Binatang Bilong Kalap Kalap na Wokim Musik
MIPELA save mipela kaikai planti na dispela samting i mekim na ol fama i save kros. Ol fama i ting mipela i wanpela binatang nogut i save bagarapim gaden bilong ol. Tasol mipela ol grasopa i gat sampela gutpela pasin—pasin bilong kalap kalap, na flai, na wokabaut i go antap long wanpela samting, na wokim “musik.”
Olsem wanem? Yu save mipela i gat 5-pela ai? Long poret bilong pes mipela i gat 3-pela ai bilong lukim ol samting i stap klostu. Narapela tupela ai i bikpela na i stap antap liklik long pes bilong mipela. Dispela tupela bikpela ai bilong mipela inap lukluk raun long olgeta samting. Olsem wanem? Yu laikim kain ai olsem bilong mipela?
Olsem wanem? Yu ting mipela i save gut long kalap? Mipela save. Mipela inap kalap i go antap, winim mak bilong longpela bilong mipela inap 10-pela taim. Na taim mipela pundaun, mipela pundaun longwe liklik, olsem wanpela mita. Bilong tingim gut dispela samting yu ken tingim wanpela man. Sapos dispela man inap kalap i go antap na winim mak bilong wanpela bikpela haus i gat 6-pela plua, dispela i makim kalap bilong mipela grasopa. Mipela inap kalap olsem, long wanem, lek bilong baksait i gat ol strongpela masol.
Yu bai hatwok long holim mipela, long wanem, taim mipela kalap, mipela i save wokim 4-pela pul bilong mipela. Tupela strongpela pul antap i save mekim wankain wok tupela pul bilong balus i save mekim. Na tupela pul aninit i helpim tupela pul antap na mipela inap spit tru. Olsem na taim lek na pul bilong mipela i wok wantaim, mipela inap flai i go long hap yu no inap kisim mipela long en.
Olsem wanem long yu? Yu hatwok long go antap long wanpela pos i wel? Mipela i no hatwok. Na maski mipela wokabaut long wanpela lip i wel, mipela i no pundaun, long wanem, Man i bin wokim olgeta samting em i givim 6-pela gutpela lek long mipela. Aninit long lek i gat ol sotpela sotpela gras na wanpela kain wara i save pas long dispela gras. Dispela i gutpela, long wanem, lek bilong mipela inap holim gut ol samting. Na tu, olgeta lek i gat tupela strongpela huk, olsem na sapos mipela stap long wanpela hap i go antap tumas, mipela i no inap kostan i go daun. Tru tumas, paslain long ol man i gat laik na tingting long wokabaut i go antap long ol maunten, skin bilong mipela i gat olgeta samting bilong go antap long wanpela hap i antap tumas.
Ol grasopa man i save wokim musik, meri nogat. Yes, mipela inap harim na bekim kain kain krai. Yau bilong mipela i stap arere arere long bel. Taim grasopa man i laik wokim krai o musik bilong em, em i save apim wanpela lek bilong baksait i go antap long wanpela pul bilong em. Nau em i wokim lek i go i kam long ol rop bilong dispela pul. Em nau, musik bilong en i kamap. Mipela amamas tru long slip insait long gras long taim bilong san na harim kain krai olsem. Na taim wan tausen grasopa na kriket i save mekim, man! Em gutpela tru!