Ol Samting Jehova i Wokim i Nambawan Tru

“Biknem Bilong Yu i Winim Tru Biknem Bilong Ol Bikpela Maunten”

MAN i stap antap long het bilong maunten Fuji na i lukim tulait i bruk na san i wok long kam antap, em i no inap lusim tingting long dispela gutpela samting tru. San i retpela tru olsem paia na i givim lait long waitpela sno na ol ston lava i grei. Nupela de i kirap, na kwiktaim tewel bilong maunten i go planti kilomita na i karamapim ol liklik maunten na ol ples daun.

Olsem maunten Fuji​—⁠bipo long rait bilong ol Japan mining bilong en “i no gat narapela olsem dispela”​—⁠long olgeta taim ol traipela maunten i save mekim na yumi kirap nogut tru. Traipela bilong ol i mekim na yumi pilim olsem yumi samting nating! Ol i bikpela na naispela tru, olsem na planti man i bilip olsem ol het bilong maunten i antap tru na ol klaut na smok i karamapim, em ples bilong ol god.

Tasol i gat wanpela God tasol ol dispela het bilong maunten i save litimapim, em Man Bilong Wokim ol, Jehova. Em wanpela tasol “i bin wokim ol maunten.” (Amos 4:​13) Klostu 25 pesen bilong graun i gat ol maunten, na taim God i bin wokim graun bilong yumi, em i wokim ol bikpela strong i kamapim ol traipela naispela het bilong maunten na ol ples maunten. (Song 95:⁠4) Olsem: Ol man i ting ol bikpela kil bilong ol maunten Himaleya na ol maunten Andes i kamap long taim ol bikpela guria i bin kamap insait long graun na graun i stap antap i surik surik.

Yumi ol man i no klia gut olsem wanem ol maunten i kamap na bilong wanem ol i kamap. Tru tumas, yumi no inap bekim ol askim God i bin givim long stretpela man Jop, olsem: “Taim mi wokim na strongim as bilong dispela graun, yu stap we? . . . Ol pos bilong strongim graun i sanap long wanem hap?”​​—⁠Jop 38:​4-6.

Tasol yumi save, i mas i gat ol maunten bambai yumi ken i stap laip. Ol man i kolim ol maunten olsem ol as bilong wara, long wanem, olgeta bikpela wara i kisim wara long ol maunten, na inap 50 pesen bilong olgeta manmeri bilong dispela graun i kisim wara long ol maunten. (Song 104:13) Nius New Scientist i tok: “Long ol 20 nambawan sayor bilong graun inap 6-pela i bin kamap pastaim long ol maunten.” Long nupela taim God i bin tok promis long en, ol samting bilong graun bai stap stret na “planti rais na wit samting i ken kamap long ol gaden bilong ol manmeri, inap olsem i save kamap long Lebanon [“ol maunten,” NW ].”​​—⁠Song 72:16; 2 Pita 3:⁠13.

Planti man, taim ol i harim sampela stori bilong ol maunten, ol i tingim ol maunten Alp long Yurop. Ol dispela het bilong maunten, olsem maunten Civetta, em piksa yu ken lukim long hia, ol i kamapim long ples klia olsem i gat wanpela Man Bilong Wokim ol. (Song 98:⁠8) Ol i litimapim nem bilong Jehova, em man i bin “mekim ol maunten i kamap na ol i stap long ples bilong ol.”​​—⁠Song 65:⁠6.a

Ol maunten Alp ol i naispela maunten tru​—⁠ais i karamapim ol kil bilong ol, na sno i karamapim ol sait sait bilong maunten, na i gat ol ples daun na ol raunwara, na ol gutpela ples i gat gras. King Devit i tok Jehova em i Man i “mekim gras i kamap nabaut long ol maunten.”​​—⁠Song 147:⁠8.

Ating ol maunten​—⁠olsem ol dispela maunten long Guilin, Saina​—⁠i no bikpela olsem ol maunten Alp, tasol ol i naispela tru. Ol i stap klostu long wara Li, na ol man i kam raun long dispela hap i laikim tru ol dispela naispela maunten. Taim ol man i lukim klinpela wara i ran long ol dispela maunten ol i tingim tok bilong man i raitim song. Em i tok: “Yu [God] save mekim wara i kamap long ol hul bilong graun long ples daun namel long ol maunten, na yu mekim wara i ran i go daun long ples stret.”​​—⁠Song 104:⁠10.

I stret yumi save kirap nogut long ol maunten, long wanem, yumi save ol i bikpela samting em Man Bilong Wokim olgeta samting i bin wokim bilong helpim na amamasim ol man. Yumi amamas tru long lukim ol, tasol ol maunten i liklik samting sapos yumi tingim biknem bilong Jehova. Tru tumas, em i “antap moa na biknem bilong [em] i winim tru biknem bilong ol bikpela maunten.”​​—⁠Song 76:⁠4.

[Futnot]

[Blok/Piksa long pes 9]

Inap 10 pesen bilong ol manmeri i save sindaun long ol ples maunten. Tasol dispela em i no bikpela samting i pasim ol man i autim gutnius bilong Kingdom Bilong God. Ol dispela wokman Kristen i wok strong tru long autim tok long planti ples maunten. Na “man i ran i kam long ol ples maunten bilong bringim gutpela tok i kam, lek bilong em i naispela tru; em man bilong autim tok bilong bel isi, na gutpela tok bilong samting i gutpela moa, em man bilong autim tok long God i kisim bek ol.”​​—⁠Aisaia 52:​7, NW.

Man bilong raitim song i tok: “Ol wel meme i save wokabaut long ol bikpela maunten.” (Song 104:18) Ol wel meme, olsem naispela wel meme i gat tupela kom ol i kolim Nubian aibeks, ol i save gut tru long kalap kalap long ol maunten, winim ol narapela animal bilong ples maunten. Ol i save raun long ol hap i hatwok tru long wokabaut long en. Dispela wel meme i gat ol samting i helpim em long i stap long ol ples i hatwok tru long ol man i go long en. Em inap mekim olsem, long wanem, em i gat narapela kain kapa bilong lek. Kapa bilong lek i gat tupela pinga, na taim wel meme i sanap o wokabaut long ol ston, tupela pinga bilong en inap op na holim gut ston. Tru tumas, God i wokim wel meme i nambawan tru!

[Piksa long pes 9]

Maunten Fuji, ailan Honshu, Japan