Yu Save Pilim Tru Pasin Isi Bilong Jehova?
1 Sapos Jehova i no bin mekim pasin isi na em i pinisim wok autim tok long 10, o 20, o sampela yia moa i go pinis, yu ting bai yu kisim save long tok i tru? Yumi amamas tru long em i bin larim planti manmeri moa long “tanim bel.” Tasol bikpela de bilong Jehova bilong mekim kot “bai i kamap wantu tasol olsem ol stilman i save kam.” (2 Pi 3:9, 10) Olsem na yumi no ken kisim tingting kranki na ting pasin isi bilong God i makim olsem pinis bilong dispela pasin bilong nau bai no kamap kwik.—Hab 2:3.
2 Sori Tru Long Ol Manmeri: Yumi no inap save tru long pasin bilong Jehova long isi long ol man. Yumi no ken lusim tingting long as bilong pasin isi bilong em. (Jona 4:1-4, 11) Jehova i lukim ol manmeri i stap tarangu tru na em i sori long ol. Jisas tu i pilim olsem. Em i sori tru long ol manmeri em i autim tok long ol, na em i laik bai wok autim tok i mas go bikpela bambai planti moa inap kisim laip i stap oltaim.—Mt 9:35-38.
3 Taim ol bikpela bagarap na taim nogut i painim ol man i no save long tok i tru, bel bilong yumi i pilim tru hevi bilong ol, a? Ol manmeri long nau ol i olsem “ol sipsip i no gat wasman” taim ol i traim long karim ol hevi bilong nau na long kisim save long as bilong ol dispela hevi. (Mk 6:34) Taim yumi givim bel long autim gutnius, yumi mekim gut bel bilong ol man i gat gutpela bel, na yumi kamapim klia olsem yumi amamas long pasin bilong Jehova long isi long ol man.—Ap 13:48.
4 Taim i Sot Tru Long Mekim Wok Bilong Yumi: Long yia i go pinis, inap 323,439 ol i kisim baptais na winim 14,000,000 i bin kam long Memorial. Planti manmeri moa inap abrusim bagarap bilong dispela pasin nogut bilong nau! Yumi no save “bikpela lain” bai kamap bikpela olsem wanem. (KTH 7:9, NW ) Na yumi no save bai yumi mekim wok autim tok i go inap long wanem taim. Tasol Jehova i save. Bai yumi autim gutnius inap long mak Jehova i putim, “na bihain tasol bai las de i kamap.”—Mt 24:14.
5 Taim i sot nau, na liklik taim tasol na de bilong God bai kam. (1 Ko 7:29a; Hi 10:37) Yumi save tru olsem ‘taim bilong God i laik kisim bek yumi em i kam klostu.’ (Rom 13:11) Yumi no ken lusim tingting long as bilong pasin bilong God long isi long ol man. Nogat. Yumi mas givim bel long autim tok bambai ol manmeri i gat laik long stretpela pasin ol ken pilim bikpela marimari bilong Jehova.