Ol Yangpela i Laik Save . . .

Olsem Wanem? I Gutpela Long Toksave Long Narapela Olsem Mi Stap Bel Hevi?

“Taim mi stap bel hevi, pastaim mi no laik tokim narapela, nogut ol i ting mi wanpela kranki pikinini. Tasol bihain mi kisim tingting olsem mi mas toktok wantaim narapela i bikpela long mi bilong kisim sampela helpim.”​—⁠Alejandro, 13 krismas.

“Taim mi bel hevi, mi no save tokim ol pren bilong mi, long wanem, mi no ting ol i ken helpim mi. Ol bai tok bilas tasol long mi.”​—⁠Arturo, 13 krismas.

KLOSTU olgeta man i save stap bel hevi long sampela taim.a Tasol yu yangpela na yu no lain yet long planti samting, na dispela inap mekim na yu pilim olsem ol samting i painim yu i bikpela hevi tumas long karim. Ol samting papamama na ol pren na tisa i tokim yu long mekim, na ol senis i kamap long skin na tingting taim yangpela i wok long go bikpela; o tingting olsem yu no inap mekim wanpela samting i stret, long wanem, yu popaia long sampela liklik samting​—⁠ol dispela samting inap kamapim bel hevi.

Taim samting olsem i kamap, i gutpela long kamapim long wanpela yu inap bilip long en. Beatriz, em i gat 17 krismas, em i tok: “Sapos mi no inap toktok wantaim narapela long ol hevi bilong mi, bel bilong mi bai bagarap stret.” Tasol sori tru, planti yangpela i no save kamapim hevi bilong ol long ol narapela, na planti taim bel hevi bilong ol i wok long go bikpela moa yet. María de Jesús Mardomingo, em wanpela profesa bilong wanpela skul bilong ol dokta long Madrit, em i tok, taim planti yangpela i kisim tingting olsem ol i laik kilim i dai ol yet, ol i pilim olsem ol i stap wanpis tru. Na bikpela lain bilong ol yangpela i bin traim long kilim i dai ol yet, ol i tok taim ol i no mekim yet ol i hatwok tru long painim wanpela i bikpela pinis bilong toktok gut wantaim em na kamapim ol samting i stap long bel bilong ol.

Olsem wanem long yu? Yu gat wanpela yu inap kamapim tingting bilong yu long en taim yu stap bel hevi? Sapos nogat, husat narapela yu inap tingim?

Toktok Wantaim Papamama

Alejandro, em pastaim yumi stori long em, em i stori long samting em i save mekim taim em i bel hevi: “Mi toktok wantaim mama, long wanem, kirap long taim em i karim mi, em i save strongim bel bilong mi na em i save helpim mi long pilim olsem mi gat strong. Na tu, mi save toktok wantaim papa, long wanem, samting i kamap long mi i bin kamap long em tu. Sapos bel bilong mi i bagarap na mi no tokim narapela, bel hevi bilong mi bai i go bikpela moa.” Rodolfo i gat 11 krismas, na em i tok olsem: “Sampela taim tisa bai daunim mi na krosim mi, na dispela i mekim mi bel hevi tru. Mi save go long toilet na krai. Bihain mi toktok wantaim mama, na em i helpim mi long stretim hevi. Sapos mi no bin toktok wantaim em, mi bai pilim nogut moa yet.”

Olsem wanem long papamama bilong yu? Yu bin tingting long kamapim bel na tingting bilong yu long ol? Nogut yu gat tingting pinis olsem ol bai i no inap pilim hevi bilong yu. Tasol tru ol i olsem? Ating ol bai i gat hatwok liklik long save long olgeta hevi bilong ol yangpela long nau; tasol ating save bilong ol long ol samting bilong yu yet i winim ol narapela, a? Alejandro i tok: “Sampela taim papamama i gat hatwok long pilim tru ol samting i stap long bel bilong mi na save gut long tingting bilong mi.” Tasol em i tok olsem: “Mi save mi inap i go long ol na kamapim hevi bilong mi.” Planti taim ol yangpela i kirap nogut long kisim save olsem papamama bilong ol inap pilim tru hevi bilong ol! Krismas na save bilong papamama i bikpela moa, na long dispela as na planti taim ol i ken kamapim ol gutpela tok bilong helpim yu​—⁠na sapos tupela i save gut long pasin bilong bihainim ol lo bilong Baibel, ol inap helpim yu moa yet.

“Taim mi toktok wantaim papamama, mi save kisim strong na gutpela tingting bilong stretim ol hevi.” Em tok bilong Beatriz, em pastaim yumi bin stori long em. Olsem na i gat gutpela as na Baibel i givim dispela tok long ol yangpela: “Pikinini, yu mas harim tok bilong papamama bilong yu na yu no ken sakim tok bilong tupela. Papa bilong yu i bin kamapim yu na yu mas harim tok bilong en. Na taim mama bilong yu i lapun pinis, yu no ken rabisim em.”​—⁠Sindaun 6:20; 23:⁠22.

Tru, i hatwok long kamapim bel bilong yu long papamama sapos yu no save sindaun gut wantaim ol. Olsem Dokta Catalina González Forteza i tok, ol askim ol i bin givim long ol yangpela bilong haiskul i kamapim klia olsem ol lain em ol i tok olsem ol i bin traim kilim i dai ol yet, ol i gat tingting olsem ol i nogut tasol, na ol i no sindaun gut wantaim papamama. Tasol ol yangpela i no gat hevi long dispela kain tingting, planti “em ol yangpela i sindaun gut wantaim papamama.”

Olsem na bihainim gutpela tingting na wok strong long kisim pasin bilong sindaun gut wantaim papamama. Kisim pasin bilong toktok wantaim ol long olgeta taim. Tokim ol long ol samting i save kamap long yu. Givim askim long ol. Pasin bilong toktok gut olsem bai i mekim na bai yu no gat hatwok long toktok wantaim ol taim yu gat sampela bikpela hevi.

Toktok Wantaim Pren

Tasol ating em bai isi moa long kamapim ol hevi bilong yu long wanpela wankrismas, a? Tru, i gutpela yu gat ol pren yu inap bilip long ol. Sindaun 18:24 i tok: “Sampela man i gat narakain pren na tupela i pas gut na i wanbel. Pasin bilong tupela i winim pasin namel long tupela brata.” Na ol pren inap pilim hevi bilong yu na strongim yu, tasol sampela taim ol i no inap givim gutpela tok long yu em inap helpim yu tru. Long wanem, ating save bilong ol i no winim save bilong yu yet. Yu tingim Rehoboam? Long taim bilong Baibel em i stap wanpela king. Em i no bihainim tok bilong ol man i stap longpela taim na ol i gat save, nogat, em i bihainim tok bilong ol wankrismas. Wanem samting i kamap taim em i mekim olsem? Bikpela hevi tru! Ol lain em i bosim, ol i no laik bihainim em moa na God tu i no orait moa long em.​—⁠1 King 12:​8-19.

Na nogut pren bilong yu i tokim ol narapela long ol samting yu bin kamapim long em. Dispela em narapela hevi i ken kamap taim yu tokim ol wankrismas long hevi bilong yu. Arturo, em pastaim yumi stori long em, em i tok: “Planti ol yangpela manki mi save long ol, ol i save toktok wantaim ol pren bilong ol taim ol i bel hevi. Tasol bihain, ol dispela pren i save kamapim olgeta tok long ol narapela na tok bilas long ol.” Gabriela i gat 13 krismas na wankain samting i bin painim. Em i tok: “Mi bin painimaut olsem pren bilong mi i kamapim ol tok bilong mi long narapela pren bilong em, olsem na mi no tokim em moa long ol hevi samting bilong mi. Tru, mi save toktok wantaim ol wankrismas, tasol mi no save tokim ol long ol samting mi inap kisim hevi long en sapos ol i kamapim long ol narapela.” Olsem na taim yu laik painim wanpela bilong helpim yu, i bikpela samting long painim wanpela em i “no ken autim” dispela tok long ol narapela. (Sindaun 25:⁠9) Kain man olsem, ating krismas bilong em bai winim krismas bilong yu.

Olsem na sapos i gat sampela as na yu no inap kisim sampela helpim long papamama, i no gat rong long kamapim bel hevi bilong yu long wanpela pren, tasol tingting gut pastaim na makim wanpela pren i save gut long ol samting bilong i stap bilong yumi na ol lo bilong Baibel. I mas i gat sampela long kongrigesen i kain olsem. Liliana i gat 16 krismas na em i tok: “Mi bin kamapim bel bilong mi long sampela sista Kristen na dispela i bin helpim mi. Ol i bikpela long mi, olsem na tok bilong ol i gutpela. Ol i kamap gutpela pren bilong mi.”

Olsem wanem sapos nau yu no strong moa long ol samting bilong spirit olsem bipo? Ating bel hevi bilong yu i mekim na yu no strong tumas long beten o ritim Baibel olsem bipo. Long Jems 5:​14, 15, Baibel i givim dispela gutpela tok long yumi: “Ating wanpela bilong yupela i gat sik? Orait em i mas singautim ol hetman bilong sios i kam long em. Na long nem bilong Bikpela ol i mas putim wel long bodi bilong em, na ol i mas prea long God i ken mekim em i kamap orait gen. Sapos ol i bilip long God na ol i prea, orait Bikpela bai i mekim orait dispela sikman na kirapim em gen.” Kongrigesen bilong ol Witnes Bilong Jehova long hap bilong yu i gat ol man i stap strong long ol samting bilong spirit na ol i gat save long helpim ol manmeri em ol i bel hevi o ol i sik long samting bilong spirit. No ken surik long toktok wantaim ol. Baibel i tok ol dispela man inap i stap olsem “ples hait ol manmeri i ken i go na hait long en long taim bilong bikpela win na ren.”​—⁠Aisaia 32:⁠2.

“Tokim God Long Olgeta Hevi”

Tasol nambawan gutpela helpim i kam long “God bilong mekim isi bel bilong olgeta man i gat hevi.” (2 Korin 1:⁠3) Taim yu pilim nogut na yu stap bel hevi, bihainim tok bilong Filipai 4:​6, 7: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. . . . Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” Long olgeta taim Jehova i save amamas long harim tok bilong yu. (Song 46:1; 77:⁠1) Na sampela taim beten tasol inap givim bel isi long yu.

Sapos sampela taim yu pilim nogut na yu stap bel hevi, yu no ken lusim tingting olsem planti yangpela i bin i gat hevi long dispela samting. Na planti taim ol dispela kain tingting i save pinis. Tasol taim bel bilong yu i bagarap olsem, no ken pasim maus na stap tasol. Larim narapela i save long hevi yu karim. Sindaun 12:25 i tok: “Man i save wari oltaim, em bai i bel hevi tru na tingting bilong en bai i bagarap. Tasol sapos man i mekim gutpela tok long wantok bilong en, orait wantok bai i belgut tru.” Olsem wanem bai yu kisim “gutpela tok” bilong strongim yu? Yu bai kisim taim yu toktok wantaim narapela​—⁠em wanpela i gat save long planti samting bilong i stap bilong yumi na em i gat gutpela tingting i kam long God na em inap mekim gut bel bilong yu na helpim yu.

[Futnot]

[Rait long pes 14]

“Taim mi toktok wantaim papamama, mi save kisim strong na gutpela tingting bilong stretim ol hevi”

[Piksa long pes 15]

Ol papamama i save pret long God ol inap givim gutpela tingting long yu, winim ol wankrismas bilong yu