I Stap na Wok Bilong Jisas

Taim Jisas i Stap Pikinini Yet

TAIM Jisas i wok long kamap bikpela, em i stap long Nasaret. Nasaret em i wanpela liklik taun i stap long hap bilong Galili klostu long Baret Jesril.

Taim Jisas i gat 2-pela krismas samting, Josep tupela Maria i lusim Isip na i go long Nasaret. Long dispela taim Maria i gat wanpela pikinini tasol, em Jisas. Tasol bihain Josep na Maria i kamapim sampela pikinini moa, olsem Jems na Josep na Saimon na Judas na ol i kamapim sampela pikinini meri tu. Olsem na Jisas i gat inap olsem 6-pela brata sista samting.

Jisas i gat ol sampela narapela wanblut tu. Mipela save long kasen brata bilong em, em Jon Bilong Baptais, em i stap longwe long hap bilong Judia. Tasol Salome, em brata bilong Maria, em i stap long hap bilong Galili. Salome em i meri bilong Sebedi, olsem na tupela pikinini man bilong ol, em Jems na Jon tupela i kasen brata bilong Jisas. Yumi no save olsem taim ol i wok long i go bikpela ol i poroman wantaim Jisas o nogat, tasol bihain ol i kamap gutpela poroman tru bilong Jisas.

Josep em i gat bikpela wok tru long lukautim famili bilong em. Em i save mekim wok kamda. Em i lukautim Jisas olsem pikinini tru bilong em, olsem na ol i kolim Jisas olsem ‘pikinini bilong kamda.’ Josep i lainim Jisas long mekim wok kamda, na Jisas i mekim gutpela wok kamda. Olsem na bihain ol manmeri i kolim em wanpela ‘kamda.’

Famili bilong Josep i tingim tru lotu bilong God Jehova. Josep tupela Maria i bihainim lo bilong God na ‘long taim ol i sindaun long haus na taim ol i wokabaut long rot na taim ol i slip na taim ol i kirap’ tupela i skulim ol pikinini bilong ol long ol samting bilong spirit. Wanpela haus lotu i stap long Nasaret na oltaim Josep i save kisim famili bilong em i go lotu long Jehova long dispela haus lotu. Tasol ol i kisim bikpela amamas moa taim ol i go long Tempel bilong Jehova long Jerusalem. Bihain bai yumi stori moa long dispela samting. Matyu 13:55, 56; 27:56; Mak 15:40; 6:3; Diuteronomi 6:6-9.

◆ Jisas i gat hamas brata na susa? Kolim nem bilong sampela.

◆ Kolim nem bilong sampela kasen brata bilong Jisas em yumi save gut long ol.

◆ Jisas i mekim wanem wok bilong skin?