, 8) Na long nau tu, ol Kristen i save, taim na strong na mani ol i tromoi long helpim wok bilong autim tok bilong Kingdom, dispela i save helpim ol man long nau na em i helpim ol long tingim gutpela samting bai kamap bihain. Olsem na em i nambawan samting tru ol inap givim long man.
Em nau, Baibel i makim olsem yumi mas mekim gut long ol man na givim samting long man i sot. Na yumi mas helpim ol man long ol samting bilong skin, na yumi no ken givim baksait long dispela wok. Tasol yu no ken ting yu mas givim mani long olgeta lain i singaut long en. Skelim wanem gutpela wok yu ken mekim long mani bilong yu bambai God i amamas long en na yu inap helpim gut famili bilong yu na ol narapela man tu. (1 Timoti 5:8; Jems 2:15, 16) Bihainim pasin bilong Jisas long tingim na helpim ol man i sot long ol samting bilong spirit na bilong skin. Hibru 13:16 i tok: “Yupela i mas mekim gutpela pasin long ol manmeri. Na sapos sampela i sot long ol samting, orait yupela i mas givim sampela samting bilong yupela bilong helpim ol. . . . dispela kain ofa God i save laikim tru.”