Jehova i Mekim Gut Tru Long Em

“GUDE, meri. Bikpela i stap wantaim yu, na em i bin blesim yu na mekim gut long yu.” Em i narapela kain tok tru! Man i mekim dispela tok em ensel Gebriel. Em i toktok long wanpela yangpela meri i gat pasin daun, Maria, em pikinini meri bilong Heli. Em yia 3 paslain long Krais, na dispela i kamap long taun Nasaret.​—⁠Luk 1:​26-28.

Ol i makim pinis Maria bilong maritim Josep, em wanpela kamda. Long lo na pasin bilong ol Juda, Maria i olsem meri bilong Josep pinis. (Matyu 1:18) Na wankain olsem Maria, Josep tu i man nating. Olsem na i gat wanem as na ensel i mekim dispela tok long em?

Gutpela Samting i Painim Em

Gebriel i tok moa: “Maria, yu no ken pret. God em i belgut tru long yu. Harim. Yu bai kisim bel na karim wanpela pikinini man. Na yu mas kolim nem bilong en Jisas. Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit. Em bai i stap king bilong ol lain bilong Jekop oltaim. Na wok king bilong en bai i no inap pinis.”​—⁠Luk 1:​29-33.

Maria i kirap nogut na em i askim ensel: “Dispela samting bai i kamap olsem wanem? Mi no marit yet long wanpela man.” Ensel Gebriel i bekim tok olsem: “Holi Spirit bai i kam long yu, na strong bilong God Antap Tru bai i karamapim yu. Olsem na dispela pikinini bihain bai yu karim, em bai i stap gutpela na stretpela man bilong God, na ol bai i kolim em Pikinini Bilong God.” Bilong strongim bilip bilong Maria, ensel i tok moa: “Harim. Kandere bilong yu Elisabet em i lapun pinis, tasol em i gat bel na em bai i karim pikinini man. Bipo ol i save tok em i no inap karim pikinini. Tasol nau em i gat bel, na 6-pela mun bilong en i go pinis. I no gat wanpela samting God i no inap mekim.”​—⁠Luk 1:​34-37.

Wantu Maria i orait long mekim dispela gutpela wok. Em i amamas na long pasin daun em i bekim tok: “Mi wokmeri bilong Bikpela. Em i ken mekim long mi olsem yu tok.” Orait nau Gebriel i lusim em. Kwiktaim Maria i go long wanpela taun long ples maunten bilong Judia. Taim em i kamap long haus bilong Sekaraia na meri bilong em Elisabet, ol samting i wankain olsem ensel i bin tokim em. Olaman, bel bilong Maria i amamas tru! Em i mekim ol gutpela gutpela tok bilong litimapim nem bilong Jehova.​—⁠Luk 1:​38-55.

Josep i Maritim Em

Wanpela meri i no bin slip wantaim man em bai karim Jisas olsem profet i tok pinis. (Aisaia 7:14; Matyu 1:​22, 23) Tasol bilong wanem God i makim wanpela nupela meri ol i makim em pinis long marit? Long wanem, long dispela rot pikinini i gat waspapa, na long rot bilong dispela waspapa pikinini inap tru long kisim sia king bilong Devit. Josep na Maria i bilong lain Juda na ol i tumbuna bilong King Devit. Olsem na Jisas inap kamap King long tupela rot. (Matyu 1:​2-16; Luk 3:​23-33) Dispela i as na bihain ensel i tokim Josep long maritim Maria, maski em i gat bel pinis.​—⁠Matyu 1:​19-25.a

Sisar Ogastus i putim lo long baim takis na Josep na Maria i mas go long Betlehem bambai gavman i ken kisim nem bilong ol. Long Betlehem Maria i karim namba wan pikinini man bilong em. Ol wasman bilong sipsip i kam lukim pikinini, na ol i litimapim Papa bilong em, Jehova. Inap 40 de Maria i bihainim pasin bilong kamap klin olsem Lo Bilong Moses i tok, na bihain em i go long tempel bilong givim ofa bilong lusim sin bilong em. (Wok Pris 12:​1-8; Luk 2:​22-24) Tru tumas, Maria i kisim sin long mama bilong em, olsem na em i mas givim ofa bilong lusim sin bilong em.​—⁠Song 51:⁠5.

Taim Maria na Josep i stap long tempel, lapun man Simeon na profet meri Ana i amamas long lukim Pikinini bilong God. Ol i no litimapim nem bilong Maria. (Luk 2:​25-38) Na bihain ol saveman haiden i kam na givim biknem long Jisas, tasol long Maria nogat.​—⁠Matyu 2:​1-12.

Papamama i kisim Jisas na ol i ranawe i go long Isip na ol i stap inap long man nogut Herot i dai. Bihain ol i go sindaun gen long liklik ples Nasaret. (Matyu 2:​13-23; Luk 2:39) Long dispela ples Josep na Maria i mekim bikpela long Jisas na ol i bihainim ol lo bilong God long famili.

Maria i Karim Sampela Pikinini Moa

Bihain Maria na Josep i kamapim sampela pikinini moa na Jisas i gat ol brata susa bilong skin. Taim Jisas i mekim wok bilong em long autim tok, em i kam bek long as ples bilong em Nasaret na sampela wanples i luksave long em. Ol i tok: “Yumi save, dispela man em i pikinini bilong wanpela kamda, na Maria em i mama bilong en. Na Jems na Josep na Saimon na Judas, ol i brata bilong en. Na olgeta susa bilong en, ol i stap wantaim yumi.” (Matyu 13:​55, 56) Ol man bilong Nasaret i toktok long famili tru bilong Josep na Maria na ol pikinini man na pikinini meri bilong ol, em ol brata susa tru bilong Jisas.

Ol dispela brata susa i no ol kasen bilong Jisas. Na ol i no ol disaipel bilong em, o ol brata sista bilong spirit. Jon 2:12 i kamapim klia olsem i gat tupela lain, em i tok: “Orait Jisas i lusim Kana na em i go daun long taun Kaperneam wantaim mama bilong en na ol brata bilong en na ol disaipel bilong en.” Sampela yia bihain aposel Pol i lukim Pita long Jerusalem na em i tok: “Tasol long dispela taim mi no lukim narapela aposel. Jems, em brata bilong Bikpela, em tasol mi lukim.” (Galesia 1:19) Na Matyu 1:25 i tok Josep “i no slip wantaim [Maria], i go inap long taim Maria i karim pikinini man.” Dispela tok i makim olsem taim Maria i karim pinis Jisas, Josep i slip wantaim em na Maria i karim sampela pikinini moa. Olsem na Luk 2:7 i tok Jisas em i “namba wan” pikinini man.

Wanpela Mama i Pret Long God

Maria i pret long God na em i wok gut wantaim Josep long skulim gut ol pikinini long gutpela pasin. (Sindaun 22:⁠6) Yumi ken save em i bin stadi gut long ol tok bilong Baibel, long wanem, em i kamapim ol gutpela tok bilong spirit taim Elisabet i givim gude long em. Long dispela taim Maria i kamapim sampela tok Hana i bin mekim long singsing bilong em, na em i kamapim save bilong em long sampela Song na samting i bin kamap bipo na ol tok profet na ol buk bilong Moses. (Stat 30:13; 1 Samuel 2:​1-10; Sindaun 31:28; Malakai 3:12; Luk 1:​46-55) Maria i holim long tingting sampela samting i mas kamap olsem tok profet i makim, na sampela tok profet, na em i bin putim long bel bilong em, na em i wok long tingim tingim ol dispela samting. Olsem na em tu inap long skulim gut Jisas taim em i yangpela.​—⁠Luk 2:​19, 33.

Jisas i skul gut na taim em i gat 12-pela krismas ol tisa long tempel i kirap nogut long save bilong em long buk bilong God. Wanpela taim long Pasova i olsem em i lus na taim papamama i painim em pinis mama bilong em i tok: “Pikinini, bilong wanem yu mekim dispela pasin long mitupela? Bel bilong mi tupela papa bilong yu i hevi tumas na mitupela i wok long painim yu.” Jisas i bekim tok olsem: “Bilong wanem yutupela i wok long painim mi? Ating yutupela i no save, mi mas i stap long haus bilong Papa bilong mi?” Ol i no save long insait bilong dispela tok, tasol Maria i putim long bel bilong em na holim i stap. Ol i go bek long Nasaret na “Jisas i kamap bikpela, na save bilong en i kamap gutpela tru. Na God i laikim em tru na ol man tu i laikim em.”​—⁠Luk 2:​42-52.

Maria i Disaipel Bilong Jisas

Bihain Maria i kamap wanpela gutpela disaipel bilong Jisas! Em i gat pasin daun na em i no strong long kisim namba, maski God i makim em bilong karim Jisas. Maria i save long ol tok bilong Baibel. Sapos yu yet i stadi long Baibel bai yu no inap painim tok olsem Maria i sindaun long wanpela sia king olsem “mama-kwin” na lait i raunim het bilong em, na bikpela lait bilong Jisas i karamapim em. Baibel i no stori planti long Maria, olsem litimapim nem bilong em, nogat.​—⁠Matyu 13:​53-56; Jon 2:12.

Taim ol disaipel i laik litimapim Maria, wantu Jisas i stretim ol. Taim Jisas i autim tok “wanpela meri i stap namel long ol em i singaut olsem, ‘Dispela meri i bin karim yu na i givim susu long yu, em i ken amamas.’ ” Tasol Jisas i tok, “Mobeta yumi tok olsem, ol man i harim tok bilong God na i bihainim, em ol i ken amamas.” (Luk 11:​27, 28) Long wanpela kaikai bilong marit Jisas i tokim Maria: “Mama, dispela em i samting bilong yu. Em i no samting bilong mi. Taim bilong mi em i no yet.” (Jon 2:⁠4) Sampela narapela Baibel i tok: “Mi yet bai mekim.” (Baibel Weymouth) Na “no ken bosim mi.” (Baibel An American Translation) Tru tumas, Jisas i daun long mama bilong em, tasol em i no adorim em.

Gutpela Samting Bilong Oltaim

Maria i bin kisim ol gutpela samting! Em i karim Jisas, na taim em i yangpela pikinini em i lukautim em na skulim em. Bihain, em i bilip long em na kamap disaipel bilong em, olsem wanpela sista bilong spirit. Na laspela tok Baibel i mekim long Maria i tok em i stap long wanpela rum antap long Jerusalem. Em i stap long dispela rum wantaim ol aposel bilong Jisas, na ol narapela pikinini man bilong em, na sampela meri i bilip​—⁠olgeta i lotu long Jehova.​—⁠Aposel 1:​13, 14.

Bihain Maria i dai na bodi bilong em i go bek long graun. Olsem ol narapela disaipel bilong Jisas bilong pastaim, em God i bin makim ol long spirit holi, Maria tu i bin slip long matmat inap long taim God i kirapim bek em olsem spirit na em i kisim laip oltaim oltaim long heven. (1 Korin 15:​44, 50; 2 Timoti 4:⁠8) Nau em i stap long heven wantaim God Jehova na Krais Jisas na em i amamas tru God i “mekim gut long [em].”

[Ol Futnot]

[Piksa long pes 31]

God i mekim gut long Maria olsem mama bilong Jisas