Ol Yangpela i Laik Save . . .

Husat Inap Helpim Mi Long Stretim Ol Hevi Bilong Mi?

“YUMI man yet i as bilong olkain trabel i kamap long yumi.” Em wanpela man i gat hevi i bin tok olsem inap 4 tausen yia i go pinis​—nem bilong em Jop. (Jop 5:7) Ating yu no gat ol bikpela hevi olsem Jop. Tasol ating yu ting planti hevi i save painim yu tu.

Ol i givim askim long wanpela lain yangpela long Amerika olsem: “Wanem samting i givim hevi moa long yupela?” Planti yangpela i tok, skul, papamama, mani, ol pren, ol brata susa​—em as bilong ol hevi bilong ol. Olsem wanem long yu? Ol wanlain i wok long pulim yu, o yu gat hevi long mani, o yu gat sampela hevi long skul? Ol senis i wok long kamap long skin na long bel bilong ol pikinini i laik kamap bikpela, em dispela i save givim hatwok long yu? Yu tingting planti long ol samting bai painim yu long bihain?

Sapos yu wok long tingim tingim ol dispela samting, em inap mekim na hariap bai yu bel hevi tru. Na tu, sapos yu pasim ol dispela hevi long bel bilong yu, ating dispela bai mekim na i olsem yu stap wanpis. (Skelim wantaim Sindaun 18:1.) Orait, yu ken mekim wanem bilong stretim ol hevi bilong yu? Yu wanpela i mas karim ol dispela hevi?

Nogat. Ol hevi bilong yu​—maski ol i olsem bikpela hevi tru​—i no narakain. Saveman King Solomon i bin skelim gut pasin bilong yumi man na bihain em i tok, “I no gat wanpela nupela samting i stap long dispela graun.” (Saveman 1:9) Olsem na ol narapela tu i bin karim ol hevi wankain olsem bilong yu, na ol i stretim pinis. Nogut yu ting olgeta taim yu mas stretim hevi long save bilong yu yet; sampela taim yu ken askim wanpela long helpim yu, em i bin karim wankain hevi na em i stretim pinis. Olsem: Sapos yu laik i go long wanpela hap bipo yu no bin go long en, ating bai yu askim wanpela i bin go long dispela hap long soim rot long yu, a? Tasol ating yu laik save, bai yu askim husat long helpim yu?

Ol Wanlain i Win Long Helpim Yu?

Planti yangpela i save kamapim hevi bilong ol long ol wanlain. Wanpela yangpela meri, em Anita, em i tok: “Sampela taim mi ting ol senis i wok long kamap long skin bilong mi i narakain. Na mi laik save, ‘Dispela samting i painim ol narapela tu o nogat?’ Long bel bilong mi mi save ting, nogut mi longlong na mi gat kain tingting olsem.” Yu inap ting olsem wanpela wanlain bai pilim tru tingting bilong yu, tasol wanpela i bikpela pinis​—olsem papa o mama yet​—em bai strong tumas long skelim pasin bilong yu o sutim tok long yu.

Tru, ol wanlain inap pilim tingting na hevi bilong yu, tasol i no olgeta taim bai ol inap givim gutpela tok long yu. Baibel i tok: “Ol man i kamap bikpela pinis . . . i bin traim planti taim long skelim wanem ol pasin i gutpela na wanem ol pasin i nogut, na nau ol i save gut pinis.” Ol i save olsem wanem? Baibel i bekim tok olsem, ol i “traim planti taim,” na ol i painim save pinis! (Hibru 5:14) Ol yangpela i sot long dispela save, long wanem, ol i no winim planti krismas inap long ol i ken kisim “gutpela tingting na save” olsem man i bikpela pinis. (Sindaun 3:21) Olsem na hevi inap painim yu sapos yu bihainim tok bilong wanpela wanlain.

Taim Papamama i Lotuim God

Ol bikpela man i save moa long stiaim gut tingting bilong yu. Stretpela man Jop i tok: “Ol lapun i gat planti gutpela tingting na save.” (Jop 12:12) Ating ol nambawan man bilong helpim yu olsem, em papamama ol i lotuim God. Ol i save gut long yu, winim ol narapela. Na tu, ol i bin karim sampela hevi wankain olsem nau yu karim, olsem na ol inap helpim yu tru long abrusim hevi. Solomon i givim tok olsem wanpela papa: “Ol pikinini, yupela i mas harim gut tok bilong mi, . . . na bai yupela i kisim gutpela tingting.”​—Sindaun 4:​1, 2.

Tingim wanpela yangpela man Gana, em Samuel. Taim em i stap long haiskul, em i mas makim wanem samting em i laik mekim bihain​—em i laik go long bikpela skul o em i laik mekim wok bilong autim tok long olgeta de olsem wanpela Witnes Bilong Jehova. Em i tok: “Famili bilong mi i save pas gut wantaim na toktok gut wantaim, olsem na mi no hatwok long kamapim tingting bilong mi long papamama.” Papamama bilong Samuel i stiaim em i go long mekim wok bilong autim tok long olgeta de​—na em i amamas yet long mekim dispela wok. Samuel i tok, i gutpela sapos ol yangpela i kisim tingting long papamama bilong ol taim ol i laik stretim hevi, long wanem, “papamama i gat bikpela save moa na ating ol i bin karim wankain hevi . . . na ol i save gut moa long skelim gut ol samting bilong dispela hevi.”

Wanpela lain i bin skelim dispela samting, na ol i tok, planti ol yangpela i laik bai papamama i mas stiaim ol​—na givim tingting long ol tu long ol samting bilong drak na skul na maritpasin.

‘Ol i No Pilim Tingting Bilong Mi!’

Tasol sori tru! Planti yangpela i surik long papamama taim ol i kisim 13 i go inap 19 krismas. Sampela i gat wankain tingting olsem wanpela yangpela man, em i tok: “Mi traim long tokim papamama olsem mi pret tru bai mi no winim gutpela mak long skul na mi ting dispela skul i givim hatwok tumas long mi, tasol papamama i tok, mi lesman na mi mas stadi moa​—em tasol.” Na wanpela yangpela meri Kristen long Afrika i gat wankain tingting, em i tok: “Mi save olsem mi mas kisim sampela helpim bilong stretim ol hevi bilong mi, tasol mi pret​—nogut papamama i no pilim tingting bilong mi.”

Tru, ol papamama Kristen tu i save popaia sampela taim. Ating ol inap kros nogut tru long sampela samting yu mekim, o ol i no putim gut yau, o ol i kisim tingting kranki long yu, o ol i mekim tok olsem ol i kotim yu. Tasol dispela i no makim olsem yu mas givim baksait long ol. Papamama bilong Jisas i no gutpela olgeta, tasol Baibel i tok, oltaim Jisas “i bihainim tok bilong tupela.” Ol i stiaim wokabaut bilong Jisas, olsem na “save bilong en i kamap gutpela tru. Na God i laikim em tru na ol man tu i laikim em.”​—Luk 2:​51, 52.

Olsem wanem? Yu save larim gutpela tingting na save bilong papamama i helpim yu? Olsem wanem long i stap bilong yu wantaim papamama? (Galesia 6:5) Ating yu no save toktok gut moa wantaim ol? Orait, gutpela sapos yu wok long stretim dispela samting, a?a

Malcolm, em wanpela yangpela man Gana na em i stap nau long Amerika, bipo em i save ting papamama i no pilim tingting bilong em. Tasol papamama i no bin les long givim gutpela save bilong ol long em, na long stretim em long rot bilong Baibel. Nau Malcolm i raitim wanpela pas long papamama, na em i tok: “Mi save, long bipo yumi no save stap wanbel long sampela samting. Tasol nau mi tingim bek na mi kirap nogut long pasin yupela i bin mekim, olsem: Maski mi gat strongpela het, yupela i no save les kwik long mi, na taim mi pasim tok long bel long sampela samting mi laik mekim, yupela i stap isi tasol. Mi save long ol samting i save kamap long sampela famili, tasol Baibel i bin helpim tru famili bilong yumi long i stap narapela kain. Tenkyu gen.”

Wok Long Kisim Gutpela Tingting!

Sapos yu kisim tok long papamama bilong stiaim yu, dispela inap helpim yu hariap moa long kamap man o meri tru. Na bihain yu tu bai kisim ‘gutpela tingting na gutpela save.’ (Sindaun 1:4) Bai yu inap skelim gut ol hevi na save long wanem rot yu mas stretim.

Tru i no olgeta yangpela em papamama bilong ol i Kristen. Tasol nogut long dispela as tasol yu kisim tingting kranki olsem yu no ken bihainim tumas tok bilong ol. Ol i stap papamama bilong yu na yu mas aninit long ol. (Efesus 6:​1-3) Na tu, sapos yu askim ol, ating bai yu painim olsem ol inap givim planti gutpela tok bilong helpim yu long ol samting bilong skin. Na sapos yu laik bai wanpela i ken stiaim tingting bilong yu long ol samting bilong spirit, gutpela sapos yu toktok wantaim wanpela brata o sista i stap gut long kongrigesen Kristen. Bai i no hatwok long painim wanpela Kristen i bikpela pinis em bai putim yau gut long tok bilong yu, na bel bilong em bai sori na i pilim tru tingting bilong yu.

Na tingim tu: Jehova i save amamas long givim spirit bilong em bilong helpim na strongim ol man i askim em. (Luk 11:13) Jehova i givim planti save tu em yu inap kisim long Baibel na long ol buk samting i gat ol tok bilong Baibel long en, em Sosaiti Was Taua i wokim. Ol dispela stori bilong ol yangpela tu i bin helpim planti tausen yangpela long kisim gutpela helpim bilong stretim ol hevi bilong ol! Sapos yu lain long stadi gut na glasim gut ol tok bambai yu ken kisim sampela save moa, ating bai yu yet inap stretim planti hevi bilong yu.​—Sindaun 2:4.

Hevi em wanpela samting i save painim yumi olgeta. Tasol gutpela sapos yu kisim stretpela tingting olsem man bilong raitim Song, em i tok: “I gutpela tru yu bin mekim save long mi. Dispela i skulim mi gut long ol lo bilong yu.” (Song 119:71) Tru tumas, taim yu wok long stretim ol hevi, dispela inap skulim yu na senisim tingting na pasin bilong yu. Tasol i no olsem yu wanpela tasol i mas karim ol hevi bilong yu. Kisim sampela helpim. Helpim i stap​—tasol yu yet mas askim na bai yu kisim.

[Ol Futnot]

[Piksa long pes 16]

Sapos yu kisim tok long papamama bilong stiaim yu, dispela inap helpim yu hariap moa long kamap man o meri tru