Kamap Gutpela Moa Long Pasin Bilong Toktok Wantaim Narapela

YU PILIM olsem i no hatwok long toktok wantaim ol narapela? Planti man i save pret taim ol i ting ol i mas toktok wantaim narapela man, na ol i pret moa yet sapos ol i no save long dispela man. Ating ol i man bilong sem. Ol i tingting olsem: ‘Bai mi toktok long wanem samting? Olsem wanem bai mi kirapim tok? Olsem wanem mi inap toktok i go moa?’ Sampela man bilong toktok ol i save katim tok bilong ol narapela na mekim toktok. Ol i mas wok strong long kirapim ol narapela long toktok na ol yet mas lain long putim yau long tok bilong narapela. Olsem na maski yumi man bilong sem o man bilong toktok, yumi mas wok yet long kisim pasin bilong toktok wantaim narapela.

Kirap Mekim Long Haus Yet

Bilong mekim pasin bilong yu long toktok wantaim narapela i kamap gutpela moa, yu ken kirap mekim long haus bilong yu. Ol gutpela tok bilong strongim narapela i ken helpim famili long i stap amamas.

Namba wan samting bilong mekim kain tok olsem, em yu mas tingim tru ol narapela. (Lo 6:​6, 7; Snd. 4:​1-4) Taim yumi tingim narapela, yumi save toktok wantaim ol, na yumi save putim yau taim ol i laik toktok. Narapela bikpela samting em olsem, yu mas i gat sampela gutpela samting bilong toktok long en. Sapos yumi save ritim na stadi long Baibel long olgeta taim bai yumi gat planti samting bilong toktok long en. Taim yu mekim gutpela wok long buklet Skelim Sampela Tok Bilong Baibel Long Olgeta De dispela inap kirapim toktok i go i kam. O long san, ating yumi kisim wanpela gutpela ekspiriens taim yumi autim tok. O yumi ritim wanpela buk samting i givim save long yumi o mekim yumi lap. Yumi mas kisim pasin bilong stori long ol dispela kain samting wantaim famili. Na tu, dispela bai helpim yumi long toktok wantaim ol narapela man tu.

Toktok Wantaim Man Yumi No Save Long Em

Planti manmeri i surik long kirap toktok wantaim narapela ol i no save long en. Tasol ol Witnes Bilong Jehova ol i laikim tru God na ol man, olsem na ol i wok strong long lain long pasin bilong toktok wantaim ol narapela bambai ol i ken tokim ol long tok i tru bilong Baibel. Wanem samting inap helpim yu long mekim moa yet dispela pasin?

Wanpela stiatok i stap long Filipai 2:4 inap helpim yumi. Em i tok: “Yupela i no ken lukautim ol samting bilong yupela tasol. Nogat. Yupela wan wan i mas lukautim ol samting bilong ol arapela.” Tingim: Sapos yu no bin bungim dispela man bipo, orait em i no save long yu. Olsem wanem yu ken mekim bel bilong em i stap isi? Yu ken smail na tok gude long em. Tasol i gat sampela samting moa yu mas tingim.

Ating yu bin katim tingting bilong em. Yu ting em bai amamas sapos yu laik toktok long ol samting i stap long tingting bilong yu yet, na yu no tingim tingting bilong em? Jisas i bin mekim wanem taim em i bungim wanpela meri long wanpela hulwara long Samaria? Meri i tingting long kisim wara. Jisas i kirap na toktok wantaim dispela meri long wara, na bihain liklik em i toktok wantaim em long ol samting bilong spirit.​—Jo. 4:​7-26.

Sapos yu save skelim kwik ol samting, yu inap pilim ol samting ol man i tingting long en. Pes i makim olsem em i amamas o bel hevi? Em i lapun, na i no strong tumas? Yu lukim ol samting i makim olsem em i gat ol pikinini? I luk olsem man i gat planti mani o em i hatwok long kisim ol samting bilong skin em i mas kisim? Ol bilas bilong haus o skin i soim olsem em i tingim lotu? Sapos yu tingim ol dispela samting taim yu kirap tok gude, ating em inap kisim tingting olsem yu gat wankain tingting o laik olsem em yet.

Bai yu kisim wanem tingting long man sapos yu no inap lukim pes bilong em taim yu toktok wantaim em, long wanem, em i lokim dua i stap na i no laik opim? Ating man i pret. Yu ting yu inap kirapim toktok wantaim em long dispela samting?

Long sampela hap yu inap kirapim man long toktok wantaim yu taim yu stori liklik long yu yet​—yu kamap bikpela we, wanem as na yu kam long haus bilong em, wanem as na yu bilip long God, wanem as na yu kirap stadi long Baibel, na olsem wanem Baibel i bin helpim yu. (Ap. 26:​4-23) Taim yu stori olsem, i mas i gat as na yu mekim, na yu no ken stori tumas. Em nau, ating dispela bai kirapim man long stori long sampela samting bilong em yet na em i gat wanem tingting long ol samting.

Long sampela ples em pasin bilong ol man long mekim gut long ol man ol i no save long en. Ol bai singautim yu i kam insait na sindaun. Taim yu sindaun pinis, sapos long gutpela pasin yu askim ol olsem famili bilong ol i stap orait, na yu putim gut yau taim ol i bekim dispela askim, ating man bilong haus bai amamas long putim gut yau long tok yu laik mekim. Long sampela hap, taim man i kam lukim ol, ol i laik save long planti samting bilong em, olsem na ol toktok yu mekim pastaim bai pulim sampela taim moa. Taim yu mekim olsem, ating bai ol i kisim save olsem yupela i gat wankain laik o tingting long sampela samting. Long dispela rot yu inap kamapim sampela gutpela tok bilong spirit em inap helpim dispela man.

Olsem wanem sapos i gat planti manmeri long hap bilong yu ol i save mekim ol tok ples yu no save long en? Bai yu stori wantaim ol olsem wanem? Sapos yu lain long tok gude samting long tok ples bilong ol, dispela bai soim olsem yu save tingim ol. Dispela inap opim rot bilong toktok moa wantaim ol.

Rot Bilong Toktok i Go Yet

Bilong toktok i go yet, yu mas i gat laik long save long tingting bilong man yu toktok wantaim em. Kirapim em long kamapim tingting bilong em sapos em i gat laik long mekim. Ol gutpela askim inap helpim yu long kirapim em long mekim olsem. Em i gutpela long givim ol askim i save kirapim man long kamapim tingting bilong em yet, long wanem, bilong bekim kain askim olsem, man i no ken tok yes o nogat tasol. Olsem: Taim yu kolim pinis wanpela hevi i kamap long dispela hap yu stap long en, yu ken askim olsem: “Yu ting wanem as na dispela hevi i kamap?” o “Yu ting wanem samting bai stretim dispela hevi?”

Taim yu givim wanpela askim long man, putim gut yau long bekim bilong em. Bilong soim olsem yu laik tru long save long tingting bilong em, yu ken mekim liklik tok tasol, o mekim nais long het. Tasol yu no ken katim tok bilong em. Tingting gut long tok man i mekim. “Putim yau kwik long harim tok, tasol . . . no ken hariap long mekim toktok.” (Jems 1:19) Orait, taim yu bekim tok long man, soim olsem yu bin putim yau long tok em i bin mekim.

Tasol yu mas save olsem, sampela man bai i no bekim ol askim bilong yu. Bilong bekim askim sampela bai apim gras antap long ai o smail. Sampela bai tok yes o nogat tasol. No ken bel hevi. Stap isi, no ken les kwik. No ken subim man long toktok. Sapos man i orait long harim tok, orait kamapim ol tok bilong Baibel em inap strongim em. Ating bihain em bai pilim olsem yu pren bilong em na em bai i gat laik long kamapim tingting bilong em long yu.

Taim yu toktok wantaim ol man, tingting long samting yu laik mekim long bihain. Sapos wanpela man i kamapim sampela askim, orait bekim sampela askim tasol na larim sampela bilong bekim taim yu go lukim em gen. Tokim em olsem yu bai painim sampela save moa, na bihain kam bek na stori wantaim em. Sapos em i no kamapim sampela askim, ating yu ken kamapim wanpela askim yu ting em bai i gat laik long save long bekim bilong en. Toksave olsem yu laik stori long dispela samting taim yu kam bek lukim em. I gat planti gutpela tok i stap long buk Toktok Gut Wantaim Ol Man Long Baibel, na buklet God i Laik Yumi Mas Mekim Wanem?, na ol Wastaua na Kirap! bilong nau.

Taim Yumi Stap Wantaim Ol Wanbilip

Taim yu bungim narapela Witnes Bilong Jehova long namba wan taim, yu save go pas long kirapim toktok wantaim em? O yu save sanap pasim maus i stap? Pasin bilong laikim tru brata bilong yumi i mas kirapim yumi long kisim save long ol. (Jo. 13:35) Bai yu kirap mekim olsem wanem? Tokim em long nem bilong yu na askim em long nem bilong em. Sapos yu askim em long olsem wanem em i bin kisim save long tok i tru, dispela bai kirapim em long toktok wantaim yu na long dispela rot narapela i ken save long narapela. Maski yu no kolim gut ol tok yu mekim, taim yu traim toktok wantaim narapela, dispela i makim olsem yu tingim em, na dispela em i bikpela samting.

Wanem samting inap helpim yu long toktok gut wantaim narapela insait long kongrigesen? Kamapim olsem yu tingim dispela man na famili bilong em. Olsem wanem? Miting i pinis nau tasol? Orait, toktok long sampela tok i helpim yu. Dispela inap helpim yutupela wantaim. O ating yu ken kamapim sampela gutpela tok i stap long wanpela nupela Wastaua o Kirap! No ken mekim dispela bilong hambak o traim save bilong narapela. Nogat. Mekim bilong kamapim sampela tok long samting yu bin amamas long ritim. Ating yu ken toktok long asainmen yu kisim long Skul Tiokratik na stori long olsem wanem yu ken mekim gut dispela tok. O yu ken stori long ol gutpela samting i bin painim yu taim yu mekim wok autim tok.

Yumi save laikim ol man, olsem na planti taim yumi save stori long ol tok na pasin bilong ol. Na tu yumi ken toktok long sampela samting i save mekim yumi lap. Olsem wanem? Ol tok yumi mekim i save strongim narapela? Sapos yumi putim tok kaunsel bilong Baibel long bel bilong yumi na larim pasin bilong laikim God i kirapim yumi, orait toktok yumi mekim bai strongim ol narapela.​—Snd. 16:​27, 28; Ef. 4:​25, 29; 5:​3, 4; Jems 1:26.

Taim yumi laik mekim wok autim tok, yumi save redi gut pastaim. Olsem na em i gutpela long redim sampela gutpela tok bilong stori wantaim ol pren long en. Taim yu ritim o harim ol samting yu ting ol man i gat laik long harim, putim dispela tok long tingting bambai yu ken stori wantaim ol narapela long en. Isi isi bai yu save long planti samting yu inap stori wantaim ol narapela long en. Taim yu mekim olsem bai yu no stori tasol long ol samting yu mekim long olgeta de. Namba wan samting i olsem: Toktok bilong yu i mas kamapim olsem yu tingim tru Tok Bilong God!​—Sng. 139:17.