Baibel i Tok Wanem?
Ol Marasin Samting Yu Laik Kisim—Em Bikpela Samting o Nogat?
OLKAIN sik na bagarap i save painim yumi ol manmeri bilong graun. Taim ol dispela samting nogut i painim ol man, planti ol i save go long dokta bilong kisim marasin samting. Jisas Krais i save olsem dispela samting inap helpim man, na em i tok: “Ol man i no gat sik ol i no save go long dokta. Nogat. Ol sikman tasol i save go long dokta.”—Luk 5:31.
Man i raitim dispela tok bilong Baibel, em Luk, em yet i wanpela dokta. (Kolosi 4:14) Aposel Pol na Luk i bin raun wantaim, na ating save bilong Luk long ol samting bilong marasin i bin helpim Pol. Tasol olsem wanem? Baibel i kamapim sampela tok bilong stiaim ol Kristen bambai ol i ken save wanem kain marasin samting ol i mas kisim? Yu ting ol marasin samting yu laik kisim, em bikpela samting?
Sampela Tok Bilong Baibel Bilong Stiaim Yumi
Baibel inap helpim ol man long kisim stretpela tingting long ol samting bilong dokta na marasin. Olsem: Lo 18:10-12 i kamapim long ples klia olsem Jehova i “no laikim tru” olkain pasin bilong glasman na posin marila samting. Ol dispela kain pasin em aposel Pol i mekim tok lukaut long en, ol i insait long ol wok bilong ol spirit nogut em God i no orait long en. (Galesia 5:19-21) Olsem na ol Kristen tru i save sakim olgeta pasin bilong glasim sik na olgeta marasin samting em ol wok bilong ol spirit nogut i insait long en.
Baibel i tokaut tu olsem Man bilong wokim yumi em i ting laip na blut em i bikpela samting tru na i holi. (Stat 9:3, 4) Ol Witnes Bilong Jehova i tingting strong long bihainim lo bilong Baibel long abrusim blut, olsem na ol i sakim olgeta marasin samting i brukim dispela lo. (Aposel 15:28, 29) Tasol i no olsem ol i sakim olgeta kain marasin samting, nogat. Ol i wok strong long painim nambawan gutpela marasin samting bilong helpim ol yet na ol pikinini bilong ol. Tasol ol i save askim ol dokta na nes long tingim bilip bilong ol taim ol i laik mekim ol samting bilong stretim sik bilong ol.
Was Gut Long Pasin Yu Mekim
King Solomon i givim tok lukaut olsem: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.” (Sindaun 14:15) Maski wanpela kain pasin bilong stretim sik i no brukim lo bilong Baibel, yumi mas ‘was gut long pasin yumi mekim.’ I no olgeta marasin samting i save helpim skin bilong man. Taim Jisas i tok ‘ol sikman tasol i save go long dokta,’ em i no laik tokaut olsem olgeta kain marasin samting long taim bilong em ol i gutpela. Em i save olsem sampela marasin samting i gutpela na sampela i no inap helpim man.a
Olsem tasol long nau, sampela kain marasin samting i no helpim man, na sampela ol i giaman marasin tasol. Sapos man i no skelim gut wanem kain marasin em bai kisim, dispela inap givim hevi long em. Na yumi mas save tu olsem sampela marasin samting inap helpim wanpela man, tasol em i no inap helpim narapela man—em inap bagarapim em. Taim man i mas skelim wanem kain marasin samting em bai kisim, man i gat gutpela tingting em bai skelim gut dispela samting na em bai no “bilipim olgeta kain tok,” maski wanpela pren i laik helpim em i tokim em long wanpela marasin samting. Em bai “tingting gut” na wok long kisim stretpela save bambai em i ken makim gut ol samting em i laik mekim.—Taitus 2:12.
Bihainim Gutpela Tingting na Tingting Stret
I stret yumi tingim skin bilong yumi. Taim yumi tingim gut skin bilong yumi, yumi kamapim long ples klia olsem yumi tingim laip bilong yumi na Man em i as bilong laip, em God. (Song 36:9) Ol Kristen i wok long painim gutpela marasin samting bilong stretim sik bilong ol, tasol ol i mas bihainim gutpela tingting long dispela samting. Olsem: Sapos man i gat gutpela skin i wok long tingting tumas long helpim skin bilong em long kamap gutpela na strongpela, dispela inap mekim na em bai lusim tingting long “skelim gut olgeta pasin na kisim ol pasin i gutpela tru.”—Filipai 1:10; 2:3, 4.
Wanpela meri i sik nogut tru long taim bilong Jisas, em i bin “lusim olgeta mani bilong en” bilong painim wanpela dokta i ken oraitim sik bilong em. Wanem samting i kamap long dispela? Ol dokta i no bin oraitim sik bilong em, nogat; sik bilong em i go nogut moa, na dispela i bin givim bikpela bel hevi long em. (Mak 5:25, 26) Em i bin mekim olgeta samting em inap long mekim bilong stretim sik bilong em, tasol ol marasin samting i no helpim em. Samting i painim em i kamapim long ples klia olsem ol marasin long taim bilong em i no inap long stretim sik bilong em. Olsem tasol long nau, maski ol dokta na ol saientis i kamapim ol nupela marasin na masin samting, planti man i no inap painim marasin bilong stretim sik bilong ol. Olsem na yumi mas kisim stretpela tingting long ol samting ol dokta i ken mekim. Long nau skin bilong yumi i no inap kamap gutpela olgeta. Ol Kristen i save olsem taim bilong God long “mekim orait ol manmeri bilong olgeta lain man” em i no kamap yet; em bai kamap bihain. (KTH 22:1, 2) Olsem na yumi mas kisim stretpela tingting long ol marasin samting bilong stretim sik bilong yumi.—Filipai 4:5.
Em nau, rot yumi bihainim bilong stretim sik em i bikpela samting. Olsem na taim yumi mas makim wanem kain marasin samting yumi laik kisim, samting yumi mekim i mas kamapim long ples klia olsem yumi laik kisim strongpela skin na yumi laik pas gut wantaim God. Taim yumi mekim olsem, yumi ken lukluk i go long truim bilong tok promis bilong Jehova olsem long nupela taim bihain bai i ‘no gat man i tok “Mi gat sik.” ’—Aisaia 33:24.
[Futnot]
a Olsem: Long buk bilong Dioskorides long taim bilong ol aposel, wanpela pasin bilong stretim sik bilong man em skin bilong em i go yelo (jaundice) em olsem: Em i mas dring wain ol i tanim wantaim pekpek bilong meme! Nau yumi save dispela kain marasin i mekim na sikman i kisim sampela sik moa, a?
[Piksa long pes 16]
“Dokta,” em Bikman Luke Fildes i wokim long yia 1891
[Kredit Lain]
Tate Gallery, London/Art Resource, NY