Ol i Save Moa Long Kalap Long Maunten Ston

LONG nambis long hap bilong wes bilong raunwara Detsi, wanpela olpela taun na ples drai nating ol i kolim Engedi i bin stap. Ol ples ston bilong dispela hap na ol arere bilong maunten i sap tru em gutpela hap bilong wel meme bilong Graun Bilong Promis i ken stap long en, kain olsem yumi lukim long piksa hia.

Dispela animal em wanpela bilong ol gutpela gutpela animal God i bin wokim. Gutpela sapos yumi opim Baibel na kisim sampela save moa long dispela nambawan animal.

“Ol Wel Meme i Save Wokabaut Long Ol Bikpela Maunten”

Em wanpela singsing man bilong raitim Song i bin mekim. (Song 104:18) God i bin wokim wel meme bilong maunten inap stret long em i ken stap long ol ples i antap tru! Ol i save kalap na spit na ol i no pret, maski maunten i gat ol bikpela ston. Wanpela samting i helpim ol long mekim olsem em kapa bilong lek bilong ol. Kapa bilong lek i gat tupela pinga bilong en, na taim wel meme i sanap o wokabaut long wanpela liklik rot bilong ston, tupela pinga bilong en inap op moa bambai lek i ken holim gut graun.

Ol wel meme bilong maunten inap sanap gut tru na i no pundaun. Ol inap kalap longwe tru na sanap long wanpela liklik ples ston, em i liklik tru inap tasol long 4-pela lek bilong ol. Wanpela taim saveman Douglas Chadwick i bin lukim wanpela wel meme i narapela kain long wel meme hia, em i mekim wok long gutpela save bilong em long sanap gut taim em i wokabaut long wanpela ples ston i liklik tumas bilong em i ken baut long en, na nau rot bilong em i pas na em i no gat rot moa. Em i tok: ‘Wel meme i tromoi ai pastaim long narapela liklik ples ston i stap 120 mita daunbilo, na em i putim strong tupela han bilong en long graun na isi isi em i apim tupela lek bilong baksait i go antap long het na i kam daun stret klostu tru long tupela han, na taim em i mekim olsem, het na bodi i tanim na i lukluk i go long hap em i bin kam long en. Mi kirap nogut long lukim dispela samting.’ (Nius National Geographic) Nau yumi save i gat wanem as na ol man i tok, ol wel meme bilong maunten i ‘save moa long kalap long ol maunten ston’!

‘Yu Save Wanem Taim Ol Wel Meme Bilong Ples Maunten i Save Karim Pikinini?’

Wel meme em animal bilong pret, na ol i laik stap longwe long ol man. I hatwok long ol man i ken go klostu long hap ol i save stap long en bilong lukim ol. Olsem na Papa bilong ‘olgeta wel abus bilong bus i stap long olgeta maunten’ em inap askim Jop olsem: “Olsem wanem? Yu save wanem taim ol wel meme bilong ples maunten i save karim pikinini, a?”​—⁠Song 50:10; Jop 39:⁠1.

God i putim hap save insait long skin bilong wel meme meri na em i save long taim bilong em bilong karim pikinini. Em i save painim wanpela ples em i ken hait long en na nau em i karim wanpela o tupela pikinini. Em i save mekim olsem long pinis bilong Me o long Jun. Insait long sampela de tasol, ol nupela pikinini i lain pinis long wokabaut gut.

“Wanpela Gutpela Dia na Wanpela Naispela Meme Bilong Maunten”

Saveman King Solomon i tokim ol man marit olsem: “Yu mas amamas wantaim meri bilong yu em yu bin kisim taim yu yangpela yet, em i wanpela gutpela dia na wanpela naispela meme bilong maunten.” (Sindaun 5:​18, 19, NW) Solomon i no bin mekim dispela tok bilong daunim ol meri, nogat. Ating taim em i mekim dispela tok em i tingim naispela skin bilong ol wel meme, na gutpela pasin bilong ol long wokabaut, na sampela nambawan pasin moa bilong ol.

Wel meme bilong maunten em wanpela bilong ol planti “samting i gat laip” ol i kamapim klia bikpela save bilong Man bilong wokim ol. (Stat 1:​24, 25) Yumi amamas tru long God i bin wokim planti ol nambawan animal bilong yumi ken lukim, a?

[Piksa Kredit Lain long pes 24]

Kisim long Athens University