Askim

◼ Yu redi sapos taim nogut i painim yu?

Long taim bilong yumi, “taim nogut i save painim yumi olgeta,” na planti taim dispela i mekim na yumi kisim bagarap long skin na ol man i laik subim yumi long kisim blut. (Sav 9:11) Bilong yumi ken redi long kain taim olsem, Jehova i bin givim planti samting long rot bilong oganaisesen bilong em bilong helpim yumi, tasol em i laik bai yumi yet i mas mekim sampela samting. Daunbilo i gat wanpela lista bilong helpim yumi long save long ol samting yumi mas mekim.

• Long olgeta taim yu mas karim nupela kat Advance Medical Directive/Release long paus o poket.

• Ol pikinini bilong yu i mas karim nupela kat Identity wantaim ol.

• Skelim gen pepa yumi kisim wantaim Wok Kingdom bilong Septemba 1992, het-tok bilong en “Lukautim Gut Ol Pikinini Bilong Yu Bambai Ol i No Ken Kisim Blut.” Mekim traim long ol tok yu bai mekim taim yu toktok wantaim ol dokta na jas long ol samting bilong stretim sik bilong pikinini bilong yu.

• Skelim gen ol dispela tok i stori long blut: Wastaua, Jun 15, 2000, p. 29-31; Oktoba 1, 1994, p. 31; Jun 1, 1990, p. 30, 31 (tok Inglis); Mas 1, 1989, p. 30, 31 (tok Inglis); Kirap! Janueri 8, 2000, p. 7-11; Disemba 8, 1994, p. 23-27 (tok Inglis); Me 8, 1994, p. 22-25; Julai 8, 1992, p. 10; na pepa yumi kisim wantaim Wok Kingdom bilong Septemba 1992 na Februeri 1996. (Tingim: Olgeta brata sista i baptais nupela ol bai kisim kopi bilong dispela tupela pepa yumi bin kisim wantaim Wok Kingdom. Putim dispela tupela pepa long wanpela fail samting bambai yu inap painim hariap.)

• Skelim gut sapos maus bilong bel bilong yu i orait long yu larim ol dokta i mekim na blut bilong yu i lusim bodi bilong yu na i go insait long wanpela masin na bihain go bek insait long bodi. O maus bilong bel i orait long yu kisim sampela marasin samting ol i wokim long ol liklik samting ol i kisim long fopela bikpela hap bilong blut?

• Sapos yu inap long mekim, paslain long yu go long haus sik, toksave long ol elda bambai ol i ken helpim yu na toksave long Hospital Lieson Komiti sapos hevi i kamap. Sapos liklik pikinini bilong yu em i sik, askim ol elda long toksave long Hospital Lieson Komiti pastaim tru long dispela samting.

Kamapim Klia Yu No Inap Kisim Blut: Mipela kisim save olsem sampela brata sista ol i no tokaut kwik long ol dokta olsem ol i no laik kisim blut. Dispela pasin i no stret long mekim long ol dokta samting, na long kain taim olsem ol inap givim blut long yu. Sapos ol dokta i save long bilip bilong yu na long wanpela pepa yu sainim pinis em i kamapim laik bilong yu long ol samting yu laik ol dokta i ken mekim na ol samting ol i no ken mekim, orait dispela bai helpim ol long mekim wok bilong ol hariap na ol inap skelim gut wanem ol marasin samting i no gat blut long en ol inap mekim wok long en bilong helpim yu.

Wanpela bikpela bagarap inap painim yu long taim yu no ting em bai kamap, olsem na yu mas stretim ol samting long nau bilong lukautim yu na ol pikinini bilong yu bambai yupela no ken kisim blut.​—⁠Snd 16:20; 22:⁠3.