Olsem Wanem? Yu Man Bilong Sem?
1 Yumi no save kirap nogut taim yumi lukim wanpela liklik pikinini i hait long baksait bilong papa o mama bilong em na lukstil long yumi. Pasin bilong sem em i pasin bilong ol liklik pikinini. Na planti manmeri i bikpela pinis ol tu i gat pasin bilong sem liklik. Yu inap mekim wanem sapos pasin bilong sem i save pasim yu liklik long mekim wok autim tok?
2 Karim Hevi Bilong Pasin Bilong Sem: Em i bikpela samting long tingim na stretim tingting i stap long bel bilong yu. (1 Pi 3:4) Yu mas wok long strongim pasin bilong laikim Jehova na ol man i stap klostu long yu. Yu mas bilip tru olsem wok bilong autim tok em i wanpela gutpela rot bilong kamapim pasin bilong daunim sampela laik bilong yu yet bilong helpim ol narapela. Wok strong long mekim stadi bilong yu yet long olgeta taim na kam long olgeta miting. Beten oltaim na kolim stret ol samting yu laik bai Jehova i mas helpim yu long en. Pasin bilong bilip strong long God bai strongim bel bilong yu na bai yu ‘lusim pret na strong moa long autim tok bilong God.’—Fl 1:14.
3 Wok strong long daunim pasin bilong ting yu no inap mekim gutpela wok. I luk olsem Timoti i mas mekim olsem. Pol i strongim Timoti olsem: “Ol i lukim yu i yangpela liklik, tasol ol i no ken ting yu man nating. Nogat.” Na Pol i kirapim em long tingim “dispela Spirit God i bin givim long yumi, em i no spirit bilong mekim yumi i pret. Nogat. Em i Spirit bilong givim strong long yumi.” (1 Ti 4:12; 2 Ti 1:7) Jehova i bin mekim bikpela wok long Timoti, na em bai mekim wok long yu tu sapos yu bilip tru long God na mekim wok bilong Em.—Sng 56:11.
4 Pasin bilong tingim ol tok bilong Baibel, olsem i stap long Matyu 10:37, i bin helpim wanpela sista em man bilong em i save birua long tok i tru. Dispela sista i gat pasin bilong sem na dispela i mekim na em i save pret long man bilong em. Taim em i wok long mekim yet wok autim tok na em i no slek, wok autim tok i no hatwok olsem long bipo, na bihain man bilong em, na mama, na ol brata bilong em ol i kisim tok i tru!
5 Yu Mas Redi Gut Pastaim: Yu bai bilip strong moa long yu inap long mekim wok autim tok, taim yu redi gut long mekim dispela wok. Kisim sampela tok i no hatwok long mekim long buk Toktok Gut o long ol Wok Kingdom bilong bipo, na putim gut long tingting na mekim traim long en. No ken tingting long ol samting nogut em inap kamap, nogat; yu mas tingting long ol gutpela samting tasol. Kisim strong long rot bilong wok gut wantaim ol narapela. Tingim: Planti manmeri yu bai bungim ol long haus bilong ol, ol tu i man o meri bilong sem, wankain olsem yu. Olgeta manmeri i mas harim tok bilong Kingdom.
6 Sapos yu man bilong sem, yu no ken bel hevi. Taim yu wok long daunim dispela pasin, Jehova bai helpim yu long mekim gutpela wok long autim gutnius. Long dispela rot bai yu kisim amamas long mekim wok autim tok bilong yu.—Snd 10:22.