Ol i Gat Nem Olsem “Ol Pikinini Bilong Klaut i Pairap”

LONG taim bilong bikpela win na ren, ating yu inap harim bikpela pairap bilong klaut. Yu save pret taim yu harim?​—a Jisas i kolim tupela disaipel bilong em olsem “Ol Pikinini Bilong Klaut i Pairap.” Orait nau yumi ken skelim as na em i mekim olsem.

Dispela tupela disaipel bilong Jisas em Jems na Jon. Ol i brata, na ol i pikinini bilong Sebedi na mama bilong ol em Salome. Ating Salome em sista bilong Maria, em mama bilong Jisas. Olsem na Jisas, Jems, na Jon ol i kasen brata na ol i gutpela pren taim ol i wok long kamap bikpela wantaim.

Sebedi, Jems, na Jon ol i man bilong kisim pis. Tupela i insait long namba 1 lain em Jisas i makim long kamap disaipel bilong em. Taim Jisas i singautim ol long bihainim em, wantu ol i lusim wok bisnis bilong ol long painim pis na ol i bihainim em. Bihain, Jisas i makim 12-pela disaipel bilong em long kamap ol aposel bilong em. Jems na Jon i insait long dispela lain.

Sampela mun paslain long ol man i kilim i dai Jisas, em na ol aposel bilong em i go raun long ol ples maunten bilong Samaria. Tudak i kamap na olgeta i taiet nogut tru. Tasol ol lain Samaria i tok ol i no laik bai Jisas na ol aposel bilong em i slip long taun bilong ol. Yu save wai?​— Yumi ken painimaut.

Jisas na ol aposel ol i bilong lain Juda, na planti Juda i save mekim hatpela pasin long ol lain Samaria. Tasol Jisas i no save mekim olsem. Em i save mekim gut long ol, na Jems na Jon tu i mas mekim olsem. Tasol tupela i kros, long wanem, ol Samaria i no mekim gut long ol, na tupela i askim Jisas olsem: “Yu laik bai mipela i tokim paia long kam daun long skai na pinisim ol?” Yu ting Jisas i tok wanem?​— Em i tokim ol olsem i no stret long ol i mekim dispela tok! Jems na Jon i gat wok long lain gut long pasin bilong marimari long ol narapela.

Narapela bikpela hevi bilong Jems na Jon em olsem, ol i laik bai ol i stap nambawan winim ol narapela. Paslain liklik long Jisas i dai, tupela i salim mama bilong ol i go askim Jisas olsem: “Yu mas tok olsem tupela pikinini man bilong mi i ken sindaun klostu long yu long Kingdom bilong yu, wanpela long han sut bilong yu na narapela long han kais bilong yu.” Taim ol narapela aposel i harim stori long samting Jems na Jon i mekim, ol i belhat nogut tru. Yu ting yu tu bai belhat?​—

Ating bai yu belhat. Yumi no save amamas taim ol narapela i laik i stap namba wan o ting ol i winim ol narapela. Bihain, Jems na Jon i kisim save olsem ol i no bin mekim stretpela pasin, na ol i senisim pasin bilong ol. Ol i kisim ol gutpela pasin tru na kamap ol gutpela aposel. Yumi inap kisim wanem skul long dispela?​—

Wanpela skul yumi mas kisim long Jisas em olsem yumi mas mekim gut long narapela narapela. Jisas i bin mekim gutpela pasin long olgeta man, meri, na ol pikinini tu. Bai yu wok strong long tingim dispela gutpela pasin bilong Jisas na bihainim?​—