Rot Yu Bihainim Bilong Stretim Sik
LONG buk bilong em i stori long marasin i narapela kain long marasin bilong ol dokta, Dokta Isadore Rosenfeld i tok: ‘Taim ol i givim marasin long sikman na strongim em olsem dispela bai stretim tru tru sik bilong em, planti taim sik bilong em i wok long go liklik.’
Olsem na sapos sikman i bilip strong tru olsem marasin em i kisim bai stretim sik bilong em, ating dispela marasin, maski ol i wokim long suga tasol, em bai helpim em. Dispela kain samting inap helpim man i pilim pen, i laik traut, skin i les olgeta, het i raun, tingting planti, o bel hevi. Orait dispela i kamapim long ples klia wanem samting?
Dispela i soim olsem pasin bilong bilip tru long marasin samting yumi kisim, maski em i wanem kain, dispela em i bikpela samting long daunim sik bilong yumi. Tasol ating em savepasin sapos yumi painimaut olsem marasin samting yumi kisim em i stretim as bilong sik o em i stretim tasol samting i stap ples klia. Yumi ken painimaut dispela samting long rot bilong ol eksre o ol dokta long laboritori i ken glasim blut samting bilong yumi.
Tasol i gat sampela samting moa yumi ken mekim taim yumi laik makim wanem kain marasin yumi bai kisim.
Ol Bikpela Samting Yu Ken Mekim
Taim yu no makim yet samting yu laik kisim, i gutpela sapos yu yet i wok long painim sampela save. Kamapim sampela askim. Marasin inap helpim yu olsem wanem? Wanem ol gutpela samting bilong dispela marasin na wanem ol samting nogut bilong en? Wanem pe bilong dispela marasin, na yu mas kisim dispela marasin i go inap long wanem taim? Toktok wantaim ol man i kisim pinis dispela kain marasin yu gat tingting long kisim. Askim ol, dispela i bin helpim gut ol o nogat. Tasol was gut, nogut ol i no tokaut stret na dispela i giamanim yu.
Sapos wanpela marasin samting bilong ol dokta i bin helpim planti sikman, orait maski sampela taim dispela marasin i no mekim gut wok bilong en, ating nogut yumi sakim dispela marasin na kisim narapela kain marasin samting. Samting nogut dispela pasin inap kamapim i bin kamap long wanpela nius (The New England Journal of Medicine). Nius i stori long sik kensa bilong tupela yangpela i go bikpela olsem wanem taim ol i kisim dispela narapela kain marasin na sakim marasin bilong ol dokta. Wanpela em i dai.
Ol man i gat bikpela sik ol i mas was gut. Nogut ol i larim ol dokta giaman i givim marasin nating long ol. Was gut long ol marasin ol i tok em inap stretim kain kain sik. Wanpela samting olsem em wanpela nupela vaitamin ol i tok i bin “stretim planti kain sik, olsem sotwin, skin i no gat strong, na ol bikpela sik em man inap kisim bagarap long en.” Ol i glasim dispela “vaitamin” na ol i kisim save olsem em wara i gat sol tasol long en.
Tru, sampela bilong ol dispela narapela kain marasin samting inap helpim gut skin bilong yu. Tasol yu mas kisim stretpela tingting long dispela. Em pasin bilong gutpela tingting sapos yu kisim kain kain gutpela kaikai, na gutpela slip, na eksasais liklik, na skelim gut ol marasin samting yu laik kisim.
Rot Bilong Kisim Gutpela Skin
I no gat wanpela marasin samting man i kamapim em inap pinisim olgeta kain sik na dai. Long wanem, sik na dai em samting yumi bin kisim long namba wan tumbuna bilong yumi bilong pastaim. (Jop 14:4; Song 51:5; Rom 5:12) Tru, ating planti marasin samting—maski em i wanem kain—ol inap daunim sik na skruim sampela yia moa long laip bilong yumi, tasol ol inap helpim yumi inap liklik hap taim tasol. Tasol i gat wanpela rot tru bilong pinisim sik, em planti milion manmeri ol i painim pinis.
Man bilong wokim yumi, em God Jehova, na em Nambawan Dokta Tru, em i wokim pinis rot bilong pinisim sik. Sapos yumi bilip long em na long ofa bilong Pikinini bilong em, Jisas Krais, em ofa i gat strong long tekewe sin, bai yumi inap kisim gutpela skin na laip oltaim long nupela taim i no gat sik long en! (Matyu 20:28) Baibel i tok promis, long dispela nupela taim ‘bai i no gat man i tok olsem, “Mi gat sik.” ’—Aisaia 33:24.
[Rait long pes 12]
Planti milion man ol i painim pinis dispela wanpela rot tasol bilong pinisim sik na kisim strongpela skin