Baibel i Tok Wanem?

God i Save Lusim Tingting Olgeta Long Sin Bilong Yumi?

“Mi pilim olsem God i no inap tru lusim tingting long ol rong bilong mi. Em bai no inap orait long mi, long wanem, mi bin mekim rong.”​—Gloria.

I NO hatwok long Gloria i tokim ol narapela olsem Jehova inap lusim ol rong bilong ol.a Tasol taim Gloria i tingim ol popaia bilong em yet, em i pilim olsem Jehova i no inap orait long em.

Taim man i save em i bin mekim wanpela rong o wokabaut bilong em i no stret, dispela inap bagarapim tru bel bilong em. Devit i bin mekim rong, na bihain em i tok: “Mi krai nogut long san na long nait. Olsem na bodi bilong mi i slek olgeta.” (Song 32:​3, 4; skelim wantaim Song 51:3.) Jehova i save amamas long lusim rong. Em i man bilong “rausim sin.”​—Song 86:5; Esekiel 33:11.

Tasol Jehova i save lukim bel bilong man. Em i no sori nating na long dispela as em i lusim rong bilong man. Nogat. (Kisim Bek 34:7; 1 Samuel 16:7) Sinman i mas autim rong bilong em, na kamapim klia olsem em i sori tru, na em i mas givim baksait olgeta long ol pasin nogut em i bin mekim olsem samting em i no laikim tru. (Song 32:5; Rom 12:9; 2 Korin 7:11) Long dispela samting tasol bai Jehova inap lusim ol rong bilong em na “givim nupela strong” long em.​—Aposel 3:​19, 20.

Tasol maski sampela i tanim bel pinis, bel i kotim ol yet. Olsem wanem? Ol i mas karim dispela hevi inap oltaim? I gat sampela tok long Baibel bilong mekim isi bel bilong ol man i bel hevi tru long ol rong ol i bin mekim na ol i lusim pinis, tasol bel i wok long kotim ol yet?​—Song 94:19.

Tekewe Hevi

Taim Devit i bel hevi tru long ol popaia em i bin mekim, em i beten long Jehova olsem: “Tingting long olgeta bel pen na hevi i stap long mi, na tekewe olgeta sin bilong mi.” (Song 25:18) Devit i no askim Jehova long lusim tasol ol rong. Nogat. Em i askim Jehova long “tekewe” ol sin bilong em, olsem rausim na karim i go. Sin i save kamapim ol bikpela hevi, na wanpela hevi bilong en em Devit i pilim tru​—em bel i gat tok.

Long olgeta yia ol Israel i save lukim wanpela samting i helpim ol long tingim olsem Jehova inap tekewe olgeta sin bilong ol. Long Bikpela De Bilong God I Tekewe Sin Bilong Ol Manmeri, hetpris i save putim tupela han long het bilong wanpela meme na autim olgeta sin bilong ol Israel, na bihain em i salim dispela meme i go longwe long ol, long wanpela hap i no gat man. Olgeta man i stap inap tingim olsem ol sin bilong ol i tekewe pinis.​—Wok Pris 16:​20-22.

Olsem na ol man i tanim bel pinis na i hevi tru long ol sin bilong ol, bel bilong ol i ken i stap isi. Ol samting i kamap long Bikpela De Bilong God I Tekewe Sin Bilong Ol Manmeri i makim wanpela rot bilong tekewe sin i winim tru dispela rot long bipo​—em ofa bilong Krais Jisas bilong baim bek yumi. Aisaia i bin tok profet long Jisas olsem: “Em i . . . karim hevi bilong sin bilong planti manmeri.” (Aisaia 53:12) Em nau, i no olsem bel i mas i gat tok yet long ol rong yu bin mekim long bipo. Tasol olsem wanem? Jehova bai tingim gen ol sin bilong yumi long wanpela taim bihain?

Lusim Dinau

Jisas i tok yumi mas beten olsem: “Lusim ol rong bilong mipela.” (Matyu 6:12) Pasin bilong lusim rong i kain olsem pasin bilong lusim wanpela dinau.​—Skelim wantaim Matyu 18:​23-35.

Olsem na ol man i tanim bel pinis, ol i no ken pret na ting olsem bihain bai God i askim ol long bekim ol dinau​—olsem ol sin​—em God i lusim pinis. God i tok: “Bai mi no tingim moa ol dispela sin.” (Aisaia 43:25; Rom 4:​7, 8) Dispela i makim wanem long man i bel hevi tru long rong em i bin mekim?

Rausim Mak Bilong Sin

Long maus bilong profet Aisaia Jehova i tok: “Maski yupela i gat planti sin . . . olsem waitpela laplap em retpela pen i bagarapim pinis, mi Bikpela, mi tok, bai yupela inap kamap waitpela gen olsem ais, na olsem waitpela gras bilong sipsip.”​—Aisaia 1:18.

Taim man i traim long rausim wanpela strongpela mak i pas long klos samting, planti taim em i no inap. Ating mak i tekewe liklik, tasol yu inap lukim yet. Tasol yumi amamas tru olsem Jehova inap mekim na ol sin i olsem retpela pen i ken kamap waitpela olsem ais.​—Skelim wantaim Song 51:7.

Olsem na man i hevi tru long rong em i bin mekim i no ken ting dispela sin i olsem wanpela mak em bai pas long em inap olgeta taim. Jehova i no save rausim hap sin tasol na bai man i hevi long rong bilong em i sem i stap inap olgeta taim.​—Skelim wantaim Aposel 22:16.

Ol Narapela i Mas Helpim

Maski Jehova i tekewe pinis hevi bilong sin, olsem lusim dinau na rausim mak bilong sin, tasol sampela taim man i hevi long rong em inap pilim bikpela bel hevi yet. Pol i stori long wanpela man bilong kongrigesen Korin, em i bin mekim rong tasol em i tanim bel na God i lusim rong bilong em. Na Pol i tok, “Nogut bikpela bel hevi moa i daunim tru dispela man.”​—2 Korin 2:7.

Ol inap helpim dispela man olsem wanem? Pol i tok moa: “Mi laik bai yupela i soim em olsem yupela i laikim em yet.” (2 Korin 2:8) Tru tumas, ol Kristen em ol i bel hevi tru long rong ol i bin mekim na Jehova i lusim rong bilong ol, ol i mas save tu olsem ol wanlotu i laikim ol na i orait long ol.

Tasol bilong dispela i ken kamap, ating sampela hap taim i mas lus pastaim. Man i tanim bel i mas wok strong long mekim ol pasin i stret inap long ol man i ken bilip long em na ol i no tingim moa dispela rong i bin semim em. Na em i mas sanap strong na no ken les kwik sapos sampela i bel hevi yet, long wanem, ol rong em i bin mekim i givim hevi long ol. Tasol man i tanim bel i ken bilip tru long Jehova em Man bilong lusim tingting olgeta long ol sin bilong yumi, olsem Devit tu i bilip na i tok: “God i save tekewe sin bilong yumi na sin i stap longwe tumas.”​—Song 103:12.

[Ol Futnot]

[Piksa Kredit Lain long pes 18]

Return of the Prodigal Son by Rembrandt: Scala/Art Resource, N.Y.