Skulim Ol Pikinini Bilong Yu

Jisas i Kisim Skul Long Pasin Bilong Bihainim Tok

OLSEM WANEM? Sampela taim yu pilim olsem i hatwok long bihainim tok?​​—a Yu no ken kirap nogut sapos yu pilim olsem. Sampela taim yumi olgeta i pilim olsem i hatwok long bihainim tok. Yu save olsem Jisas tu i mas lain long bihainim tok?​​—

Yu save ol yangpela i mas bihainim tok bilong husat?​​— Yes, papa na mama bilong ol. Baibel i tok: “Yupela i mas bihainim tok bilong papamama bilong yupela. Yupela olgeta i pas wantaim Bikpela, na dispela pasin em i stretpela pasin bilong yupela i mekim.” (Efesus 6:1) Husat em i papa bilong Jisas?​​— God Jehova, na em i Papa bilong yumi tu. (Matyu 6:​9, 10) Tasol sapos yu tok olsem Josep i papa na Maria i mama bilong Jisas, tok bilong yu i stret tu. Yu save olsem wanem ol i kamap papamama bilong em?​​—

Ensel Gebriel i tokim Maria long olsem wanem em bai kamap mama, maski em i no slip yet wantaim wanpela man. Jehova i mekim wanpela mirakel na Maria i kisim bel. Gebriel i tokim Maria: “Strong bilong God Antap Tru bai i karamapim yu. Olsem na dispela pikinini bihain bai yu karim, em bai i stap gutpela na stretpela man bilong God, na ol bai i kolim em Pikinini Bilong God.”​—Luk 1:​30-35.

God i kisim laip bilong Pikinini bilong em long heven na i putim insait long bel bilong Maria. Orait nau dispela laip i kamap bikpela insait long bel bilong Maria, olsem ol bebi i save mekim insait long bel bilong mama bilong ol. Inap 9-pela mun bihain, Maria i karim Jisas. Insait long dispela haptaim, Josep i bin maritim Maria, na planti man i ting Josep i papa tru bilong Jisas. Tasol Josep i waspapa bilong em. Olsem na yumi ken tok, i olsem Jisas i gat tupela papa!

Taim Jisas i gat 12-pela krismas, em i mekim wanpela samting i kamapim long ples klia olsem em i laikim tru Papa bilong em long heven, em Jehova. Long dispela taim, famili bilong Jisas i wokabaut long longwe rot i go long Jerusalem bilong mekim Pasova, olsem ol i save mekim long olgeta yia. Bihain, long rot i go bek long Nasaret, Josep na Maria i no luksave olsem Jisas i no stap wantaim ol. Ating yu laik save olsem wanem ol inap lusim tingting long em?​​—

Long dispela taim, Josep na Maria i gat sampela pikinini moa. (Matyu 13:​55, 56) Ating ol i gat sampela wanblut tu i raun wantaim ol, olsem Jems na Jon na papa bilong ol, Sebedi, na mama, Salome, ating em i susa bilong Maria. Olsem na ating Maria i ting Jisas i stap wantaim ol wanblut i raun wantaim ol.​​—Matyu 27:56; Mak 15:40; Jon 19:25.

Taim Josep na Maria i luksave olsem Jisas i no stap wantaim ol, ol i hariap i go bek long Jerusalem. Ol i wok strong tru long painim pikinini bilong ol. Long namba tri de, ol i painim em long tempel. Maria i tokim em: “Bilong wanem yu mekim dispela pasin long mitupela? Bel bilong mi tupela papa bilong yu i hevi tumas na mitupela i wok long painim yu.” Tasol Jisas i bekim tok: “Bilong wanem yutupela i wok long painim mi? Ating yutupela i no save, mi mas i stap long haus bilong Papa bilong mi?”​—Luk 2:​45-50.

Yu ting i no stret long Jisas i bekim tok olsem long mama bilong em?​​— Papamama bilong em i bin save olsem em i gat laik tru long lotu long haus bilong God. (Song 122:1) Olsem na ating i stret long Jisas i ting olsem tempel bilong God em i namba wan ples we ol bai go bilong painim em.​​— Bihain, Maria i wok long tingim tingim long bel tok Jisas i bin mekim.

Jisas i mekim wanem pasin long Josep na Maria?​​— Baibel i tok: “[Jisas] i go bek wantaim tupela, na ol i kamap long Nasaret, na oltaim em i save bihainim tok bilong tupela.” (Luk 2:​51, 52) Pasin bilong Jisas inap skulim yumi long wanem samting?​​— Yes, yumi tu i mas bihainim tok bilong papamama bilong yumi.

Tasol sampela taim i hatwok long Jisas long bihainim tok​​—na long bihainim tok bilong Papa bilong em long heven tu.

Long nait paslain long Jisas i dai, Jisas i askim Jehova sapos Jehova inap senisim tingting long samting Em i laik Jisas i mas mekim. (Luk 22:42) Tasol Jisas i bihainim tok bilong Jehova, maski i hatwok long mekim. Baibel i tok olsem “em i karim pen, na dispela i skulim em tru long pasin bilong bihainim tok bilong God.” (Hibru 5:8) Yu ting yumi tu inap lainim dispela pasin?​​—

[Futnot]

OL ASKIM:

▪ Long wanem rot Maria i kamap mama bilong Jisas? Olsem wanem Jisas i gat tupela papa?

▪ Bilong wanem papamama bilong Jisas i no luksave olsem Jisas i no raun wantaim ol?

▪ Jisas i ting papamama bai go painim em long wanem hap?

▪ Yu inap kisim wanem skul long pasin bilong Jisas?

[Piksa long pes 31]

Bilong wanem yu ting Josep na Maria i mas i go pastaim long tempel bilong painim Jisas?