I Stret Long Pait o Nogat?

YU SAVE long sampela mangi o meri em ol i save ekting olsem ol i bikpela na ol i gat strong?— Yu laik poroman wantaim ol? O yu laik poroman wantaim man i save mekim gutpela pasin na i laik stap bel isi?— Bikpela Tisa i tok: “Ol manmeri i save mekim dai ol kros na pait, em ol i ken amamas. Bai ol i kolim ol pikinini bilong God.”—Matyu 5:9.

Tasol sampela taim ol arapela i save mekim ol samting i mekim yumi kros, a?— Olsem na ating yumi laik bekim pasin ol i bin mekim long yumi. Wanpela taim dispela samting i bin kamap long ol disaipel bilong Jisas taim ol i raun wantaim Jisas i go long Jerusalem. Mi laik stori long yu long dispela samting.

Taim ol i wokabaut inap longpela hap pinis, Jisas i salim sampela disaipel i go paslain long wanpela ples long Samaria bilong painim wanpela hap bilong ol i ken malolo long en. Tasol ol manmeri long dispela ples i no laik bai ol i stap, long wanem, ol Samaria i gat narapela lotu. Na ol i no laikim ol man i go long Jerusalem bilong mekim lotu.

Sapos dispela samting i bin kamap long yu, bai yu mekim wanem? Bai yu kros? Bai yu laik bekim pasin ol i bin mekim long yu?— Em pasin disaipel Jems na Jon i laik mekim. Ol i tokim Jisas: “Yu laik bai mipela i singautim paia i kam daun long heven na i kukim ol dispela man?” Olsem na yumi no kirap nogut long Jisas i kolim tupela olsem Ol Man i Olsem Klaut i Pairap! Tasol Jisas i tokim ol olsem i no stret long mekim kain pasin olsem long ol arapela.—Luk 9:​51-56; Mak 3:17.

Tru, sampela taim ol man i mekim pasin nogut long yumi. Ating ol arapela pikinini i no laik bai yumi pilai wantaim ol. Ating ol bai tok: “Mipela i les long yu kam.” Taim kain samting olsem i kamap, dispela inap mekim yumi bel hevi, a? Ating bai yumi pilim olsem yumi laik bekim pasin ol i mekim long yumi. Tasol yu ting i stret yumi mekim olsem?—

Kisim Baibel bilong yu na yumi ken opim i go long Sindaun sapta 24, ves 29. Baibel i tok: “Yu no ken tok olsem, ‘Nau bai mi bekim pasin nogut bilong en. Bai mi mekim wankain pasin long em olsem em i bin mekim long mi.’”

Yu ting dispela tok i makim wanem?— Em i makim olsem yumi no ken bekim rong ol arapela i mekim long yumi. Yumi no ken mekim nogut long wanpela man, long wanem, em i mekim nogut long yumi. Tasol olsem wanem sapos wanpela i laik kirapim yu long pait? Ating em bai mekim kain kain tok nogut long yu bilong kirapim yu long kros. Ating em bai tok bilas long yu na tok olsem yu pret. Tingim sapos em i kolim yu olsem man bilong pret. Yu ting yu mas mekim wanem? Yu ting i stret yu kirap long pait?—

Orait, yumi ken lukim gen tok Baibel i mekim. Opim Baibel i go long Matyu sapta 5, ves 39. Jisas i tok: “Yupela i no ken bekim rong long man i mekim nogut long yupela. Nogat. Sapos wanpela man i solapim wanpela wasket bilong yu, orait yu mas tanim narapela wasket tu i go long em.” Yu ting Jisas i tokim yumi long mekim wanem? Yu ting tok bilong em i makim olsem sapos wanpela man i solapim wanpela wasket bilong yu, orait yu mas larim em i solapim narapela wasket tu?—

Nogat, Jisas i no tok olsem. Solapim i no olsem man i brukim han na paitim narapela, nogat. Em i makim olsem man i pusim yu. Ating wanpela man inap solapim yumi bilong kirapim yumi long pait. Em i laik bai yumi kros. Na sapos yumi kros na yumi pusim em, wanem samting bai kamap?— Ating bai yumi kirap long pait.

Tasol Jisas i no laik bai ol disaipel bilong em i insait long ol pait. Olsem na em i tok sapos wanpela man i solapim yumi, yumi no ken bekim na solapim em. Yumi no ken kros na insait long pait. Sapos yumi mekim olsem, yumi soim olsem yumi wankain olsem dispela man i bin kirapim pait.

Sapos hevi i laik kamap, yu ting i gutpela moa long yu mekim wanem?— Yu mas lusim dispela hap na i go. Ating dispela narapela man bai pusim yu sampela taim moa. Tasol bihain ating em i no inap mekim moa. Taim yu lusim em na i go, dispela i no makim olsem yu no gat bun, nogat. Em i makim olsem yu strong long bihainim stretpela pasin.

Tasol olsem wanem sapos yu insait long wanpela pait na yu win? Ating wanem samting bai kamap?— Dispela man yu bin paitim em inap kisim sampela pren bilong em na kam bek long yu. Ol inap yusim hap diwai o naip long bagarapim yu. Olsem na yu inap save nau long as na Jisas i no laik bai yumi insait long ol pait, a?—

Yumi mas mekim wanem sapos yumi lukim ol narapela i pait? Yu ting i stret yumi sapotim wanpela bilong ol?— Baibel i tokim yumi long stretpela pasin yumi mas bihainim. Opim Baibel i go long Sindaun sapta 26, ves 17. Em i tok: “Sapos tupela man i wok long tok kros, tasol narapela man i go helpim toktok bilong ol, orait dispela man i olsem man i lukim dok i wokabaut i go na em i go holimpas yau bilong dok.”

Wanem samting inap kamap sapos yu holimpas yau bilong wanpela dok? Em bai pilim pen na kros long yu, a? Taim dok i strong long lusim yu, yu bai holimpas moa yet long ol yau bilong en, na dispela bai mekim na dok i kros moa. Sapos yu lusim em, ating em bai kaikaim yu strong. Tasol yu ting yu inap sanap na holim yet yau bilong em i go i go?—

Em nau, ol kain hevi olsem bai painim yumi sapos yumi insait long pait bilong ol narapela man. Ating yumi no save long as bilong pait o husat i bin kirapim. Ating wanpela man i paitim narapela nogut tru, long wanem, em i bin stilim sampela samting bilong dispela man. Sapos yumi helpim em, dispela i olsem yumi helpim wanpela stilman. Dispela pasin i no stret, a?

Olsem na yu mas mekim wanem sapos yu lukim wanpela pait i kamap?— Sapos pait i kamap long skul, yu ken ran i go na tokim wanpela tisa. Na sapos pait i kamap long narapela hap ausait long skul, yu ken singautim o ringim papa o mama bilong yu, o wanpela plisman. Yes, maski ol arapela i laik pait, yumi mas stap isi.

Ol trupela disaipel bilong Jisas i save mekim olgeta samting ol inap mekim na bai ol i no ken insait long ol pait. Long dispela rot yumi soim olsem yumi strong long bihainim stretpela pasin. Baibel i tok disaipel bilong Jisas ‘i no ken pait na tok kros, em i mas mekim gutpela pasin long olgeta man.’—2 Timoti 2:24.