Pasin Bilong Toktok Gut
OLGETA man i laik kaikai na slip na wok. Tasol ol i laik mekim narapela samting tu. Em wanem samting?
Tingim tok bilong wanpela man i bin stap wanpis inap 5-pela yia long wanpela kalabus na em i no inap kisim dispela gutpela samting ol man i mas kisim. Em i tok: ‘Mi laik tru long bung wantaim narapela man na mipela toktok wantaim. Mi save mi mas mekim wanpela samting, nogut mi go longlong, long wanem, mi stap wanpis, no gat liklik pairap.’
Tru tumas, yumi olgeta i laik toktok wantaim wanpela man. Tupela saveman (Dennis R. Smith na L. Keith Williamson) i tok: ‘I mas i gat sampela man yumi inap toktok gut wantaim ol, na kamapim ol samting i givim amamas long yumi o i save pretim yumi.’
Yumi Mas Toktok!
God i givim yumi wanpela gutpela presen—pasin bilong toktok. Wanpela man i tok: ‘God i wokim yumi bilong bung wantaim ol narapela man. Sapos yumi no gat rot bilong toktok, o wanpela man i pasim yumi long toktok, dispela i olsem wanpela strafe yumi kisim. Tasol taim yumi toktok wantaim narapela, gutpela samting i kamap. Yumi amamas long yumi yet, na yumi inap save long tingting na bel bilong narapela.’
Elaine, em meri bilong wanpela wasman bilong raun, em i tok: ‘Toktok i save kamapim ol samting i stap long bel. Yumi no ken ting tasol olsem man o meri bilong yumi i save yumi laikim em tru, yumi mas tokim em. Yau i mas harim dispela tok. Yumi mas toktok wantaim.’
David, em pikinini man bilong wanpela elda Kristen, em i tok: ‘Sampela taim mi bel hevi na mi no save long tingting tru bilong mi, olsem na mi no toktok. Mi mekim olsem na nau bel bilong mi i bagarap. Tasol taim mi toktok wantaim narapela, dispela i save mekim gut bel na tingting bilong mi. Taim mi toktok mi inap save long tingting tru bilong mi na painim rot bilong winim hevi bilong mi.’
Sampela Samting i Save Pasim Toktok
Tru tumas, pasin bilong toktok wantaim man i save mekim gut bel bilong yumi. Sampela man i hatwok long toktok, olsem na ol i save abrusim dispela samting.
Gary i tok: ‘Taim mi yangpela i kam inap nau mi pret long toktok wantaim ol man. Na mi pret yet, nogut ol man i ting tok bilong mi i olsem tok nating, o taim mi toktok ol bai daunim mi.’
Elaine i tok, em i save sem, olsem na em i hatwok long toktok wantaim narapela. Em i tok: ‘Mi go bikpela insait long wanpela famili, em mipela olgeta i no save toktok wantaim. Mi pret nogut tru long papa bilong mi. Olsem na taim mi go bikpela, mi ting mi no inap toktok long wanpela gutpela samting.’ Yes, pasin bilong sem i pasim sampela na ol i no ken amamas long toktok. Tru tumas, sem i mekim na sampela i pasim maus tasol!
John em wanpela elda Kristen na em i no save amamas long em yet. Em i tok: ‘Pasin bilong sem em wanpela bikpela hevi. Sapos yu larim dispela hevi i winim yu, bai yu stap wanpis. Maski yu stap long wanpela rum wantaim 100 man, yu no toktok. Sori tru, yu bagarapim yu yet!’
Tasol wanpela elda, em Daniel, em i tok: ‘Mi man bilong toktok. Tasol sampela taim mi no tingting gut—mi save katim tok bilong narapela na nau mi kirap na bosim toktok. Mi save long popaia bilong mi taim mi lukim pes bilong meri bilong mi. Nau mi ting: “Man! Mi popaia gen!” Na mi save meri bilong mi i no ken amamas long ol tok mi mekim.’
Olsem wanem yumi ken winim dispela ol hevi na ol narapela samting i save pasim yumi long toktok? Wanem ol pasin na rot i gutpela bilong helpim man long toktok?
‘Mi Ken Tok Wanem?’
‘Mi ken toktok long wanem samting?’ ‘Mi no save long wanpela samting.’ ‘I no gat wanpela man i laik harim tok bilong mi.’ Sapos yu save ting olsem, ating tingting bilong yu i no stret. Maski yu ting yu no gat save, yu gat save long sampela samting na ating ol narapela i laik save long en. Olsem: Sapos nau tasol yu raun na lukim wanpela hap, ating sampela man i laik kisim save long dispela hap na skelim wantaim hap ol yet i sindaun long en.
Na gutpela yu kaunim ol buk na nau save bilong yu long planti samting bai go bikpela moa. I gutpela sapos yu kaunim buk long olgeta de. Ol buk bilong ol Witnes Bilong Jehova i save stori long Baibel na ol narapela samting ol man i laik save long en. Sapos yu kisim save long planti samting, orait yu inap toktok long planti samting. Wanpela gutpela samting em teks bilong de i save kamap long liklik buk Skelim Sampela Tok Bilong Baibel Long Olgeta De, em ol Witnes Bilong Jehova i save mekim wok long en. Long olgeta de, teks i helpim yu long tingim kain kain samting na mekim wok long en taim yu toktok wantaim wanpela man.
Taim yu toktok wantaim narapela, i no olsem yu wanpela tasol i mas toktok o em tasol i mas toktok, nogat. I gutpela yutupela wantaim i toktok. Na nogut yu bosim toktok—larim em i mekim sampela tok. Sapos em i man bilong sem, givim ol gutpela askim long em bilong kirapim em long toktok. Sapos yu toktok wantaim wanpela lapun, askim em long ol samting i bin kamap bipo, o olsem wanem pasin bilong ol man na famili long nau i narapela kain long pasin i bin i stap taim em i yangpela. Yu bai amamas long harim tok bilong em na bai yu kisim save.
Harim Gut Tok Bilong Man
Pasin bilong harim gut tok bilong man i no liklik samting. Sapos yumi putim gut yau, dispela bai strongim bel bilong man i kamapim hevi bilong em long yumi. Wanpela man i ting em i wanpela ‘hap pipia nating’ tasol; em i bel hevi stret, olsem na em i telefon na askim wanpela pren long helpim em. Maski pren bilong em i gat planti wok, inap tupela aua em i harim hevi bilong dispela man! Na man ya i tok, dispela tok tupela i bin mekim i strongim bel bilong em. Bilong wanem dispela toktok i helpim em gut olsem? Pren bilong em i tok: ‘Mi harim gut tok bilong em. Mi no kamapim ol savetok. Na mi mekim ol askim i stret long hevi bilong em. Olsem: “Wanem samting i mekim na yu bel hevi?” “Wanem samting i mekim na yu tingting planti?” “Wanem samting inap helpim yu?” Taim em i bekim ol askim bilong mi, em i bekim ol askim bilong em yet!’
Sapos papamama i toktok gut wantaim pikinini bilong ol, pikinini i amamas tru long papamama. Yangpela Scott i tok: ‘Mi amamas taim papamama i askim mi wanem samting i mekim na mi tingting planti. Papa i save mekim olsem long mi na i gutpela, long wanem, i gat sampela hevi mi yet mi no inap winim.’
Wanpela man i tok: ‘Bilong pikinini i ken toktok gut wantaim yu, yu yet i mas opim rot.’ Em i gat 4-pela pikinini na olgeta taim em i save lusim hap taim long harim tingting bilong olgeta wan wan pikinini, na olgeta papamama mas mekim olsem sapos ol i laik bai tingting na pasin bilong pikinini i kamap gutpela. Taim rot i op na pikinini i laik toktok, ol i no ken larim wanpela samting i pasim ol—ol i mas harim pikinini. Na dispela papa i tok, ‘Maski skin bilong papamama i les o ol i gat planti wok, ol i no ken pasim pikinini long toktok! Putim yau long tok bilong em.’
Harim Gut Tok i Kamapim Gutpela Samting
Planti man i mas i gat narapela i helpim ol long toktok. Wanpela yangpela man i tok: ‘Mi laik toktok wantaim narapela, tasol mi inap go long husat? Mi hatwok long toktok. I gutpela sapos wanpela i tingim mi!’ Sapos wanpela man i amamas long harim gut tok bilong wanpela pren, orait, i no hatwok long pren i bilip long em na kamapim bel long em.
Wanpela man i tok: ‘Sampela yia i go pinis mi bin hatwok long stretim sampela hevi insait long famili na mi bin mekim traim long toktok wantaim wanpela pren. Tasol pren i gat wanpela tok tasol: “Kamapim strong bilong yu olsem yu bos, na olgeta samting bai kamap gutpela!” Mipela i no toktok gut wantaim, na tok bilong em i no helpim mi. Dispela i mekim na mi no laik toktok moa. Tasol bihain mi toktok wantaim wanpela wasman bilong ol Witnes Bilong Jehova. Ai na pes na pasin bilong em i mekim na mi save em i wanpela man bilong sori. Em i laik harim tok bilong mi, olsem na i no hatwok long kamapim bel bilong mi long em. Na em i bin tokim mi: “Mipela bai strong long helpim yu long winim hevi bilong yu.” Mi save amamas long kain man olsem!’
Olsem wanem long yumi? Yumi inap mekim sampela samting bilong helpim ol narapela long toktok? Sapos yumi lukim wanpela man i sanap longwe liklik long yumi long wanem em i sem long toktok, yumi save toktok long em bilong helpim em long toktok? John, em pastaim yumi stori long em, em i tok: ‘Mi inap pilim hevi bilong kain man olsem, na mi sori long em, long wanem, bipo mi tu i bin stap olsem. Yumi mas go long kain man olsem na toktok wantaim em bilong kirapim em long toktok—em bikpela samting. Na ating i gutpela sapos long tingting bilong yumi, yumi beten long dispela samting.’
Dan i stori long wanpela pren olsem: ‘Taim sampela i bung na toktok wantaim, Roy i save sem na sanap longwe liklik. Mi lukim na mi askim Roy: “Eh, Roy, bipo yu bin tok wanem long dispela samting?” Em nau, Roy i kirap na toktok. Nau ol narapela i luksave long sampela pasin bilong Roy em bipo ol i no save long en.’ Dan i tok: ‘Maski i hatwok long toktok wantaim wanpela man na kirapim em long toktok, no ken les. Tokim skin bilong yu olsem, dispela man i gat gutpela bel na em i laik toktok. No ken les—wok strong long kirapim em long toktok.’
Na maski yu wanpela man bilong sem, wok long tingim narapela man na dispela bai helpim yu. Dispela i bin helpim John long winim pasin bilong stap longwe liklik long ol man. Baibel i tok: Man i save givim bel bilong em long ol narapela, “em i no save tingting tumas long em yet.” (1 Korin 13:5) John i tok: ‘Sapos yu givim bel long narapela, bai yu toktok wantaim em na save em i stap olsem wanem. I no stret sapos pasin bilong sem i pasim yu long mekim olsem. Beten inap strongim yu. Sapos yu mekim olsem bai yu kisim gutpela pe. Taim yu lukim olsem tok bilong yu i bin strongim bel bilong ol narapela, dispela bai strongim yu tu. Olsem na dispela bai kirapim yu long mekim moa yet dispela kain pasin na yu no ken pret.’
Pasin Sori—As Bilong Toktok
Wanpela pasin i save winim planti pasin bilong yumi man, em pasin bilong sori na pilim hevi bilong narapela. Wanpela saveman bilong Pensilvenia Stet Yunivesiti, em Bernard Guerney, i stori long dispela pasin olsem: ‘Man i mas pilim bel na tingting bilong narapela, maski em i wanbel long en o nogat.’ Olsem wanem dispela i bikpela samting taim yumi toktok wantaim man? ‘Em i as bilong gutpela pasin bilong toktok wantaim narapela!’
Saveman Guerney i tok, pasin bilong toktok i as bilong pas gut wantaim man. Tru, yumi no wanbel long olgeta samting, na sapos yumi no laik bai pasin pren namel long yumi na narapela i bagarap, yumi mas toktok wantaim long dispela hevi. Planti man i no save mekim olsem, long wanem, ol i no save olsem wanem ol i ken toktok na pren bilong ol i no ken tok pait na kros wantaim ol. Saveman Guerney i tok: ‘Sampela man i no save, pasin bilong pilim gut tingting bilong narapela na pasin bilong wanbel long tingting, i narapela narapela kain. Olsem na taim tupela i no wanbel long wanpela samting, ol i no pilim toktok bilong narapela. Man i gat pasin sori em i save pilim gut tingting bilong narapela, maski em i no wanbel long dispela.’
Sapos yu kisim tingting bilong narapela long hevi bilong em, yu inap pilim olsem em i hevi bilong yu yet. Dispela bai helpim yu long save, maski yupela i no gat wankain tingting long dispela samting, yu inap pilim, na tingim gut, na amamas long tingting bilong narapela.
Tingim wanpela mama i gat 4-pela pikinini, nem bilong em Janet. Wanpela taim em i bel hevi stret na em i ting em i no inap mekim wanpela gutpela samting. Nau em i save, bilong helpim narapela yu mas pilim hevi bilong em. Em i tok: ‘Mi inap tingim taim man bilong mi i toktok wantaim mi na tokim mi long planti samting mi save mekim bilong helpim famili. Tasol mi bin ting wok bilong mi i lus nating. Em i amamas long harim olgeta tok bilong mi, maski bel bilong mi i bagarap na mi krai. Na bihain em i strongim bel bilong mi. Tasol sapos em i bin mekim ol tok bilong daunim tingting bilong mi o em i tok, “Man! Tingting bilong yu i kranki!,” mi bai pasim maus na go long wanpela hap bilong i stap wanpis. Tasol em i no tok olsem. Long apinun mitupela i toktok gut wantaim inap longpela taim liklik.’
Saveman Guerney i tok: ‘Sapos yu sori na pilim hevi bilong narapela dispela i makim olsem yu tingim tru em. Dispela i mekim na nau yupela i toktok gut wantaim. Em wanpela samting ol man i laikim na ol i mas mekim.’
Yu Inap Mekim!
Yu inap toktok gut wantaim narapela. Yumi stori pinis long sampela samting bilong helpim yu long mekim olsem, tasol i gat planti samting moa. Sampela i olsem: Mekim pasin pren long man; taim man i lap, lap wantaim em; no ken mekim sampela tok bilong skrapim bel bilong em. Tasol olsem wanpela man bilong wokim piksa i mas lain gut long wok bilong em na bihain em inap wokim wanpela gutpela piksa, yu mas wok strong bilong kamapim ol dispela gutpela pasin na bai yu inap toktok gut wantaim ol man.
Olsem Daniel. Nau em i gat gutpela pasin bilong toktok wantaim narapela man. Em i mekim olsem wanem? Em i lain long bosim pasin bilong em bilong bipo, em pasin bilong katim tok bilong man. Em i tok: ‘Mi hatwok yet long pasim maus na larim narapela i toktok. Mi mas bosim gut maus bilong mi. Taim mi laik skruim sampela tok long tok bilong narapela, mi save bosim tingting bilong mi. Mi ting sapos wanpela tok bilong mi bai senisim toktok bilong narapela o pasim em long toktok, mi no ken toktok!’
Wanem samting i bin helpim Elaine? Em i kisim stretpela save long Baibel na bihain em i save em i gat sampela gutpela samting em inap toktok long en. Em i tok: ‘Sapos mi no tingting planti long mi yet na mi stori wantaim ol narapela long ol samting bilong spirit, mi no hatwok tumas long toktok wantaim ol narapela. Na narapela samting i save helpim mi, em pasin bilong kaunim ol nius na buk em Baibel i as bilong en na yumi save kisim oltaim. Taim mi mekim olsem mi save kisim ol nupela save na mi no hatwok long toktok long en wantaim ol narapela.’
Mekim traim long kamapim ol dispela gutpela pasin taim yu toktok wantaim ol narapela. Sapos yu mekim olsem, yu tu inap amamasim na strongim narapela, na yu yet bai amamas, long wanem, yu lain pinis long wanpela pasin i save helpim ol man.