Ol i Raitim Stori Bilong Jisas

Yu lukim ol dispela man long piksa?— Em Matyu, Mak, Luk, Jon, Pita, Jems, Jut, na Pol. Olgeta dispela man i bin stap long taim Jisas i stap long graun, na ol i raitim stori long laip bilong Jisas. Yumi ken kisim sampela save moa long ol.

Tripela bilong ol dispela man em ol aposel husat i save autim tok wantaim Jisas. Yu save husat dispela 3-pela man?— Em Matyu, Jon, na Pita. Aposel Matyu na aposel Jon i save gut long Jisas, na tupela i raitim ol buk i stori long laip bilong Jisas. Na tu, aposel Jon i raitim Buk Revelesen na tripela pas ol i kolim 1 Jon, 2 Jon, na 3 Jon. Aposel Pita i raitim tupela pas long Baibel em ol i kolim 1 Pita na 2 Pita. Long namba 2 pas bilong Pita, em i stori long Jehova i stap long heven na i tokaut long Jisas olsem: “Dispela em i pikinini bilong mi, mi laikim em tumas, na bel bilong mi i amamas long em.”

Ol narapela man long piksa tu i raitim ol buk i skulim yumi long Jisas. Wanpela bilong ol em Mak. Ating em i stap long taim ol i arestim Jisas na em i lukim olgeta samting i bin kamap. Narapela man em Luk. Em i wanpela dokta, na ating em i kamap Kristen bihain long Jisas i dai.

Tupela narapela man moa bilong raitim Baibel em yu lukim long piksa em tupela liklik brata bilong Jisas. Yu save long nem bilong ol?— Nem bilong tupela em Jems na Jut. Pastaim ol i no bilip long Jisas. Ating ol i ting em i longlong. Tasol bihain ol i bilip long Jisas na ol i kamap Kristen.

Laspela man em piksa i soim em Pol. Paslain long em i kamap wanpela Kristen, nem bilong em Sol. Em i save heitim ol Kristen na em i save mekim nogut long ol. Yu save wanem samting i mekim na Pol i kamap wanpela Kristen?— Wanpela taim, Pol i wokabaut long rot i go long Damaskus na em i harim wanpela nek i kamap long heven. Em nek bilong Jisas! Em i askim Pol: ‘Bilong wanem yu wok long mekim nogut long ol man i bilip long mi?’ Bihain long dispela, Pol i senisim pasin bilong em na em i kamap wanpela Kristen. Pol i raitim 14 buk bilong Baibel, kirap long Buk Rom i go inap long Hibru.

Yumi save ritim Baibel long olgeta de, a?— Taim yumi ritim Baibel bai yumi kisim planti save long stori bilong Jisas. Yu laik kisim sampela save moa long Jisas?—