Yu Ting Ol Witnes Bilong Jehova i No Orait Long Kisim Vaccine?
Nogat. Ol Witnes Bilong Jehova i no tambuim ol narapela long kisim vaccine. Mipela i tingim olsem olgeta wan wan Kristen yet i mas wokim disisen bilong ol long dispela samting. Planti Witnes Bilong Jehova i mekim disisen long kisim vaccine.
Mipela i laik kisim ol gutpela marasin na mipela i tenkyu long ol dokta na saientis long wok ol i mekim bilong daunim ol bikpela sik. Mipela i tenkyu long bikpela wok ol dokta na nes i mekim, moa yet long taim bilong bikpela hevi.
Ol Witnes Bilong Jehova i wok gut wantaim ol bikman bilong helt. Olsem, kirap long taim sik COVID-19 i kirap na i kam inap nau, ol Witnes Bilong Jehova i wok yet long putim ol toksave long websait bilong mipela long planti handret tokples na kirapim lain bilong mipela long bihainim ol lo bilong kantri bilong ol long sait bilong banisim ol yet long dispela sik. Em ol lo olsem em i bikpela samting long ol i mas stap longwe long narapela narapela, na bihainim ol lo long sait bilong ol bikpela bung, man i kisim sik i mas stap longwe long ol narapela, wasim han, na werim mask na ol narapela samting moa we gavman i tok ol i man i mas mekim.—Rom 13:1, 2.
Inap planti yia, ol pablikesen bilong ol Witnes Bilong Jehova i stori long ol dispela stiatok:
Long sait helt na kisim marasin samting, em disisen bilong wan wan man yet long wokim.—Galesia 6:5.
“[Dispela nius] i no tok wanpela marasin o samting bilong stretim sik i winim narapela marasin, na no givim edvais long sait bilong helt. Dispela nius i save kamapim tasol ol tok i tru na larim man i ritim dispela nius em yet i mas skelim na wokim disisen long samting em bai mekim.”—Nius Kirap!, Februeri 8, 1987.
“Bilong skelim sapos yu na ol pikinini bilong yu bai kisim vaccine o nogat, em samting yu yet i mas wokim disisen long en.”—Nius Awake!, August 22, 1965.
Mipela i save kisim marasin samting bikos mipela i tingim laip i bikpela samting.—Aposel 17:28.
“Ol Witnes i save go lukim ol dokta bilong kisim helpim long sik bilong ol. Ol i tingim tru laip na ol i laik mekim ol samting i gutpela na i stret wantaim tok bilong Baibel na bai ol i ken stap laip longpela taim.”—Nius The Watchtower, July 1, 1975.
“Ol Witnes Bilong Jehova i redi long kisim marasin na helpim i kam long dokta. Ol i laik bai ol i gat gutpela helt na ol i ken stap longpela taim. Long taim bilong ol aposel, wanpela Kristen em Luk, em i wanpela dokta, na long nau tu sampela Witnes Bilong Jehova ol i dokta. . . . Ol Witnes Bilong Jehova i pilim tru hatwok bilong ol dokta na nes na lain bilong helpim ol sikman, em ol i givim bel tru long wok bilong ol. Na ol i tenkyu long dispela lain i save helpim gut ol long daunim sik bilong ol.”—Nius Wastaua, Februeri 1, 2011.