“Ran Strong Long Dispela Gutpela Resis”
1 Aposel Pol i tokim Timoti long “ran strong long dispela gutpela resis” bilong bilip. (1 Ti 6:12) Pol yet i bin bihainim dispela tok. Klostu long pinis bilong laip bilong em, Pol i tokaut olsem em i bin ran strong long dispela gutpela resis. (2 Ti 4:6-8) Long olgeta taim Pol i autim tok em i kamapim olsem em i gat strongpela bel, na em i no pret, na em i sanap strong. Taim yumi bihainim pasin bilong em, yumi tu inap pilim tru olsem yumi ran strong long dispela resis bilong holimpas bilip Kristen.
2 Yumi Mas Wok Strong Long Mekim Wok: Pol i bin wok strong tru long autim tok. (1 Ko 15:10) Yumi tu i save wok strong taim yumi wok long painim ol manmeri i gat gutpela bel long teritori bilong yumi. (Mt 10:11) Bilong toktok wantaim sampela, ating yumi mas kirap long moningtaim tru bilong autim tok long ol man yumi bungim ol long rot. O ating yumi mas autim tok long apinun bilong bungim ol manmeri taim ol i kamap pinis long haus bilong ol.
3 Yumi mas bosim gut yumi yet na bihainim wanpela gutpela sedyul bambai yumi inap kamap long taim stret long bung bilong autim tok. Olsem: Sampela pablisa na famili i mas kisim wanpela o tupela PMV na ol i kam long ol longwe hap, tasol ol i save kamap long taim stret. Pasin ol i mekim bilong wok strong na bihainim gut sedyul bilong ol yet em i wanpela gutpela pasin yumi ken bihainim.
4 Bel bilong yumi i mas kirapim yumi long go bek lukim ol man i gat laik long harim tok. Maski yumi tilim ol buk na nius long rot o long kain kain taim na ples, yumi mas kisim atres o telefon namba bilong man. Na bihain yumi mekim gobek bilong kirapim laik bilong em long harim tok na bilong kirapim wanpela Baibel-stadi.
5 Autim Tok Long Olgeta Taim: Pol i autim tok long olgeta taim na em i autim olgeta tok bilong gutnius. (Ro 15:19) Olsem wanem long yu? Yu save autim tok long olgeta taim? Yu autim tok pinis long dispela mun? Ol brata bilong lukautim ol Buk-Stadi Bilong Kongrigesen ol i laik bai olgeta pablisa long Buk-Stadi bilong ol i mekim wok autim tok long mun Ogas. Ol bai helpim yu long mekim olsem.
6 Taim yumi bihainim pasin bilong Pol na wok strong tru long autim gutnius, bai yumi wok long “ran strong long dispela gutpela resis” bilong bilip.
This article is repeated in km 8/06.