Askim

Yumi ken kisim sut bilong pasim sik o narapela kain sut sapos i gat “albumin” bilong blut bilong man long en, o nogat?

Em samting bilong olgeta Kristen wan wan yet i mas tingim.

I stret ol wokboi bilong God i laik bihainim tok bilong Aposel 15:​28, 29 na klia long blut. Olsem na ol i no save kaikai mit i gat blut i stap yet long en, na ol i no save kaikai samting ol man i wokim long blut, olsem sosis i gat blut. Na ol i mas bihainim lo bilong God long blut taim ol i go long haus sik o lukim dokta. Ol Witnes Bilong Jehova i save karim liklik kat i tok ol i no ken kisim ‘blut, olsem blut tru, o sampela hap bilong blut, olsem ol retpela sel o waitpela sel o pletlet o plasma.’ Tasol olsem wanem long ol sut bilong wara bilong blut i gat liklik hap protin bilong blut (albumin) long en?

Longtaim pinis ol Witnes i save, dispela i samting olgeta wan wan Kristen yet i mas tingim; ol i bin lainim bel bilong ol long Baibel na ol i mas mekim pasin i stret wantaim tok bilong maus bilong bel bilong ol yet. “Askim” long Wastaua (tok Inglis) bilong Jun 1, 1990, i stori long sut ol i wokim long wara bilong blut, em ol dokta i save givim long ol man bilong pasim sampela kain sik. Ol dispela sut i no wara bilong blut stret; em ol liklik samting bilong wara bilong blut ol i bin kisim long man o animal i gat strong bilong sakim dispela kain sik. Bel bilong sampela Kristen i no gat tok long kisim kain sut olsem; ol i tingim olsem ol samting bilong sakim sik i stap long blut bilong meri i gat bel em i save go insait long blut bilong pikinini i stap long bel. “Askim” i stori long dispela samting, na i stori tu olsem sampela albumin long blut bilong meri i gat bel em i go insait long blut bilong pikinini long bel.

Planti ol i tingim dispela samting, long wanem, sampela sut bilong pasim sik ol i no wokim long samting bilong blut, tasol ating i gat liklik hap albumin bilong wara bilong blut long en, em ol i putim bilong mekim ol samting ol i wokim sut long en i stap strong. Long dispela taim ol i save putim liklik hap albumin long sut EPO (erythropoietin). Sampela Witnes i bin kisim sut EPO, long wanem, em inap helpim ol retpela sel bilong blut i kamap planti, na bai dokta i no ken tingting long givim blut long ol.

Ol kampani bilong wokim marasin i save wokim ol nupela marasin na senisim ol samting ol i wokim marasin long en, olsem na ating bihain bai ol i putim liklik hap albumin long sampela marasin moa. Olsem na ating ol Kristen i laik skelim olkain sut dokta i laik givim long ol, nogut i gat albumin long en. Sapos ol i no save gut, o i gat as na ol i ting sut i gat albumin long en, ol i ken askim dokta long dispela.

Olsem yumi tok pinis, planti Witnes i no gat tok long kisim sut i gat liklik hap albumin long en. Tasol sapos wanpela i laik kisim sampela save moa long dispela bambai em i ken tingim gut wanem samting em yet bai mekim, orait em i ken lukim “Askim” long Wastaua (tok Inglis) bilong Jun 1, 1990.