I Olsem Maunten i “Meknais”
LONG hap wes bilong Aialan, wanpela narapela kain maunten i gat sap em i sanap namel long ol narapela maunten, nem bilong en Kro Patrik. Long olgeta yia, long laspela Sande bilong Julai, i olsem het bilong maunten i meknais, long wanem, inap olsem 30,000 manmeri—ol lapun na yangpela—i wokabaut i go antap long en (em i antap inap 765 mita). Ol i ting dispela em i ples holi.
Long dispela de ol i wokabaut i go antap na i kam daun long wanpela liklik rot i gat ol ston na long sampela hap i gat ples nogut. Laspela hap bilong rot (inap 300 mita) i antap tumas na ol ston i lus nabaut, olsem na taim ol man i wokabaut i go antap, skin bilong ol i les na bagarap inap painim ol.
Sampela i wokabaut lek nating na i go antap, na wan wan i wokabaut long skru bilong lek long sampela hap. Bipo ol i save kirap long wokabaut long taim bilong tudak.
Olsem wanem na planti manmeri tru i laik tumas long wokabaut i go antap long maunten Kro Patrik?
Dispela Pasin i Kamap Long Bipo Yet
Long yia 400 samting, Misin Katolik i salim bisop Patrik i go long Aialan olsem misineri. Wok bilong em i bilong mekim ol Aialan i kamap Kristen. Inap planti yia em i autim tok na wok namel long ol manmeri, na em i kisim nem olsem man i bin kamapim lotu Katolik long Aialan.
Bilong mekim wok bilong em, em i raun long planti hap bilong Aialan. Em i go long hap wes na sampela man i tok, em i stap antap long wanpela maunten long dispela hap inap 40 san na 40 nait. Olsem na ol i kolim dispela maunten olsem Kro Patrik (em “Maunten Bilong Patrik”). Em i tambuim kaikai na beten askim God long mekim wok bilong em i kamap gutpela.
Kain kain stori nating i bin kamap long ol wok em i mekim. Wanpela kain stori bilong ol tumbuna olsem na planti man i save long en i tok, taim Patrik i stap long dispela maunten, em i rausim olgeta snek long Aialan.
Ol stori i tok, em i wokim liklik haus lotu long het bilong maunten. Dispela haus lotu i bagarap pinis longtaim bipo, tasol as bilong haus i stap yet, na inap planti yia pinis ol man i tingim dispela ples na dispela maunten i ples holi na ol i kam long en.
Ol Samting Bilong Dispela Wokabaut
Sapos man i lapun o em i no save wokabaut i go antap long ol maunten, na em i wokabaut inap 5-pela kilomita i go antap tru long het bilong dispela maunten na i kam daun gen na bagarap i no painim em, em i mekim bikpela samting. Long sampela hap bilong rot i gat ol doktaboi i redi i stap bilong helpim ol man i kisim kain kain bagarap.
Long rot i gat 3-pela ples bilong beten na mekim penans. I gat notis-bot i givim toksave long ol manmeri long dispela long taim ol i no kirap yet long wokabaut i go antap.—Lukim blok.
Bilong Wanem Ol i Go Antap?
Bilong wanem planti ol i mekim dispela bikpela hatwok? Bilong wanem sampela i mekim bikpela hatwok moa?
Sampela i ting, sapos ol i beten taim ol i wokabaut, God bai harim ol beten bilong helpim ol yet, winim long ol narapela taim. Sampela i mekim dispela wokabaut olsem penans, long wanem, ol i bin mekim rong na ol i laik bai God i lusim rong bilong ol. Sampela i mekim bilong tenkyu long God. Sampela i go bilong kisim amamas bilong bikpela bung. Wanpela man i gat save em i tok, ‘em bilong makim olsem ol i laik wok gut wantaim ol narapela, na ol i amamas long ol, na laikim ol.’ Dispela man i tok, taim ol i wokabaut i go antap long maunten Kro Patrik “i olsem ol i bihainim lek bilong Patrik na ol i laik tenkyu long em, long wanem, em i givim bilip Katolik long ol.” Na em i tok bikpela samting tru em olsem, dispela wokabaut i olsem ol i “givim strafe long skin bilong ol bilong bekim ol rong bilong ol. Taim ol i wokabaut isi isi i go antap i olsem ol i mekim bikpela wok penans.”
Wanpela man i amamas na em i tok, em i bin wokabaut i go antap inap 25 taim! Em i tok em i mekim olsem “bilong mekim liklik wok penans!” Narapela man i tok tasol, “No gat pen, no gat helpim!”
Sampela i wokabaut lek nating i go antap, maski i no gat wok long ol i mekim olsem. Bilong wanem ol i mekim? Namba wan, ol i tingim dispela graun “i holi,” olsem na ol i lusim su. Namba 2, ol i gat tingting long “mekim liklik wok penans”—ol i laik givim strafe long skin bilong ol olsem bekim bilong ol rong bilong ol. Dispela i as na sampela i wokabaut long skru bilong lek.
Bel i Kirap Long Laikim God
Tasol olsem wanem sapos wanpela man i no tingim dispela maunten em i ples holi olsem ol dispela man i wokabaut i go antap long wanpela de bilong yia? Sapos i gat gutpela taim na em i gat strongpela su, em i ken wokabaut i go antap long wanem wanem taim em i laikim. Mipela i wokabaut i go antap long wanpela de i no gat bikpela lain man i wokabaut i go antap bilong lukim ples ol i ting em i holi. Mipela i malolo sampela taim na mipela i tingim dispela wokabaut ol man i mekim na ol samting dispela i mekim long planti man. Mipela i tingim ol dispela tausen tausen manmeri i mekim bikpela hatwok olsem penans, na mipela i tingting: ‘Dispela em laik bilong God? Sapos man i wokabaut i go antap o em i wokabaut raunim sampela ston ol i putim olsem mak na mekim planti beten nating, yu ting dispela inap helpim em long i stap klostu long God?’ Olsem wanem long tok bilong Jisas long Matyu 6:6, 7 long pasin bilong mekim planti beten nating?
Mipela i no ting long kamap holi na mipela i wokabaut i go antap. Tasol taim mipela i wokabaut i go antap mipela i lukim ol gutpela maunten God i bin wokim, na mipela i pilim olsem mipela i stap klostu long God. Ol maunten long olgeta hap bilong graun i gutpela samting God i bin wokim. Taim mipela i sanap long het bilong maunten mipela inap lukim gutpela ples i go inap long solwara Atlantik. Long wanpela hap mipela i lukim ol liklik ailan i lait long pasis daunbilo, na bikpela ples maunten ston long narapela hap.
Mipela i tingim 3-pela ples ol i makim bilong beten na mekim penans, na mipela i tingim tok bilong Jisas yet, em i tokim ol disaipel tru bilong em: “Taim yupela i mekim prea, maski long mekim planti toktok nating, olsem ol haiden i save mekim. Ol i ting sapos ol i mekim planti toktok bai God i harim ol.”—Matyu 6:7.
Mipela i save, pasin bilong kam long dispela maunten i kamap wanpela pasin i givim bikpela hatwok long planti tausen manmeri na i kalabusim ol long mekim nating sampela pasin bilong lotu. Dispela i narapela kain long pasin bilong i stap fri em aposel Jon i tok long en taim em i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.”—1 Jon 5:3.
Mipela i amamas long raun na long i go antap long maunten Kro Patrik. Ol samting mipela i lukim i mekim bel bilong mipela i kirap na mipela i tingim gutpela taim bihain na bai olgeta manmeri i no kalabus moa long ol pasin em Baibel i no as bilong en, na bai olgeta inap lotu long God ‘long spirit na long pasin i tru.’—Jon 4:24.
[Blok long pes 27]
Ol Bikpela Samting Bilong Dispela Wokabaut
Man o meri i wokabaut i go antap long maunten long De Bilong Santu Patrik o long wanpela de long mun Jun, o Julai, o Ogas, o Septemba, na em i BETEN INSAIT LONG LIKLIK HAUS LOTU O KLOSTU LONG EN bilong helpim ol wok Pop i laik mekim, em inap kisim indulgensia sapos em i go long Konpesio na Komunio long Het bilong maunten o insait long wanpela wik bihain.
OL PLES BILONG BETEN
I gat 3-pela ples bilong beten (1) Long as bilong sap bilong maunten o long Lakt Benon, (2) Long het bilong maunten, (3) Long Roilig Mur, daunbilo liklik long sait em taun Likanwe i stap long en.
Ples Beten Namba 1 - LAKT BENON
Man i mas wokabaut raunim hip ston 7-pela taim na kolim Beten Bilong Bikpela 7-pela taim, na Beten Bilong Maria 7-pela taim, na wanpela Tok Bilong Bilip.
Ples Beten Namba 2 - HET BILONG MAUNTEN
(a) Man i brukim skru na kolim Beten Bilong Bikpela 7-pela taim, Beten Bilong Maria 7-pela taim, na wanpela Tok Bilong Bilip
(b) Man i beten klostu long Haus Lotu bilong helpim ol wok Pop i laik mekim
(c) Man i wokabaut raunim Haus Lotu 15 taim, na em i kolim Beten Bilong Bikpela 15 taim, na Beten Bilong Maria 15 taim na wanpela Tok Bilong Bilip
(d) Man i wokabaut raunim Leaba Patrik [Bet Bilong Patrik] 7-pela taim, na em i kolim Beten Bilong Bikpela 7-pela taim, na Beten Bilong Maria 7-pela taim, na wanpela Tok Bilong Bilip
Ples Beten Namba 3 - ROILIG MUR
Man i wokabaut raunim olgeta 3-pela hip ston wan wan 7-pela taim, na em i kolim Beten Bilong Bikpela 7-pela taim, na Beten Bilong Maria 7-pela taim, na wanpela Tok Bilong Bilip. Na em i raunim banis olgeta bilong Roilig Mur na beten 7-pela taim.