Redi Nau Long Taim Bilong Medikal Imejensi

Wai na yu mas redi? Medikal imejensi na sik i save painim yumi kwiktaim tru. Olsem na paslain long wanpela imejensi i kamap, mekim olgeta samting bilong redi nau na bai yu inap kisim gutpela helpim long haus sik. Taim yu mekim olsem, yu soim olsem yu tingim tru laip na lo bilong Jehova long blut.​—Ap 15:28, 29.

Yu Inap Mekim Wanem Bilong Redi?

• Beten na skelim gut paslain long yu pulimapim kat em ol i kolim durable power of attorney (DPA)a o blut kat. Pablisa i baptais pinis i ken kisim DPA kat bilong ol yet na Identity Card (ic) bilong ol liklik pikinini bilong ol long litresa sevan

• Sapos yu gat bel, askim elda long kopi bilong Infomesen Bilong Ol Bel Mama (S-401). Dispela pepa bai helpim yu long mekim gutpela disisen long taim i gat sampela hevi i kamap long yu long taim yu gat bel na long taim bilong karim pikinini

• Sapos i gat sampela samting i kamap na ol i tok long yu mas kisim blut o yu mas stap long haus sik inap sampela haptaim, kwiktaim toksave long ol elda. Na tu, toksave long dokta o nes olsem yu laik bai wanpela minista bilong ol Witnes Bilong Jehova i kam lukim yu

Hau bai ol elda i helpim yu? Ol i ken helpim yu long pulimapim DPA kat. Tasol ol elda bai i no inap mekim disisen bilong yu o kamapim tingting bilong ol long taim yu mekim disisen long wanem kain helpim yu laik kisim. (Ro 14:12; Ga 6:5) Taim yu tokim ol elda olsem yu stap long haus sik na i luk olsem bai i gat tok i kamap long sait bilong blut, ol elda bai hariap long toktok wantaim Hospital Lieson Komiti (HLC) long helpim yu.

Hau bai HLC i helpim yu? Ol brata i wok long HLC i bin kisim trening long toktok wantaim ol wokman bilong haus sik na loya long kliagut long bilip bilong yumi long sait bilong blut. Ol i ken stori wantaim ol dokta na nes long ol helpim yu inap kisim we i no nidim man long kisim blut. Sapos i gat nid, ol bai helpim yu long painim wanpela dokta husat inap rispektim bilip bilong yumi long blut.

WATSIM VIDIO ROT BILONG WOKIM OL DISISEN LONG SAIT BILONG BLUT, NA BIHAIN BEKIM DISPELA ASKIM:

• Long dispela vidio, yu kisim wanem skul long pasin bilong redi long medikal imejensi long sait bilong blut?

  Bekim Bilong Yu