Ol Yangpela i Laik Save . . .

Bai Mi Mekim Wanem Bilong Toktok Wantaim Ol Narapela?

“I no pasin bilong mi long toktok tumas wantaim ol narapela. Mi gat tingting olsem nogut mi mekim sampela tok na ol narapela bai surik long mi. Mama bilong mi em i wanpela meri bilong sem na i luk olsem mi kisim dispela pasin long em.”​—⁠Artie.

YU LAIK daunim dispela pasin bilong sem na kamapim moa yet dispela pasin bilong pren na toktok wantaim ol narapela? Olsem mipela i kamapim pinis long stori “Ol Yangpela i Laik Save . . .” long Kirap! bilong Novemba 8, 1999, planti manmeri i gat hevi long pasin bilong sem tumas.a I no olsem yu gat wanpela hevi sapos em pasin bilong yu long stap isi na tingting gut long ol tok yu mekim o sapos yu no save mekim kain kain tok pilai nabaut. Tasol pasin bilong sem nogut tru i olsem wanpela hevi. Em inap mekim na bai yu gat hatwok long kisim ol pren. Na tu, bai yu no amamas o stap isi long taim bilong ol manmeri long bung samting.

Ol manmeri i bikpela pinis ol tu i gat hevi long pasin bilong sem. Barryb em wanpela elda long kongrigesen. Tasol taim em i stap namel long ol narapela em i no save toktok. Em i tokaut olsem: “Mi gat tingting olsem tok bilong mi i no gat as bilong en.” Meri bilong em Diane i gat wankain hevi. Em i mekim wanem bilong stretim dispela hevi? Em i tok: “Mi save pas wantaim ol manmeri i gat pasin bilong toktok na amamas wantaim ol narapela, long wanem, mi ken larim ol i mekim olgeta toktok.” Yu ken mekim wanem bilong kisim pasin bilong amamas na toktok wantaim ol narapela?

No Ken Daunim Yu Yet

I gutpela sapos yu skelim tingting bilong yu yet long pasin bilong yu long toktok. Olsem wanem? Yu save daunim yu yet na tok olsem ol narapela i no inap laikim yu o ol tok bilong yu i no gat as bilong en? Kain tingting olsem bai mekim na bai i hatwok moa long kisim pasin bilong amamas na toktok wantaim ol narapela. Tingim, Jisas i bin tok olsem: “Yu mas laikim tru ol wantok olsem yu laikim yu yet”​—⁠em i no tok maski long laikim yu yet! (Matyu 19:19) Olsem na i gutpela na i stret long laikim yu yet. Dispela inap givim strong long yu bilong helpim yu long toktok wantaim ol narapela.

Sapos yu no amamas long yu yet, yu ken kaunim sampela tok bilong helpim yu i stap long buk Sampela Askim Bilong Ol Yangpela​—⁠Ol Gutpela Bekim, long sapta 12, “Olsem Wanem na Mi No Amamas Long Mi Yet?”c Ol tok i stap long dispela sapta inap helpim yu long save olsem i gat as na yu ken amamas long yu yet. Tingim, yu stap olsem wanpela Kristen, na dispela i makim olsem God i amamas long yu! Olsem Jisas i bin tok: ‘No gat wanpela man inap i kam long mi long laik bilong em yet. Nogat. Papa i mas bringim em i kam long mi.’​—⁠Jon 6:⁠44.

Tingim Ol Narapela

Sindaun 18:1 i toksave olsem: “Man i save stap wanpis, em i save tingting long em yet tasol.” Tru, sapos olgeta taim yu save stap yu yet, yu bai kisim pasin bilong tingim ol samting bilong yu tasol. Filipai 2:4 i kirapim yumi long “lukautim ol samting bilong ol arapela manmeri bilong [yumi] na helpim ol long i stap gut.” Taim yu tingting long ol samting bilong ol narapela na tingting long helpim ol, bai yu no tingting tumas long yu yet tasol. Na tu, taim yu kisim pasin bilong tingim ol narapela, dispela bai kirapim yu long go klostu long ol manmeri bilong kisim save long ol.

Lidia em wanpela meri i gat nem olsem meri bilong prenim ol narapela na helpim ol. Baibel i tok olsem, taim Lidia i harim tok bilong Pol na bihain em i kisim baptais, em i bin tokim Pol na ol lain i raun wantaim em olsem: “Sapos yupela i ting mi bilip tru long Bikpela, orait yupela i ken i kam i stap long haus bilong mi.” (Aposel 16:​11-15) Maski em i nupela long bilip, Lidia i go pas bilong kisim save long ol dispela brata, na em i bin kisim planti blesing long dispela. Taim Pol na Sailas i lusim kalabus, ol i go we? Ol i go long haus bilong Lidia!​—⁠Aposel 16:​35-40.

Planti manmeri bai amamas sapos ol i pilim olsem yu tingim ol. Olsem wanem yu inap long kisim pasin bilong tingim ol narapela? Sampela tok bilong helpim yu i olsem:

● Traim pastaim. Bilong amamas long toktok wantaim ol narapela, i no olsem yu mas kamap wanpela man o meri bilong toktok na olgeta taim kisim pasin bilong bung wantaim ol narapela. Wok long toktok wantaim ol narapela narapela. Putim mak long kirapim toktok wantaim wanpela man o meri long olgeta taim yu go long miting. Pes i mas lait, na tu, taim yu toktok wantaim narapela, wok long lukluk long ai bilong em.

● Kirap na toktok. Olsem wanem yu inap kirapim toktok? Sapos yu tingim ol narapela, i no hatwok long save long sampela tok yu ken toktok long en. Jorge, em wanpela yangpela long Spen, em i tok: “Sapos yu no save bai yu tok wanem, givim sampela askim long ol.” Tru, yu no laik bai ol i pilim olsem yu skelim ol long kot samting. Sapos ol i no amamas long bekim ol askim, kamapim sampela stori bilong yu yet.

Mary, em mama bilong wanpela yangpela, em i tok: “Pasin bilong kirapim narapela long toktok long ol samting bilong em yet i nambawan rot bilong helpim em long stap bel isi.” Yangpela meri nem bilong em Kate em i tok: “Yu ken tokim narapela olsem klos bilong em i naispela o kain samting olsem, na em bai pilim olsem yu laikim em.” I no olsem bai yu kolim nating sampela tok bilong grisim ol, nogat, i olsem yu bai mekim tok tru tasol long ol. (1 Tesalonaika 2:⁠5) Planti manmeri bai amamas long bekim tok taim yumi toktok wantaim ol long gutpela pasin.​—⁠Sindaun 16:⁠24.

● Putim gut yau long tok bilong narapela. Baibel i tok olsem: ‘Putim yau kwik long harim tok, tasol no ken hariap long mekim toktok.’ Pasin bilong toktok i olsem tupela man i toktok i go i kam, na i no wok bilong wanpela tasol long toktok. Olsem na sapos yu save sem long toktok, pasin bilong putim gut yau i no givim hevi long yu! Ol manmeri i save amamas taim ol narapela i putim gut yau long tok bilong ol.

● Kirap na insait long ol toktok taim yu stap namel long sampela lain. Taim wok bilong yu long toktok wantaim ol narapela wan wan i kamap gutpela, orait nau yu ken kisim pasin bilong toktok taim i gat planti lain liklik i bung. Gutpela hap bilong kisim dispela pasin em long ol miting Kristen. Taim yu lukim sampela i bung na toktok, dispela i gutpela taim long bung wantaim ol na kirap toktok. Tasol bihainim gutpela pasin taim yu mekim olsem. Yu no ken hariap na bung wantaim ol​—⁠nogut ol i toktok long ol samting i no bilong ol narapela long save long en. Tasol taim yu luksave olsem ol i toktok long ol kain kain samting nabaut, yu ken bung wantaim ol na insait long sampela toktok. Tasol tingim olsem yu laik bihainim gutpela pasin na yu no laik katim tok o bosim olgeta tok. Putim gut yau pastaim. Na bihain, taim bel bilong yu i stap isi, yu ken mekim sampela toktok.

● No ken ting tok bilong yu i no ken popaia liklik. Sampela taim ol yangpela i tingting planti tumas long ol bai mekim sampela tok i no stret. Wanpela yangpela meri long Itali nem bilong em Elisa, em i tok: “Bipo mi save tingting planti, nogut mi bai mekim sampela tok i kranki.” Tasol tok bilong Baibel i kirapim yumi long tingim olsem yumi olgeta i save popaia, olsem na toktok bilong yumi tu, bai i no gutpela olgeta. (Rom 3:23; skelim wantaim Jems 3:⁠2.) Elisa i tok: “Em ol pren bilong mi, olsem na ol bai i no tingting planti sapos mi popaia long sampela toktok.”

● Lap long sampela popaia bilong yu. Tru sampela taim yumi mekim sampela tok na bihain yumi pilim sem long en. Tasol olsem Fred i tok, “sapos yu stap isi na lap taim yu popaia, bai yu no tingim moa popaia bilong yu. Tasol taim yu toktok o tingting planti long popaia bilong yu, i olsem yu mekim dispela liklik samting i kamap wanpela bikpela samting.”

● Stap isi. Sampela bai ol i no bekim tok bilong yu hariap. Tasol dispela i no makim olsem ol i no laikim yu o yu no ken toktok wantaim ol. Nogut ol i tingting long narapela samting o ol tu i save sem long toktok. Bihain, taim em i save gut long yu em bai pilim olsem i no hatwok long toktok wantaim yu.

● Traim toktok wantaim ol manmeri i bikpela pinis. Sampela taim ol manmeri i bikpela pinis, na moa yet ol strongpela Kristen, ol i save pilim tru hevi bilong ol yangpela em ol i save sem long toktok. Olsem na yu no ken pret long kirapim tok wantaim wanpela man o meri i bikpela pinis. Kate i tok: “Taim mi stap wantaim ol manmeri i bikpela pinis, bel bilong mi i save stap isi, long wanem, ol i no ken skelim ol tok bilong mi, o tok bilas long mi, o semim mi, olsem ol yangpela wankrismas bilong mi i save mekim.”

Pasin Sori i Ken Helpim Yumi

Ol dispela tok i ken helpim yu, tasol em i no makim olsem i nogat hatwok long pinisim dispela pasin bilong sem. Taim yu traim ol dispela samting, yu ken save olsem nambawan bikpela samting bilong helpim yu em tok i stap long Baibel olsem “yu mas laikim tru ol arapela man olsem yu laikim yu yet.” (Jems 2:⁠8) Kisim pasin bilong tingim ol manmeri na mekim moa yet long ol brata na sista Kristen. (Galesia 6:10) Sapos pasin sori i stap long bel bilong yu, yu bai winim dispela pasin bilong sem tumas na yu bai kisim pasin bilong amamas na toktok wantaim ol narapela. Olsem Jisas i bin tok, “man i save autim kain tingting i pulap long bel bilong em.”​—⁠Matyu 12:⁠34.

Barry, em pastaim yumi stori long em, i tok: “Taim mi wok long save long ol narapela manmeri, pasin bilong mi long toktok wantaim ol i wok long kamap gutpela moa.” Em olsem, taim yu wok long toktok na prenim ol narapela, isi isi bai yu pilim olsem i no hatwok moa. Bihain, taim yu gat ol nupela pren na yu save ol narapela i laikim yu, yu bai amamas long wok yu bin mekim bilong daunim pasin bilong sem!

[Ol Futnot]

[Piksa long pes 15]

Kirap na insait long ol toktok!