Yu Save Long Dispela?

Olsem wanem? Sampela bilong ol 12-pela aposel ol i wanblut bilong Jisas?

▪ Baibel i no bekim stret dispela askim. Tasol i gat sampela tok bilong Baibel i givim tingting long yumi olsem sampela bilong ol 12-pela aposel ol i wanblut bilong Jisas. Sampela stori tumbuna tu i kamapim dispela samting.

Ol man bilong raitim Gutnius i kolim nem bilong ol meri i lukluk i stap taim Jisas i hangamap long diwai pos. Jon 19:25 i stori long 4-pela bilong ol: “Mama bilong Jisas [Maria] wantaim susa bilong en na Maria, em meri bilong Klopas, na Maria bilong taun Makdala.” Taim yumi skelim dispela ves wantaim tok bilong Matyu na Mak em ol i stori long wankain samting, bai yumi luksave olsem susa bilong mama bilong Jisas, em Salome. Dispela Salome em i mama bilong tupela pikinini man bilong Sebedi. (Matyu 27:​55, 56; Mak 15:40) Olsem na tupela pikinini man bilong Salome, em Baibel i kolim ol Jems na Jon, ol i kasen brata bilong Jisas. Jisas i singautim dispela tupela brata​—em ol i man bilong kisim pis​—long kamap disaipel bilong em.​—Matyu 4:​21, 22.

Ol stori tumbuna i tok Klopas, olsem Alfius, em man bilong wanpela bilong ol dispela meri em Jon 19:25 i stori long em, em i brata bilong Josep, waspapa bilong Jisas. Sapos dispela stori tumbuna em i tru, orait Jems em pikinini man bilong Alfius, em wanpela bilong ol 12-pela aposel, em tu i kasen brata bilong Jisas.​—Matyu 10:3.

Olsem wanem Jisas na Jon Bilong Baptais ol i wanblut?

▪ Sampela i ting olsem tupela i kasen brata. As bilong dispela tingting i kam long tok bilong Luk 1:​36, em ol i no bin tanim stret. Olsem, Baibel King James Version i tok long dispela ves olsem, Elisabet em mama bilong Jon, na Maria em mama bilong Jisas, tupela i kasen sista.

Tasol tru tru, dispela ves long tok Grik bilong bipo i no kolim stret kain tok olsem. Em i tok olsem dispela tupela meri ol i wanlain, tasol dispela i no makim olsem ol i kasen. Buk The Interpreter’s Dictionary of the Bible i tok, “dispela tok i no klia tumas bilong helpim yumi long save olsem ol i wanblut o nogat.” Orait dispela tingting olsem Jisas na Jon ol i kasen brata, dispela tingting i kam long we? Buk The Catholic Encyclopedia i tok: “Olgeta tok bilong mipela i stori long . . . papamama bilong Maria . . . i kam long ol tok i no stap long Baibel.”

Olsem na yumi ken save, Jisas na Jon ol i wanlain, tasol ol i no kasen brata.